Buaipui ngai Aizawl bawlhhlawh

Zonet chanchin­thara kan lo hmuh dan chuan, Aizawl Mayor Pu Lalrin­enga Sailo-in Aizawl khawpuiin beisei aia tam bawlhhlawh a pek chhuah avangin, Tuiriala bawlh­hawlh sawngbawlna hmunin a dawl zo tawh lo a ni a ti a. Bawlhhlawh sawngbawl dan hi Politics-a hamṭhatna duh vanga inbeihna chi a ni lo niin a sawi.

Mayor ho hian Depu­ty Mayor, Coun­cillor leh thawktuten Tuirual-a Solid Waste Management hmun hi tun hnai khan tlawhin an dinhmun a sawifiah a ni.

He thu lo chhuah chhan hi tun thla tir khan ZPM Legislature Party (ZLP) member-ten an leader Lalduh­oma, MLA hoin AMC-in an enkawl mek Tuiriala Aizawl Solid Waste Management Centre (SWMC) an tlawh a; bawlhhlawhte sâwngbàwl mumal a ni lo a, a paihna hmunin a zawh tawh loh avangin bawlhhlawhte chu luiah nawr liam ṭhin a ni tih an finfiah vang a ni.

ZPM lam sawi dan chuan district khawpui pangaah SWMC siamna atan cheng nuai 60 ṭheuh pein sorkarin hma a lâktir. ZLP Leader chuan, "Pakhat mah a la function lo a, building pawh pakhat mah a la ding lo," a ti a; chak zawka hma lak a nih loh chuan leilungin a tawrh zel dawn thu a sawi.

Lalduhoma sawi dan chuan bawlh­hlawh paihna hmun tur ni miah loah, SWMC gate luh chiah aṭanga bawlhhlawh paih nghal a ni chu a ṭha lo takzet. Kawng sirah bawlh­hlawh an chhêk mai mai a, kal harsa khawpin a awm.

Bawlhhlawh nawr liamna luikawr hian Tuirial a fin a; kan lui dunga bawlhhlawh paih lo tura min zirtirtu ber sorkar hian lui dungah bawlhhlawh a nawr liam hmiah hmiah thung si a ni awm e.

Kan thu hriat pahnih hi a inang lo viau mai. A hmuna entu pakhatin kal­phung pangngai lo lutuka bawlhhlawh paih a nih thu an sawi laiin, a enkawltu lam erawh thiam takin an insawi mam thung - an thu inhmu lo mah se Aizawlin bawhhlawh a ngah hle tih chu a chiang phawt.

AMC hian bawlh­hlawh paih dan tur chu a duang ngei a, mipui pawhin man chawiin ṭawih thei leh ṭawih thei lo paih ni kan nei ta. A paihna hmun tur pawh nasa taka sawngbawl leh hmalak a ni tih chu a hriat theih.

Mahse, ṭawih thei leh thei lo pawh hi kan la thliar fel chiah lo, a chhan chu paih kawp theih ni a la awm tlat! Tuirial lama kal ṭhin chuan mitin kan hmu bawk ang - AMC lam insawifiahna ang hi chu a ni vak lo. Tun hma lama hal khuk luih luih ṭhin ang kha chu awm tawh chiah lo mah se bawhhlawh hi a let neih nuaih mai a, felfai taka sawngbawl a la ni tlat lo.

AMC tan bawlh­hlawh chinfel hi hna pawimawh ber a nih loh pawhin an mawhphurhna sang tak a ni ngei mai. Mihring nuai 5 vel lek bawlhhlawh pawh chingfel thei lo nih hi a zahthlak a ni. India ram khawpui dangte nena han in khaikhin pawhin Aizawl hian bawlhhlawh hi kan ngah uchuakin a rinawm hran loh hle.

Chuvangin Aizawl khaw­pui enkawltu AMC hian a rang lamin bawlh­hlawh hi a sawngbawl fel a ngai a ni. Tun term chauh a ni lo, tun hma aṭanga an buaipui tawh a ni a, thawk leh khata fel duak thei ni lo mah se hun chu an nei tam tawk viau tawh - a rang thei ang berin bawlh­hlawh paih leh enzui hna hi thawk teh se.

- Puitea, Aizawl