Vehbur khawntute an rintlak em?
Tun hnaiah pawh Mizoram hmun hrang hrangah chhiat tawk te, misual kut tuar te, thil bo te a awm fo a. Heng mite hi an lainatawm a, tute pawhin kan tawk thei ṭheuh bawk a ni.
Hetianga chhiat tawk an awm chang hian Youtuber leh eng pawl pawl emaw hian vehbur khawnin mipuiah pawisa an khawn sak fo mai a. Han ngaihtuah mai chuan heng mite hian thil ṭha tak an ti a nih tih hai rual a ni lo. Chutih ruala kan ngaihtuah tel tur chu a hman hmanin vehbur lo khawn ve ngawt hi thil ṭha a ni chiah em, danin a phal em tih hi a ni.
Vehbur khawn hming pua mahni hamṭhatna tura sum lo tuak chingte pawh an awm tih sawi a awm leh ṭhin a, hengte avang hian a remchang apiangin vehbur khawn hi dan mit aṭanga en pawhin a him lo thei tlat a ni.
Kum tir lam pawh khan Mizoram Police chuan social media-ah ṭanpui ngaite ṭanpuina tur vehbur khawn an tam thu leh, an zingah hian rintlak lo an awm avangin fimkhur tura thuchah an chhuah hial a ni. Pawl ṭhenkhat chuan an pawisa hmuh aṭanga engemaw zat chu anmahni tan an dah hrang tih an sawi.
Vehbur khawntu zingah hian TV/ chanchinbu leh social media lama intih lar tum, follower ngah duh vanga lo che chhuak fo pawh an awm ngei ang. Hetiang zawng zawng chhut hian sorkar hian mumal zawka vehbur khawn dan te pawh siam se a duhawm hle.
Mipui nawlpuiin kan tih ṭhin Chief Minister Relief Fund ang chi te hi chu thil hrang daih a ni a, langtlang leh rintlak taka pawisa thawhna leh semna a nih avangin thil ṭha tak a ni a. Covid 19 lai phei kha chuan CM Relief Fund hi kan sum hnar ṭha tak a ni a, mipui pawhin kan ṭangkai pui em emin a hriat.
Tichuan, Kohhran hrang hrangin Home leh hmun dang ṭanpuina tur sum an tuak te hi chu thil intih hmuh atana ṭha tak a ni a, ti chhunzawm zel bawk ila a duhawm khawp mai. Hetiang ni loa a remchang apiangina vehbur lo khawn ve ngawt mai ṭhin hi chu thil ṭha ber niin a lang lo.
Police lam pawhin thuchhuah an siam ngai hial khawpin vehbur khawn an tam a. Vehbur khawn dan dik tawk lo a awm tih pawh hriat theih a ni a, thil ṭha tihna phena thil dik lo tihna remchanga lo hmangtute avang hian thil ṭha anga lang hi thil ṭha lo a ni ta fo mai a. Mipui lam pawh hetiangah hian kan fimkhur a ngai ta e.
- Lal Remtluangi