Keimah nakin kha nangmah nichin

“E.S. Lorenz an tih hi...” han ti ṭan nghal i la, a tam zâwk beng a thlep nghal dawn si. Chu bâkah, google entawn chung pawhin a chanchin sawi tur ka hre lo meuh lo. “Ka Chhandamtu min vêngin a hnâi reng” tih hi Kristian Hla Bu-ah E.S. Lorenz phuah anga tar lan a ni a. Hymnary.org-ah chuan E.S. Lorenz phuah hi “I am safe, whatever may betide me” tiin a inṭan a, a hla hming chu “The Hollow of God’s Hands” tih a ni a, “Ka Chhandamtu min vêngin a hnâi reng” tih nen chuan a intu lo. Ehymnbook.org-ah he hla anpui deuh reuh, a phuahtu hriat loh, “With my Saviour ever near to guide me” tih nen hian a inchawbê hmêl viau thung. He Sap hla pahnih hi a thunawn a inang titih a, a châng thu erawh a hrang. A phuahtu hriat loh zâwk hi, a châng dang nena khaikhin pawhin, KHB-a mi nen hian a inang hle. Mahse, chu chu kan sawi tum a ni lo.

A Mizo hla thunawna “A kutphah ropui chhûngah” tih hi han ngaihtuah mai chuan kutphahin chhûng a nei em ni, tih mai tur a ni a; mahse, ‘in the hollow’ tih vel a nia, Sap ṭawng kan thiam ve mang si lo a, ṭawng sual a hlauhawm. A thu hrimah hei hi kan sawi tum a la ni lo cheu.

“Thil eng pawh lo thleng se ka him a ni” tiha thu hlâwm pahnih hi kan pawh ṭhen chuan hetiang hi kan hmu: ‘thil eng pawh lo thleng se’ tih hi thil lo thleng thei sawina a ni a, a lo la thleng lo a, a lo thleng thei a, a lo thleng lo thei bawk; ‘ka him a ni’ tih ve thung hi chu thil thleng tawh sawina a ni, a him diam tawh. A pahniha a inzawm hian - thil lo thleng tur hmanga bul ṭan siin thil lo thleng tawh hmangin a hnu kan dâl tihna a ni.

A Sap ṭawng lamah chuan, “I am safe, whatever may betide me” tih a ni a; Sap

ṭawng thiamte chai zui chi. Mizo ṭawng kau chheh dânah chuan, “(Kan palâite chuan) eng thu pawh rawn hâwn se ka lâwm a ni” kan ti ngâi lo a; “(Ka pa zin chuan) eng thil pawh min rawn hawn se ka lâwm a ni,” pawh a tih chi loh; “Ruahthimpui pawh lo thawk se ka him a ni” kan ti duh lo ang. Amaherhawhchu, ‘Thil eng pawh lo thleng se’ tih hian future a kâwk mah se ‘ka him a ni’ tiin a hnu kan dâl duh ta thung.

Khitiang deuh khi kan Pathian hlaah hian a awm nual âwm e; Mizo hla hlui lamah chuan a awm lo turah ka ngâi. “Mangang leh lungngaia ṭan i tum te hian” tihah pawh, “Sumin a lei theih loh thil i chan fo hi, ngaihtuah bawk la, lâwmin i lo khat a ni," tih a awm. “Ngaihtuah la” ti na na na a la ngaihtuah lo tihna a ni a, “lâwma khah” ngawt thu a la awm rih lo, a ngaihtuah ve phawt a ngâi. “Lâwm hian a khah theih reng reng em?” tih te hi sawi zui theih a ni a; mahse, Mizopa irawm chhuak a ni lo a, ‘a kutphah ropui chhûngah’ tih te nena hmer kawp mi a ni lo ang; sawisêl âi chuan mâwi ti taka sak hliam hliam hi a ṭha zawk e.

“Ka thinlung sual bawlh­hlawh hnu kha” tih hlaah pawh, “I lo en chuan ka thinlung lâwmin a khat,” tih a awm leh a. A hmaa mi ang bawkin hei pawh hi pawt ṭhet ta i la, “I lo ên chuan” tih hi zêp lohah chuan thil lo la thleng tur lam chu a hawi deuh a ni. Amaherawhchu, Mizo chuan ṭawngkam ṭha deuh mai kan nei a, “Ka tihna” kan ti a, a fel leh duak zel. Hla phuahtute pawh hi an rilru kan hriatsak deuh vek em ni aw ka ti, “Chumi a tihna chu alawm” kan tihsak thei deuh ṭhûm zel nia.

He hlâ vêka, “Ka inpe ang, nangmah nên chêng zâ tûrin” tih lâi pawh hian kan ni tin ṭawngkam nen chuan a inang lo. Mi pakhat nen kan chêng zâ ngâi lo a, kan chêng dûn zawk ṭhin. Nimahsela, a phuahtu hi, “A...vantirhkohte zawng zawng a ngaihtuah tel a, a hmer tel vek alawm” kan tihsak thei a, “a tihna” hmangin mâm takin a chhuah leh theih mai bawk e. Lengzem hla pakhat, J&J hlaah pawh, “Vanglaini te lo tlâin, sakhmel pawh lo chuai mah se, ka tan chuanin aw i mâwi hluan e,” an ti. A zavai mai hian ka tan nakin a ni a, anni hian a hnu an dâl danah hian nichin niin an hre bawk si. Hriat dân a inang lo a ni e.

- Rempuia R. Lûtmâng