MIZO THLA HMING SIAM ṬHAT A NGAI

Kan pi leh pute aṭang tawhin Mizote hian thla hming sawi dan hi kan lo nei daih tawh a. Mahse Mizo thla hming hi sawi dan inang lo a awm nual ta mai. Pawl hrang hrang leh sumdawngten calendar an siam ṭhin a, Mizo thla hming an dah hi a inang lo nuaih mai. Kan thuziakah hian Department of Information & Public Relations (DIPR) buatsaih Mizoram Calendar 2022 te, James Dokhuma ziak Ṭawng Un Hrilhfiahna (2018) te, K. Zawla siam Mizo Pi Pute Leh An Thlahte Chanchin (2011) leh Remkunga siam Mizo Ṭawng Dictionary (1992) te sawi dan hi kan innghahna ber tur a ni.

January : DIPR siamah chuan Pawlkut thla a ti a. K. Zawla chuan Pawl kut thla a ti a. James Dokhuma'n Pawltlak thla tih leh Pawlkut thla tiin a sawi a. Remkunga'n Pawltlak thla a ti bawk.

February : DIPR leh K. Zawlate'n Ramtuk thla an ti a. James Dokhuma'n Ramtuk thla, Vahsan lak thla tiin a sawi a. Remkunga chuan Lo vah thla, Ramtuk thla a ti bawk.

March : An pali hian Vau thla tiin an sawi vek.

April : Hei pawh Ṭau thla tih bak hming dang an rawlh lo.

May : DIPR leh James Dokhumat'en Ṭomir thla an ti a. Remkunga'n Buh tuh thla, Ṭomir thla a ti thung a. K. Zawla'n Ṭomir thla, Thlakhur thla a ti bawk.

June : DIPR leh James Dokhumaten Nikir thla an ti a. Remkunga phei chuan Chawnfang thla, Hnuh kawih thla, Ni kir thla, Lalmanga nu hlawh rawih thla tiin a sawi ṭeuh a ni. K. Zawla'n Lalmanga nu hlawh rawih thla a ti a; Nikir thla a tel ve lo thung.

July : DIPR leh James Dokhumate'n Vawkhniahzawn thla an ti ve ve a. K. Zawla leh Remkungate'n Vawkhniak zawn thla an ti thung. K. Zawla'n ruah phingphisiau a tla reng a, vawk chuan a hniak a reh hman lo a ti a. James Dokhuma chuan ruahphingphisiau a tla reng ṭhin a. Khawlai a diak chiauin vawk hniak a chiar dup ṭhin a, chu vang chuan ‘vawk hniak a inzawn’ an ti a ti a. ‘Hniak’ a tih laiin thla hmingah ‘hniah’ a ti leh si. Vawkhniak zawn thla a dik zawk ti an awm laiin a ṭhenin kan pi leh pute khan vawkhniahzawn thla an ti a lawm an ti ve thung a. July thla hi inhnialna a tam thei hle a ni.

August : DIPR-in Thlazing thla a ti a. Remkungan Thiṭin thla (Fanai vuah), Mim kut thla naupang a ti a. K. Zawla chuan Thlazing thla, Rolura Mimkut thla an vuah bawk a ti.

James Dokhuma erawh chuan Thi ṭin thla a ti thung a. Mizo pi pute ngaih danah chuan mitthi thlarau hi mi nung ramah rei tak an la awmin an ring a. Mahse hemi thla (August) hian an chatuan chenna pan turin an ṭin (kal) ta ṭhin niin an ring tiin an phuah chhan a sawi a. September thla hi Mimkut thla a ti a; mitthi puala kut tiin a sawi leh si. Mitthi thlarau khawvel aṭanga an ṭin hnua mitthi pual kut lo hman hi a inrem chiah lo a ni.

I&PR chuan September 8, 2011-ah August thla – Thiṭin thla leh September – Mimkut thla chungchang symposium an buatsaih a. Chutah chuan August thla hi hmun ṭhenkhatah Thlazing an lo vuah thu sawi lan a ni a. Mizo thla hming thlak danglam thei inti lo mah se, mi nawlpui leh mi ril zawkte pawm dan a nih thu an sawi chu Mizoram Calendar-ah hian an zui ta mai em ni ang?

September : DIPR-in Mimkut thla a ti a, James Dokhuma erawh chuan Mim-kut thla tiin a karah thai phei (-) a dah thung. Remkungan Mim kut thla a tih bakah Thi ṭin thla (Lusei vuah dan) a ti bawk a. August thla a sawi dan nen a inang leh tlat. Hetiang deuh bawk hian K. Zawla pawhin Thiṭin thla tiin Remkunga ang lo deuhin a ziak zawm thung.

October : DIPR te, K. Zawla leh James Dokhumaten Khuangchawi thla an tih vek laiin Remkunga chuan Khuangchawi thla, Sahmul phah thla tiin a sawi thung.

November : DIPR te, K. Zawla leh James Dokhumate an ṭangrual a, Sahmulphah thla an ti leh vek a. Remkunga chuan Sahmulphah thla a tih bakah Buhseng thla an ti bawkin a sawi.

December : DIPR te, K. Zawla leh James Dokhumaten Pawltlak thla an ti mai a. Mahse James Dokhuma chuan January thla nen a sawi dan a inang thung a. Remkungan Buhseng thla ti chauhin a sawi a, November a sawi dan nen a inang bawk.

Kan tarlanah hian Vau thla leh Ṭau thla bak an inlungrual tlang hlei thei lo va; thla dang chu sawi dan pahnih pathum a awm zel a nih hi. Mizoram Calendar leh James Dokhumate hi August thla bak chu a inang hlawm viau mai.

DIPR leh K. Zawla hian kum khatah thla sawm pahnih an dah a. James Dokhuma chuan December leh January thla a sawi dan hi a inang a, thla sawm pakhat a dah thung a. Remkunga hian August leh September hi thla hming pakhat a hmang a, October leh November hi thla khat nge, November leh December hi thla khat zawk tih hriat thiam a har deuh a. Thla kua emaw, thla sawm emaw a awmtir thung niin a lang. Hetih lai hian ziaktu dang pakhat Tluanga Khawlhring phei chuan Pawltlak thla, Ramtuk thla, Vau thla, Ṭau thla, Ṭomir thla, Nikir thla, Vawkhniakzawn thla, Thlazing, Mimkut thla, Thiṭin thla, Khuangchawi thla, Sahmulphah thla leh Pawltlak thla tiin sawm pathum a nih thu a sawi.

Mizo thla hming chhiar dan hi thla fang awm dana sawi a ni a. Eng emaw ṭum chuan kan tunlai thla hman danah thla khata vawi hnih a det ṭum pawh a awm a. Tunlai kan calendar nen hi chuan a inmil thei chiah lo a ni.

Kan pi leh pute lo chhiar dan kha chu eng pawh lo ni se, tunah chuan khawvel ram tam zawkin an hman leh Mizote pawhin kan hman mek Gregorian Calendar zui hian Mizo hming hi phuah ṭhat a hun tawh hle a ni. Sawi dan leh ziak dan hrang hrang a awm hi a fel tawh lo hle a ni. Chuti lo chu kan hriat dan a dik lo kan intihsak reng a, inlungrual tlanna awm lovin zirlai buah kan la inzirtir reng dawn em ni? Naupang chu sawi loh puitling pawh Mizo thla hming hre kim lo kan tam viau pawh hi thil mak a ni lo. Chuvangin sorkar hian Art & Culture-in emaw bultum se, MUP te, MAL te, YMA leh a tui leh ngaihven mi mal leh pawl hrang hrangte sawm khawmin sawi hona buatsaih se. Mizo thla hming sawi dan leh ziak zawm leh zawm loh dan tur thleng hian rel fel a va hun ta ve le!

- Laldawngliana