A MAN KAN PE LET MEK: (Ṭhenkhat tan a lo nât lutuk loh ka beisei)

Chiahpuam-ah tam takin chiah ṭawih mah ila, tam tak chuan sum kan rût nghek nghek, khehpuamah chuti tho chu. Chu chuan in hmun man a tisang nghal dawrh dawrh a. Kuhva kan tawlh a, National Highway laih mekah ram chhengchhia leh khampang ram ṭau mai mai, engmah chin theihna ni hlei lo pawh a neitu leh a thlai lem kan siam chawp a, changel hmun leh mau hmun te balhla huanah kan chantir thut thut a, zangnadawmna kan rût a. Uchuak takin, kut tling loin sum kan rut nghek nghek a. Pathian malsawmna nia ngai mauh mai te pawh kan awm hial niin a lang. A nghawng chhuah chu in hmun sang mai a ni ta lo, Heroin No 4 a ni ta. Kuhva tawlhtute aṭanga mahni khaw bil tana chhiah kan lo khawn ve leh surveyor te nen inthuruala ram hlutna tisang vaka zangnadawmna kan hmuh hi Pathian malsawmna nia kan ngaih chuan...Heroin No 4 ngat mai demand kan tipung thei ta hi changkanna chi khat, hmasawnna ropui takah pawh a ngaih theih tho ang. A man a to a, thil man to kan demand nasat chuan kan changkang viau tihna a ni mai em ? Khaw ṭhenkhatah chuan vawikhat hit lek lekin a thlawnin an sem nia sawi hial a lo ni ta... Tin, khaw ṭhenkhat dangahh chuan, No 4 demand a sang chak viau bawk. A dawt lehah eng thil ṭha lo dang nge kan hmabak kan chhut ngai em le ?

Dan ang lo, thianghlim lo leh kuttling loa sum emaw, bungrua emaw kan lakluh reng reng, ram zau tak aṭanga hriau pakhat thleng hian kan duh emaw, duh lo emaw, a man kan pe let zel dawn. Thih hnu lam a ni lo a, kan dam lai ngei zawk thil a ni. A man atana kan pek tur erawh kan hre lawk lo mai chauh a ni. A sum leh bungrua chuan a ni kher lo ang, kan rilru hlimna leh thlamuanna te, thlamuang taka kan mutthilh siai siai theihna te, kan hriselna te, kan chhungkaw hlimna te, nu leh pa kan chawimawina ṭhin emaw, nu leh pa kan nih anga kan fate'n min chawimawina ṭhin te, kan hmingṭhat vena te hian mi tam takin a man kan rul tawh a, kan rul mek a, kan la rul zel dawn. A len leh tam dan azirin kan pek let zat tur chu a tlemin a tam mai chauh a ni. Thlamuanna leh Hlimna lei nana hman theih niin kan ngai a, kan Thlamuanna leh kan Hlimna hmang chuan kan lei zawk zel dawn a lo ni. Pathian hnena a Kohhranho te kaltlanga sawma pakhat kan pek avang hian a thianghlim ta vek mai niin a lang lo tlat.

Heng hi kan Pathian Lehkhabu Thianghlima a chuan vang ni kher loin, Leilung Dan, Law of Nature a ni. Thilmak a ni lo a, thil nihphung pangngai a ni.

Sual chu a awm zel dawn a lawm kan ti a nih pawhin a dik viau, mahse, kawngka kan hawn zauh dan azirin a ni a lo luh ṭhin. Thawka phita khaw chhak lam unaute puh zawh vek hi a fuh ber lo. Sum, hah tak leh kuttling zana kan thawh chhuah ni lo, ren miah loa hman hem hem tlak leka hlutna pawh nei vak lo kan ngah tlang a n thei ve tho asin. Khawchhak unau te an rawn raltlan a, chung raltlan anga langte zingah chuan, remchang lo laa ruihhlo rawn tawlh ta mai chu an awm nual tih erawh a chiang. Eng vang nge a tlawm ? Supply a tam thei hle a ni mai. Supply tamna chhan chu demand a sang a ni leh mai. Thil man to leh a kenkual vel pawh hlauhawm tak ni si, kan police te'n supply an man fo tur awm thei khawpa demand sanna chhan hi ngaihtuah tham a ni. Heng thil hi do loh tur tihna lam a ni lo, theihtawp tak meuh meuh chhuahin kan do tur a ni a, kan do zel dawn. Keimahni lam pawh inenfiah reng kan ngai tih erawh kan hriat a va ṭul em ! Chu chu kan theihnghilh si chuan...Information Technology rawn ṭhang zel lo do ang lek kan ni ang.

Langsar tak leh mi dangte hmuh theih tura pe let kan nih vek loh avang hian, kan rulh let dan hre loin kan sum leh hausakna chauh kan inthlir a, awhnain kan khat a, kan inveng zo lo ṭhin. Kei hi ka fihlim em ? Thil te tham thlenga zuk chhut chuan, ṭha famkim leh dik kim vek kan awm lo a, kan tehna pawh a inang lo bawk ang. Chutiang chu ni mah se, kan ram leh kan chhungkua a nghawng dan aṭangin eng emaw chen chu a inteh theih. Tin, khawvelah hi chuan 100% a awm thei lo. Pathiana innghat te meuh pawh an tlu a, an tho leh a, an kal peng ve fo...sualna neilo leh ṭha famkimte chauhin an sawi kan nghah chuan....vanram kan thlen hunah chauh a ni mai. Chutah lah chuan heng thu sawi hman lo lekin kan zai tluk tluk dawn si.

- Vanramhluna Renthlei