Damdawi Ṭha lo

Damdawi dik lo leh ṭha lo, a nihna tur ang ni pha lo vang hian khawvel ram hrang hrang hian kan tuar a. Damdawi ṭha lovin a nih dan tura hna a thawh loh avang hian nunna hlu tak miin an chan fo a, sum leh tha senralna bakah damlo enkawltute lakah rinna a tlakhniam phah ṭhin.

Damdawi lem leh damdawi ṭha lo hi ram rethei leh ram ṭhang mek (developing counties) zingah a hluar zual. China ramah chuan kum tinin mi sing hnih aṭanga sing thum velin damdawi ṭha ziktluak lo avangin nunna an chan ṭhin niin zirchianna chuan a tarlang a, India ramah hian chiang taka zirchianna chu awm lo mah se damdawi ṭha lo leh damdawi lem siamchhuaktu tam berna ram zingah a tel avang hian mipui hman damdawi zingah pawh hian damdawi ṭha lo hi a hluar ang tih a rin theih.

India ramah hian damdawi lamah dan Drug and Cosmetic (D&C) Act, 1940 kan nei a. Kum 2008 a D&C act siamṭhatna (amendment) zulzuiin ram puma damdawi enkawltu Central Drugs Standard Control Organization (CDSCO) chuan damdawi ṭha lo leh a nihdan tur ni pha lo (not of standard quality), damdawi dik lo leh ṭha lote chu chi thum, categories A, B leh C in a thliar hrang a, hemi chungchang hi tawite in han tarlang ila.

Category A (Spurious and Adulterated Drugs): Damdawi nihna tak tak thup a, damdawi ṭha leh rintlak sa ang thei ber tura damdawi ṭha lo leh damdawi lem, a damdawi taka pai emaw pai tel miah lo ho chu spurious drugs a ni a. Adulterated drugs ho chu a damdawi tak thildanga thlakthleng emaw pawlhdal leh taksa tana hlauhawm thei pawlh damdawite a ni. Hetiang damdawi ṭha lo hi miin tum reng vanga a siam, damlo hman tura an zawrhchhuah a ni tlangpui a ni.

Category B (Grossly sub-standard drugs): Damdawi siamtuten damdawi an siamlaia an fimkhur tawk loh avang leh tihdan phung fal tak (good manufacturing practice) an zawm ṭhat loh avanga damdawi ṭha tawk lote chu hemi hnuaiah hian dah a ni. Hemi hnuaia damdawi ṭha lo awm thei chi hrang hrang zingah tlem han tarlang ila:

(1) Damdawi mum leh laihren taksa chhungah nihdan tur anga an kehdarh loh leh thisena lut thei tura an zawpral dan a dik loh leh a damdawi zawpral tur ang bithliah an phak lohin. Hetiang damdawite hi chu hmuh mai a hriat theih a ni lo a, pharmaceutical laboratory test tih phawt a ngai ṭhin.

(2) Damdawi tui chi-ah bawlhhlawh leh natna hrik chikhat fungus a awmin.

(3) Injection leh vaccine damdawiten an thianghlimna, khawsik leh harsatna dang taksaah an thlen dawn lo a ni tih tehna an paltlang zawh lovin.

Category C (minor defects): Hemi hnuaiah hian damdawi siam a nihlaia tihsual leh tihdik loh vang te, a vawn-

ṭhatna leh a phurhkualna a dik tawk loh avanga damdawi ṭha lo awm theite a huam a, Chutiang zingah chuan damdawi rawng dik lo leh danglam bik, damdawi diak zinga mi emulsion-ah khir leh dik lo dang a lo awm te, damdawi bur leh funnaa damdawi awmte a nihdan tur aia tlem a lo awmin. Damdawi tuiril bikah damdawia tel lo tur thildang a lo awm te, a rawng a lo inthlak te, damdawi mum tuamtu (coating) rual lo leh damdawi tuamna a inziak (labelling) dik lo (misbranded) te a huam a ni. Damdawi reng reng hi thildang anga fun mawi satliah a ni ngawt lo a, a funna/ tuamnaah hian a damdawi hming dik leh chiang takin a inziak tur a ni a, a siam ni, a thih ni tur, a damdawi awm zat, a vawn ṭhat dan leh damdawi kaihhnawih thil chi hrang hrang fiah fai takin a inziak tur a ni.

Mizoramah pawh kum 2015 khan hemi hnuaia damdawi dik lo zingah Chloramphenicol damdawi chu Chloro­phenicol tia inziak hmuh chhuah a ni a, thuneihtuten an chhuichiannaah a damdawi hming inziak dik lo mai bakah a damdawi hrim hrim pawh a lem vek (NSQ-Category A) a lo ni a, a siamtu company pawh sawrkar hriatpui loh a ni tih hmuhchhuah a ni a, sawrkar damdawiin aṭangin lak let vek a ni, kha damdawi lem hmang khan damlo enkawl ni ta se, a nghawng chu a rapthlak hle ang le.

Tunhnai maiah pawh khan sawrkar department pakhata vitamin tui supply mipui hnena sem tur zingah damdawi inang reng si, a rawng inang lo a awm chu social media-ah a thlalak dan kengkawhtuten an hmu hlauh mai a, zirchian a nih hnuah sem chhuah khap a ni. Hei bakah hian mipui hnena sem vek damdawi pakhat chu a hming ni miah lovin a tuamnaah a inziak tih hriat a ni bawk.

India ram kilkhawr taka awm, Mizo­ramah hian hetiang damdawi ṭha lo hi a lo lut nasa ang tih a rin theih. State bilin Drug Testing Laboratory kan la nei bawk si lo, dan kengkawhtu, Mizoram sawrkar Health & Family Welfare Department hnuaia Food & Drugs Administration a thawktu an indaih lo em em a, Mizorama cheng mihring nuaih 10 chuangte damdawi hman lo endik a, dan kengkawh turin mi 10 an tling awrh a, an theih chin chinah damdawi ṭha lo tihbo tumin hna an thawk a. April 2016 aṭanga March 2017 chhung khan sawrkar damdawi supply dawn leh mimal zawrhte aṭanga sample tlemte an test zingah 45% lai mai chu damdawi ṭha lo (not of standard quality) a ni!

Damdawi ṭha lo tihbona kawngah hian FDA leh pharmacist-te tha tihchak hi a pawimawh hle a, anni bakah hian damdawi chawhtu doctor te, damdawi uluk taka enkawla damlo hnena pechhuaktu leh hrilhfiahtu pharmacist te, damlo enkawltu nurse te, damdawi hmangtu damlo te, damdawi zuartute leh mi zawng zawng kan pawimawh a, kan tarlan tak damdawi ṭha lo nihna hrang hrang hi en mai pawh a hriat theih a tam hle a, mitinin damdawi kan hman dawn reng rengin zirchiang ṭhin ila a lawmawm hle ang. Damdawi ṭha chauh hman a nih theihna turin i ṭangtlang ang u.

Damdawi chungchangah hriat fiah duh i neih chuan Drug Information Centre, RIPANS hi rawn be ve ṭhin ang che. Email-dicripans@gmail.com sms/whatsapp-8730955168

- Dr. C.Zothanmawia Drug Information Centre, RIPANS