ENGVANGIN NGE KOHHRAN PÂWL HRANG AWM A TUL?

Mi ṭhenkhatin "Kristian ṭheuh ṭheuh si, engatinge pâwl hrang hranga kan awm, kohhran hrang hrang awm hi a ṭul em ni hmun khatah a awmkhawm vek theih loh em ni, etc. etc." an ti ṭhin. Kohhran chanchin aṭangin kohhran pâwl a pian chhoh dan i bih thuak thuak teh ang.

Isua ringtu leh zuitute hian khawvel kan dâp chhuak a, khawvela Kristian mi tluklehdingawn 2 chuangte hi kohhran pawl hrang hrang sâng engemaw zatah kan inṭhendarh hlawm a. Chung zingah chua Pentocostal te, Lutheran tih te, Baptist tih te, Apostolic tih te, Methodist tih te, Prostestant, Presbyterian, etc. tihte leh pawl tam takah kan insem darh hlawm a ni. America ramah ringawt khuan Kristian pâwl hi chi hrang 200 chuang an awm a, khawvel pumpuiah phei chuan Kristian pawl hi chi hrang 45,000 chuang an awm niin helam zir chiangtu pakhat Center for the Study of Global Christianity chuan a sawi.

Dinhmun, tlákna leilung, chi leh vun rawng, hnam zia leh khawsak inan loh avangtein kohhran tiak tir aṭangin Kristian pawl chi hrang hi a piang nghal tiin a sawi theih a. United Kingdom-a Oxford University-a an Professor Diarmaid MacCulloch-a chuan Kristian pawl pakhat chauh hi a awm ngai lo hrim hrim niin a sawi.

Kohhran ṭiaktir leh hmasa kha kan en chuan leh, Isua rawngbawlna aṭanga a hnu kum zabi 4-na thleng khan han en let ila, chu chu AD 27-325 inkar chhung khan kohhran chu a memberte awmna leilung (geography) danglam avangin pawl hrang hrangah a inthen/ awm hrang sa nghal hrim hrim tawh a. Hei hi a chhan pakhat chua an Pathian biak dan danglam avang te, an chenna hmun leh an hnam tihdan inan loh vang te a ni ber niin Bruce Gordon-a Yale Divinity School-a kohhran chanchin zirtirtu Professor chuan a sawi.

Kristiante leh kohhran chanchin kan en chuan inṭhenna lian tham tak tak a lo awm tawh ṭhin tih chiang takin kan hmu thei a. Kum zabi linaah khan Arias-a zirtirna avangin kohhran zingah ngaih dan inang lo a lo piang tawh a, Isua leh Pa Pathian inlaichianna thuah pawm dan inan loh avangin kohhran an lo phel phah tawh a. Arias-a hi Alexandria khuaa Egypt puithiam a ni a, ani hian Isua Krista kha Pathian aia hnuaihnung deuh, Pathian aia tê deuh zawk leh thuneihna pawh nei tlem deuh zawk angin a zirtir a, Pathian a ni chiah lo ve a ti a ni ber. Mahse hetih huanlaia Kohhran Pate zinga mi, Alexandria khaw bishop Athanasias-a khan chu chu hnialin Isua chu Pathian ngei a nih thu a rawn sawi ve thung a. Chutianga inhnialna leh ngaih dan inan lohna chuan kohhranah inṭhenna a siam a, hei hi Yale University-a hmanlai Kristiante chanchin zirtu Christopher West-a chuan Rom ram awp chhunga kohhran inṭhenna lian tham ber niin a sawi nghe nghe.

Christopher-a chuan he thil avang hian Rom ram awp chhunga Kristiante chu pawl hnihah he ngaih dan hian a then phawk niin a sawi.

Tichuan, kohhran inkhawmpui lianin a chinfel ngai khawpin boruak a awm chho ta a. Nicea Inkhawmpui AD 325-a neih chuan Isua chu Pathian famkim a nih thu a rawn pawm a, Atias-a zirtirna chu zirtirna dik lo tiin a hnawl ta a. Mahse an inhnial chu a tawp mai loh avangin a hnu kum engemawzatah Constantinopole Inkhawmpuiah an nemnghet nawn leh hial nghe nghe a ni.

Kum 1054 khan khawchhak kohhran leh khawthlang kohhran chu an inthen phawk a. Khawchhak kkohhran chu Eastern Orthodox Kristian tih an ni a, khawthlang kohhran chu Roman Catholic Kohhran tih an ni bawk a. Hei hi kohhran chanchinah chuan kohhran inthenna lian tham leh chhinchhiah tlak, 'The Great Schism' an tih chu a ni zui ta nghe nghe. Heng Kohhran lian pahnihte hi sakramen chungchangah an ngaih dan a inrem thei lo va. Khawthlang Roman Kohhranin puithiamte dinhmun a dah pawimawh tial tial a, Pope phei chu thuneihna sang ber pek a duh laiin khawchhak kohhran Eastern Orthodox erawh chuan a pawmpui ve thei lo va. Chuvang chuan an inthen ta phuk mai a ni.

Tichuan, khawthlang kohhran Roman Catholic chhungah pawh hun lokal zelah inthenna a awm zui zel a, chu chu Westernn Schism an ti a, kum 1378 khan Pope thuneihna (Papal authority) chungchangah ngaih dan a inang ta lo va, thenkhatin Pope thuneihna chu mi pahnih emaw, pathum emaw chungah nghah nise an duh laiin, thenkhat erawh chuan mi pakhat (Pope) chungah chauh dah an duh thung a, chumi avang chuan inthenna a lo awm leh ta a ni. He inthenna hian kum 40 zet a awm a tichuan kum 1417-ah an inrem leh thei ta chauh a ni.

Kum 1517 ah Roman Catholic chhungah siamthat duhtu pâwl (protestant) an lo chhuak a. Martin Luthera te, Zwingli-a te, Johan Calvin-a te an lo chhuak a. Martin Lutheran Wittenberg Kohhran Biak Ina kawngkharpui a Roman Cathiolic kohhran kal sualna poin 95 zet (The 95 Theses) a tarchhuah chuan khawinghal bu a tâwn darh a. Kohhran siamthatna a lo chhuak ta a ni. Heta tang hian reformed kohhran pawh a lo piang chho zui ta zel a. He Protestant kohhran aṭang hian kohhran pawl hrang hrang- Presbyterian, Baptist, etc. an lo piang chho ta zawih zawih a.
Tuna kohhran pawl (denomination) tia kan hriat lar tak hi hi kum zabi 17-na hunlai aṭanga lo chhuak leh hman tan niin Michelle Sanchez-i, Havard Divinity School-a an professor chuan a sawi. Protestant ho chuan Bible chu Roman Catholic beih nan an hmang a, mitinin Bible an chhiar thei tur a ni an ti a, hetih hunlai hian Roman Kohhran erawh chuan Bible hi mipui vantlang hman an khap a, sakhaw puithiamte chauhin an nei tur a ni an ti thung a. Bible pawm danah te, sakramen chungchangah te, kohhran kalphungah te an ngaih dan a inang lo hle.

Kohhran chanchin kan chhiar chuan hetiang hian kohhran inthenna leh, kohhran pawl kan tih hi a lo piang a, ngaih dan leh pawm dan inan loh avang te, chenna hmun leh culture inan loh avang te, leh chhan hrang hrang avangin Kristian pawl hrang hrang a lo piang ta a ni. Hetiang hian Kristiante hi pawl hrang hrangah awm mah ila, kan biak Pathian erawh chu pakhat a ni a, kristian pawl hrang hrangte hi 'Kristian' tih thumal hian min phuarkhawm a. Kohhran pawl pakhat leh hming pakhat chauh hnuaiah chuan khawvela Kristian zawng zawng kan awm khawm thei lo tih a chiang a. Mahse Kristian kan nihna hmangin kan inphuarkhawm a, kohhran inpumkhatna (ecumenism) kan tih pawhin kohhran pawl pakhata awmkhawm lam ai mahin hmun hrang leh pawl hranga awmte inpumkhatna 'Unity in Diversity' ang zawngin kalpui a ni ta zel zawk a.

Chung kohhran pawl hrang hrang phuarkhawmtu pawl pawimawh tak tak WCC te, CWM te, CCA te, NCC te, NEICC etc. a lo piang ta zel a ni.
Kan chenna hmun inana loh vang te, chi leh vun rawng avang te, hnamzia leh tihdan phung inan loh avang te, khawsak danglam vang te, pawm dan leh hriat dan inan loh avang te leh chhan hrang hrang avangin kohhran pawl hranga awm hi a tulna chin a awm. Thendarh chu pun lehzualna tih ang deuhin kohhran pawl hrang hranga awm hian rawngbawltu chherna kawngah te, mi hmantlak khawrhchhuahna kawngahte tangkaina tam tak a nei ve a. Kohhran pâwl hrang hrang leh Kristian pâwl hrang hranga kan awm hian min tipung a, Kristian ang zawng pawhin kan pun chak phah ti ial a sual lutuk awm lo ve. Isua leh a rawngbawl hna aia kohhran pawl thila buai lutuk leh pawl nihna lák bing lutuk erawh a tha ber lem lovang a. Kohhran pawla buai lem lo hian tha takin Pathian rawng hi a bawl theih a ni. Mahse, chuti chung chuan kohhran chanchin kal tawh en hian kohhran pâwl hrang hranga inthen darh hi a tulna chin erawh a awm ve a. Heng hi min thendarhtu anga saiw theih a nih laiin kan inpumkhatna tak tak erawh chu Kristaah zawk a ni.

Tunlaiin mi tam takin kohhran pawla awm hi a tul lem lo ve, mahni pawh hian ringtu tha tak a nih theih, inkhawm te, Biak Ina kal kher lo pawhin Pathian a biakpawh theih tih changchawiin kohhran ngaihnepna leh kohhran hmuh sir he deuhna an nei nasa hle. Hei hi a pawi takzet a. Kohhran hi (eng pawl pawh nise) Pathianin leia amah ringtute awmkhawmna tura Isua ngeiin a din a ni tih hi kan hriat reng a pawimawh. Kohhran pawn lam hi chu a him lo va, an kal thui poh leh an bo thui mai thin.

Tunhnaiah Pu Lalnghinglova Hmar (Tete-a) in KTP inkhawma a thusawi, kohhran pawnlamah tel vena tur remchang tam tak lo insehmur tuam tuam karah hian Kristian thalaite chu "Dar riknaah zel inkhawm" tura sawi kha thenkhat chuan an helh viau mai a, social media lamah pawh chhanglet deuh titiha post siam an awm nual a. Hei hi ngaihtuah chian a ngai khawp mai. Hei hian tunlaia kan rilru puthmang himlo tak, kohhran pawn lama, kohhran tel lova Kristian nih duhna thinlung kan put thûk tawhzia a lantir. A hlimawm leh a nuam apiang te, a hahdam leh kan rilru mil zawng chauha Pathian biak kan duh ta deuh zel niin a lang. Hlim kan tum lutukna lamah kan biak Pathian theihnghilh thaka mahni lam intuituah a hlauhawm ta hial a nih hi. 

Kohhran tel lova Kristian nih kan chák tawh avanga hetiang ngaih dan leh kohhrana tui lohna thinlung hi lo irchhhuah a ni ber awm e, hetiang hi kan ram kohhran chanchin kal tawhah vawi tam tak kan lo tawng tawh a, kohhran aṭangin an chhuak a, zirtirna dik lo leh him lo an din deuh zel a. A him lo kan ti mawlh mawlh a, mahse zalen taka Kristian nih kan chák tlat a, kohhranah hian chêp tlatin kan inhria a, hei hi kan thatpui ang nge, kan chhiatpui ang...i lo thlir zel teh ang.

- Rev PC Nghaklianmawia