A LO PÂR PÂWL RIAI

Kan ṭhianpain, “Hmanni chu kawng siamna hmun kan paltlang a, an labour zingah khan ka ṭhianpa, kan lehkha zirpui ṭhin hi a phei­khawk leh kekawr tlânga alkatra kâi deuh nian nuan hian ka hmu a. Thingtuai, a hmâwra thing phek vuah hian an thil siam chu a lo hawlh hlauh hlauh mai a. A bul maiah chuan hna viltu ni ngêi tur, fâi tak tak pathum hi an lo ding ṭhâm a, an lo kâwk kual a.

Ka ṭhianpa nêna kan han inhmu chu kan inbe ta luam a. Chuta mak ka tih ber mai chu: ka ṭhianpa leh hna lo viltu mi pathum kha hnathawktute zinga an hotute vek, JE vek zuk ni a! tiin mak a tih thu min rawn hrilh a. An hna chu a inang vek a, an thawh a inang lo a, a mak a ti.

Hna sâng tak chelh, an thawh sawi tur awm mang si lo kan ngah. Chûng mite chuan an hna an chhuang mai thei, an thawh erawh chhuan tur an nei lo. Intilal apiang an fâi a, a taima apiang an bâl ṭhin. Thufingte-in, “Taima apiangin thû an nei ang a, thatchhiate erawh chu chhiahhlawh an ni ang,” tih hi keini chhûng tan chuan a dik lo; kawmthlangte (phaitual) tan chuan a dik mahna. Mihring hian lal kan châk, hna kan duh; thawh kan duh lo, hlawh kan duh.

Kan sawi tâkte aṭang khian a thawk ve lote khi ka dem dâwn emaw in ti mai thei, an dinhmunah ding ila a kâwk tur pawh kan awm kher lo ang; chuvang chuan, kan dem lo ang. Thu ṭha deuh chu miin an ziak ṭhin a, kan chhiar a, ṭha kan ti ṭhin. Biak inah pawh thu ṭha an sawi ṭhin a, ṭha kan ti thei lutuk; inkhâwm bângte pawh hian “A va sawi ṭha em!” an ti sap sap ṭhin asin. Mahse, mihring hian a ṭha kâra ṭha lo hi a hmuh hmaih thiam lo a, a mit vârna lam tak a ni.

Westworld TV series-a a changtunu Dolores-i’n, “Some people choose to see the ugliness in this world, the disarray; but i choose to see the beauty,” a tih ang deuhin, mi pathum khi sawisel paha sermon thûm dup dup châkawm viau mah se, evangelist-te anga mi hrîn hrep hnua kal leh daih remchang hle mah se, mi pakhat fak tlaka awm hi i fak hlauh ang u. A sawisel lam chu thiam an tam êm mai. In sawisel vangin tlu tawh an tho leh a ni thei e, infak vang erawh chuan miin tlâng pawh a sawn thei.

Intihlal hi mihring zia a ni a, lal lal lâi pawhin tu tu emaw chu an intilal thei lutuk, khawtlang tân phurrit an tling. Lal sual tak an awm a, an khawnbawl pawh intivei tak an awm ṭhin; kan Mizo love story-ah te pawh chutiang mi chu an lang ṭhin. Hmanlai mite thlah kan ni a, kan intilal hi a mak lo; chutiang kâra hetiang mi fel an lo la awm zêl erawh malsawmna liau liau a ni. Kan vanneihna hi i chhiar thiam ang u.

- Rempuia R. Lûtmâng