Mizoram hian ENG ANG SAWRKAR NGE KAN NEIH - I
Kum 1987 a State sawrkar hmasa ber kha kum khat awrh a kal tihin MLA ṭhenkhat, Minister nih duhho vangin a buaia, CM Pu Denga khan MLA lungawi lo ho kha portfolio ṭha deuh pe duh se, sawrkar kha chhandam dan awmin an sawi naa, Pu Denga khan chutiang ai chuan ka bang mai ang, a tih tlat avangin President rule ah kan luh phah ta. Kum 1988 inthlanah Congress sawrkar a piang a, kum 10 an sawrkar a. Hei hi Lalṭhutthleng kan ken man Pathianin kum 10-in min rul tiin Pu Hawla'n a sawi. He lam hi chu duhtawk rih ila, tun ṭum chu, kan sawrkar hrawn mek MNF Ministry hi eng ang chiah nge a nih i han chhui thung teh ang.
1. Congress Sawrkar kha mipuiin kan hne em em nain, Pu Hawla khan Cheng hnih note zawr tak, a thlakna awm si lo angin a intehkhin a, mahse MNF leh MJD an ṭangrual thut a, mawngsawh dawtin an tla a nih kha. Hemi ṭuma sawrkar inṭawm siamnaah hian Pu Zoramthanga chuan, Van khi a lai takah kan inphel phawk a ni a ti nain, van phel lehlamah Arsi (Minister) an tam bik hle thung.
Congress sawrkar kha NLUP sem vanga tling niin an hria a. Pawisa kan sem ve mai loh chuan eng tikah mah kan sawrkar dawn lo tih ngaihdan an neih avangin, Cheng nuai thum sem intiam chungin an sawrkar ve ta hlauh a nih hi.
MNF Party hi kum 20 zet rammu an nih avangin mipui tam tak hian, Congress aia ziaawm deuh turin an beisei ṭhin a, mahse a zual zapui vailenhlo tih ang mai a ni. Congress kalphung bak thiam dang nei chuang lo leh Congress pawh tluk pha lo an ni ber mai.
2. Kum sawm opposition an nih hnuin an rêk chhum lek lek a, HNAM RUN pawh maimawmrilin a bawh chúk hman hial! SEDP cheng nuai thum, kawngpui chhawng leh Raw chin thlangtu (kuthnathawktu) chhung tin hnena thla tin Rs. 4000/- sem an tum thu hmangtein mipui mar an han dêk chhin a, fuh dawna hriain risk puitling an la chho ta. Mipui lamin Congress sawrkar an lo ning tawhin, ZPM lam an mumal rih meuh bawk si lo, chutih karah vote thlak tho a ngaih si avangin MNF vanneih kum a herchhuak ta a ni ber.
3. MNF party hi inthlan dawna tiam theih zawng zawng tiam a, pawl hrang hrang aggreement ziahpui mial mialtute kha an ni. Sawrkar tana sum hnar pawimawh tak Zu zawrh tihtawp thlengin, opposition-a awm leh ai chuan tiin an tiam zel a, Sikul ṭan hun sawn hmate pawh ṭhatna tam tak a awm laiin, kan sawn ang, an ti zel bawk a. Sum hnar ṭha chhu chat chungin sum tam tak sem an tiam lawi a. Anmahni siam liantu, India ram aṭanga Congress umbo tumtu leh election sum thlenga ngaihtuahsaktu(?) BJP phatsan chungin sawrkar an han kalpui chho ta a. An thlen chin chu hei zawng hi a ni ta.
Kum 2018 inthlan Campaign laia cheng nuai thum sem an sawi chu kum 4 hnuah meuh chuan cheng 25000/- ah tla thlain chaurau ek an thai chu a ni ta der mai. An sawrkar huna Vai buh ei loh min tiam te, Raw chingtute hlawk tur zia leh, sawrkar hnathawk peih an awm loh hial tur thute leh, IAS te meuh pawhin an hna bansan an duh hial tur thute sawi a nih laiin, MYC hmangin Super IAS Coaching te vung takin an kalpui ang lawi a! Mizoram chu khawizu leh hnute tui luanna rama siam an tumna kawngah hian Vision leh Dream ringawt chuan a daih seng ta lo a nih hmel. Kawng lakah tuihal in min tlukpui mek a, phingphihlip Si-Ar lak tum an sawi ang maiin an lawnsan poh leh an tlakna a sang ting a ni ta mai. Tunah chuan, Van ek-khum tum an sawi ang maiin an ka chhungah ek tum an hmuam ta a ni ber mai.
- Vanlalhuma Kawlni