Smart City atan Aizawl
India rama khawpui 98 chu tunah hian state capital 24 telin Smart City tura buatsaih leh thlan a ni a, chumi zingah chuan Aizawl khawpui pawh telh a lo ni ta a, hei hi thil lawmawm tak a ni.
Smart City ni tur hian a sawifiahna leh a tehna tur ruahman fel tak awm lo mah sela, hetiang ni tur hian thil pawimawh hrang hrang zingah infrastructure pawimawh zual : tui thianghlim in tur te, electric supply te, sanitation te, bawlhhlawh senghawi dan ṭha leh fel te, transport service te, mi chengte him tak leh harsatna nei lova an awm theihna tur leh electronics lam hmasawnna hmang ṭangkaia inpawhna leh inzawmna ṭha neihte a huap vek mai.
Mipui hnena sawrkar hmalakna ṭha zawka puanzar te, mipui lamin sawrkara thu an thlen duh thlen theihna tura kawng awlsam leh zau zawka buatsaih te, bawlhhlawh thehthangna fel fai te, a tangkai thei ang bera ni-zung leh thli chakna hman te, lirthei chi hrang hrangte chatlak lo leh fel taka kal theih dan tur ruahman leh parking ṭha buatsaih te, kea kalna tur bik buatsaih te leh hmun awl remchang lai apiangah thing, pangpar leh phaitual hnim hmun buatsaih thlengin he smart city hmalakna hian a tinzawn leh a tum ber berte a ni dawn a ni.
Smart City atana sum hman tur tam tak hi chu sawrkar laipui hian a ruahman dawn chu a ni ngei ang. Nimahsela, tun dinhmunah chuan kan kawngpui neih zawng zawngte hi lirthei chi hrang hrangin a khat tlat a ni ber a; kan hmun awl te lah in saa hnawh khah zel kan tum bawk si. A ngaihtuahtu Urban Development & Poverty Alevation (UD&PA) Department-te tan chuan a buaithlakin a luhaithlak ve hle mai thei. He ‘Smart Cities Mission’ hi sawrkar laipui duh dan ringawta kalpui pawh ni lovin, khawpui liana cheng mipui aiawh (ULB) lam rawtna pawh la telin khawpui 100 tana Smart City buatsaihna tur hi Prime Minister, Narendra Modi-a’n June 25, 2015 khan a puang a; heta sum sen tur pawh Union Cabinet-in Central leh State sawrkar sum thawh tur bithliah siamin kum 2017 aṭanga 2022 chhunga hman theih tura tih a ni awm e.
Heng hnathawh turah hian state-in public sector company siamin CEO nghet neia thawh tur a ni ang a; chu chu PPP-mode an tih ang hian sawrkar, company leh mipui aiawhten an enkawl dawn a ni. Tin, kum 2022 aṭangin heng khawpui thlan chhuahte hian Smart City angin hma an la ang a, chung chu endik a ni ang a, a ti ṭhate chu kum 5 chhung lawmman siam sak an ni dawn a ni.
Aizawl khawpui tih hmasawnna tur hi chuan a chhunga cheng hlunte hi chu kan inhuam thui hlein a rinawm. Kan tu leh fate tan Aizawl hi chenna leh chet velna hmun nuam leh boruak thianghlim leh hmun hrisel a lo nih theih hi kan duh si a, rilru zau tak pua kan inbuatsaih a pawimawh hle dawn a ni. Khawpui mawi, nuam, fai leh thianghlim ni tur leh tlawhtu (tourist)-te’n nuam kan tih theihna’n Aizawl khawpui hi i buatsaih ang.
- C. Dorema, Khasi Veng, Kulikawn, Aizawl