Sample lak dan leh testing tih hun hi

Mizoram Covid-19 Testing list DIPR-in Health Dept record a chhawpchhuah kha a felfai loh ang angin Sample lak dan leh testing tih hun hi a pawimawh em avang­in han thai lang teh ang. 

1. CDC chuan Swab sample hi 2°- 8° celcius-ah dah tur a ti a. Ni 3 (72 hrs) aia hmaah test tur a ti bawk a. Ni 3 aia a rei chuan -70° vela vawt­ah dah tawh tur a ni. A chhan chu Virus hi a host (mihring) atanga lak hran a nih tawh chuan a thih vat theih vang a ni.

Health dept. data-ah khan Hnahthial leh Mamit­a mi sample ṭhen­khat kha chu April-a sample lak June thlaa test chauh nia inziak a awm a. Thla hnih chuang test lova dahṭhat a nih chuan a sample quality a tla hniam hle ang (date computer-a enter sual ni se a duhawm hle mai). Siaha lam pawh ni 8 ni 9 hnu (transport hun chhung belhin) vela test chauh anga langte pawh kha a tlai mah mah a ni. DIPR aṭanga information an pek chhuahah khan sample recieve tawh la test loh (backlog) a tam tihte a ni leh zel bawk si. Testing accuracy an hawn theih avangin sample transport dan leh stock dan enquire vat a ṭha khawp ang. Ni khata swab sample lak tam lam tur pawh test theih zat azirin ruahmanna siam ni se a 

ṭha hle ang.

2. Swab sample lakna hi Nasopharyngeal (hnarkua/Nasal Swab) Oropharyngeal (throat/Throat Swab) a awm a. 

A pahnih (NS & TS) aṭanga sample lak ve ve hi duhthusam a ni a, mahse chi khat chauha lak a nih dawn chuan virus detect that theih zawkna Nasal Swab hi tih zawk tur tiin CDC chuan a recommend a ni.

Data-a a lan dan chuan a tir lam test huk hma khan Nasopharyngeal (NS) hman a ni ve char char a, mahse May thla tawp lam test huk hnuah kha chuan Throat Swab a ni ta char char a. Hmun tlem teah a pahnih aṭanga sample lak a lo awm leh zeuh a. A zahve aia tam daih chu Throat Swab tih a ni ta a ni. A accurate lo zawk a ngaih aṭanga sample lak a ni nasa hian false negative result a tam phah thei ngei ang.

Rawtna leh thu belh:

Khatianga data fel lo kha chu tumah in an la zirchiang lo tih a hriat a, zirchianna neih ni tawh se chuan percentage lak theih talin siam rem a ni tawhin a rinawm. Serial number aṭangin a dik lo nghal a, Date format tihsual a tam em em a. Blank leh Co­lumn dik loa ziah (address ziahna tura throat swab tih ziah ang chi) a tam. Heng vang hian a nihna tak a enfel hleih theih loh ta a ni. Zirchian a nih loh chuan kan dinhmun dik tak engtin nge kan hriat theih ang?

Sample lak dan leh lak a nih aṭanga ZMC-a thawn (transport) a nih dan thlengin a pawimawh em avangin enfiah a ṭha khawp ang. Data-ah sample lak hun hi dah tel ni thei bawk se.

Data a felfai loh em avangin a ṭhen chu thil thleng tak tak ni loin data enter sual vang pawh a ni thei. Siamṭhat leh vat a nih loh chuan sawifiahna siam vat a ṭha khawp ang.Mipui min tichiai hman hle a ni.