Chhiatna thleng leh ngaihdan fahrah
June 16 Vanglaini Editorial-ah khan ka ha hawlh zawng tak mai a rawn ziak a, 'Chhiatna thleng leh a chhehvel' tih thupuiah a rawn hmang. Khatah khan 'harsatna leh chhiatna a thlen hian mawhpuh tur tam tak a awm thei a, vuina tur leh thinurna tur zawngtu tan pawh thil tam tak hmuh tur a awm ngei ang' a rawn ti. Mizoram hmun hrang hranga chhiatna thawm hriat tur a awm mawlh mawlh lai khan mi ṭhenkhat chuan social media kaltlangin mawhpuh tur thil tam tak an lo hmu a, an tar chhuak a ni.
Eng thil pawh thleng se, mawhpuh tur hi chu a awm zel ṭhin zawng a ni; 'Hnar hnuaiah phatna a bo lo' an tih ang deuhin, eng thilah pawh hian lungawi lohna tur thil chi hrang hrang hmuh tur a awm ṭhin. Leimin leh lei tlahniam chanchin te, tuilian leh thli tleh thuah te, mawhpuh tur hmutu tan chuan hmuh tur a awm zel ang. Social media-ah nasa takin kan tlangaupui zui a, a lehlamah chuan thil lawmawm a nih laiin, kan thil tih dan erawh a hun lo ṭhinin ka hria.
Ram pumah chhiatna thleng avanga mi tam tak an rûm a, nunna hial an chân lai leh, in leh lo hial kan chân laiin a tuartute tana hnemhnanna awm miah lo te, a ṭhen chu ngaihthlak hrehawm leh hriat nuam lo lek lek zawkte a awm a, a zia lo hle mai. Khatiang chhanna thlen chhan chi hrang hrang kha a zir tur leh hma la tur bika ruar ni lem lote thleng thleng khan kan lo inrinsiak luai luai mai a nih kha. In leh lo chân a, bungrua pawh chuh hman lote pawh, an in sak a dik lo anga ngaih theih te, luhlul chhuah tlat ang tein kan chhuah a, a tuartu ni ta ila, kan tuar vanglai takin khatiang thu khan min dêng ta se a hrehawm duh hle ang.
Sâwtna awm mang si loah, mithiam tak tak ni bawk si loin ngaihdan kan lo thawh ve vak vak hi a ṭangkai lo hle a, Mizo hnam, la mawl leh naupang tak tih âwm tawk chauh a la ni thei mai ang em tihte ka ngaihtuah rum rum phah. Tuikang nghahna leh pûma thir chhertir paha Mizoten kan thil hriat, chiang mang lo kan inhrilh sup supna boruak kha kan la kal pel thei lo a ni.
Chhiatna a thlen lai leh, party pawh sawi loa chhawmdawlna hna an thawh mup mup laia khatiang ngaihdan kan lo vawrh ve sek kha thil ṭul a ni hran lo. A sawi hunah sawi mang si lo, miin harsatna an tawh lai takin, a tuartute tana ngaihthlak nuam lo tak tak tur kan lo thehdarha kan lo sawi kha a ṭha lo hle a ni. Khatiang hunah chuan an thiam nia kan hriat emaw, an tidik lo nia kan hriat emaw dah ṭhaa midang harsatna tuarte ṭanpui kha kan ngaih pawimawh ber tur a ni a, an rilru hrehawm thawi dam kha ngaih pawimawh hmasaka kan neih tur a ni zawk.
- Lalṭhakima Hnialum