Vala nena kan thawhdun lai ni te kha

March 6, 2017 a min boral san ta Pu S.R.Vala, I.A.S vuina inkhawma tel ve thei lovin, vawiin ni thlenga a nupui Lalchhungi pawh ral thei lovin keima lamah harsatna ka nei ve a. Ka rilru-ah erawh chuan Vala hi nitin a lang ṭhin. Amah ka hriatrengna ti thartu, kan thawh ho laia kan thil tihdun ṭhenkhat ka han ziak chhuak teh ang.

Kum 71 chhung zet Assam chhunga District pakhat mai ni ve ṭhin, Mizoram chu 1972 kumah Assam aṭanga chhuakin Union Territory a dah kan ni a. Council of Ministers leh MLA-te nei ve-in Home Ministry aiawh Lt. Governor-in min ho a. Kan Chief Secretary hmasa ber chu R.M. Agarwal, I.A.S a ni.

Kei pawh 1972 May thla-ah Delhi a Industrial Development Ministry a ka awmna aṭangin Mizorama thawk turin ka lo chhuak ve a. Hun rei lo te hnuah Vala pawh a awmna ṭhin Orissa State aṭangin Mizoram U.T a thawk turin a lo chhuak a. Tin, Police lamah Pu F. Lalremsiama I.P.S a lo chhuak bawk a. Hun engemaw chhung chu keini pathum hi Mizoram

aṭanga All India Service mi, Mizoram U.T a thawk ve te kan ni rih a. Kei chu Finance leh Revenue Secretary hna min chelhtir a; Secretary to Chief Minister a nih bakah Vala'n Department ṭhenkhat a enkawl a. Rema chu Mizoram pumpui tan Superintendent of Police a ni. Mizoram U.T inthlan hmasa berah Mizo Union Party-in sorkarna a chang a, Pu Ch. Chhunga kan Chief Minister hmasa ber a ni.

Mizo National Front te 1966 March thla tira Mizoram Independence puanga ram hnuaia rawlrala an luh tak avangin Mizoram chu sorkarin rambuaiah a puang a. Sipai kutah thuneihna sang tak hlan a ni. A bikin thingtlang mi rethei zawkten sipai kut an tuar nasa.

Kan Chief Minister Pu Chhunga kha mi dik leh huaisen tak, mahni thawhpuite venghim a ṭan tlat mi a ni a. Vala nen hian nitin thawk dun an ni a, keiniho pawh min uap hneh hle ṭhin. Hei hi remchan nan la in mahni Mizopuite chhan tumna lamah kan huang pawn te pawh kan dai hial ṭhin. Zankhat chu Chaltlang nula fel tak, an in chhak kawngpuia a kal lai sipai motor lianin a su hlum a. Rema (SP) nen ṭhalai thinrim ho zingah tek lut ve-in, varṭianah Lt. Governor (LG) in (Raj Niwas) ah kan tlan thla a. Ni pawh a chhuah hma-in kan Lt. Governor pawh chu kan kaihthawhtir a. A nin thinrim lovin min lo dawngsawng thiam a, thil tisualtu sipaite hi man chhuak a, an thiltih phu tawka hrem an nih ngei nan hma la turin kan zu nawr chiam a. Vala leh kan Chief Minister ṭhatna denchhen hian kei lek phei chu ka kal thui mah mah ṭhin.

Mizo National Army Maj. Kapchhunga, Capt. Lalthlana, Lt. Rohnuna leh midangte pawh kan awmna ina kan riah ruk tir chang a awm fo. An thawhpuite Aizawla thi an awmin ka nupui Pi Hmingthangi'n an ruang puan a khuh loh an awm ngai lo; capt. Lalhleia chenin. Amaherawhchu, heng ram hnuai mite hnenah hian Mizoram Independence a theih loh tur thu leh India sorkar nen an hotute inbe tura an nawr a ṭulzia thu bak sorkar tan thil pawi thei kan sawipui ngai lo.

Underground Kornel Haleluia pawh kan Assembly Speaker Pu Vaivenga'n a in luah laiah shelter a lo pe ve bawk niin. Sipai-in an lo hria a, Col. Haleluia hi an man ta ngei a. Kan Lt. Governor chu a thin a rim em em mai a. Vaivenga chu man (arrest) tur a ti a. Kan Chief Minister Pu Chhunga Delhi zin lo haw chuan Governor hnenah- ‘Vaivenga kha Haleluia lo kawl turin ka hrilh a nih kha, ka thu zawma ti a ni. I duh a nih chuan keimah hi min arrest rawh le,' tiin a vau let ta mai. Pu Chhunga hian Pu Vaia hi Haleluia shelter pe turin a hrilh awzawng lo; a mite thlavang hauh tur chuan amahin mawh a la mai a ni.

Vala leh Pu Chhunga thawh dun lai thlir let chang hian Pu C. Pahlira thu mi hrilh ka hre chhuak ṭhin. Mizo District Council a Executive Member a nih laiin Pu Hlira hian Aizawl veng hrang hrang inkal pawhna tur motor kawng tam tak a duang a. Mi tam tak inhmun leh ram sut tlang tur a ni a, phunnawina a tam a. Pu Hlira hekna hi Party hotu Pu Chhunga hnen a thleng tam hle. Pu Chhunga chuan eng dang sawi lovin hektute hnenah, 'in thu sawi chu ka hria. Mahse Pahlira kha keiman ka tihtir a nih kha', tiin Pu Hlira chu a lo chhan ṭhin; a tih tir ni hauh si lovin.

Pu Chhunga leh Vala inkawp dun hian Mizoram leh Cachar ramri fel lo hi an vei ber pakhat a ni ṭhin a. He thu hi Prime Minister hnena thlen phawt an rel thlu a. Hetiang thil a chinchang hria leh mi fel tak Rev. Zairema, Pu Bawnthanga Poonte leh Pu C.L Ruala te nen Pu Vala ho hian he thu hi vawi tam tak kan sawi hova. Record awm leh hmuh theih ang rawnin Prime Minister hnena thlen tur memorandum chu Pu Vala'n a buatsaih ta a. He memorandum-ah hian Cachar leh Mizoram ri dik tak nia kan ngaih sawifiahin, ramri thu hi min chin fel sak turin Prime Minister hnenah hian ngenna kan siam a ni. He thilah hian Vala a ṭangkai em em a ni.

Non-Tribal Trading Regulation hi Mizoram U.T kan nih tirh laia kan thu buaipui khirh tak pakhat a ni leh a. Keini hnam tlem, hnam hnufual, ram kilkhawra awm, India mimir nena nunphung leh khawsak dan pawh inang lo lutukte hi kawng hrang hranga nek chep leh chimral kan nih mai loh nan India Constitution siamtu leh ram hruaituten, kan in hmuhalh a, kan invenhimna turin dan te min duan sak a. Chumi kawnga kan invenhim nan Constitution fundamental right te pawh an pawt fan hial a ni.

Chimral leh nek chep lutuk kan nih loh nana dan min siamsak pakhat chu Constitution a 6th Schedule-ah hian a awm: 6th Schedule para 10 na hi a ni. He para 10 na hian Mizoram chhunga tribalte tih loh, non-tribal ten sumdawn leh moneylending an tih control-na dan siam theihna District Council kutah a pe a. Chu thuneihna hmang chuan Lushai Hills District (Trading by Non-Tribals) Regulation, 1953 siam a ni ta a. He Regulation Section 3 ah chuan District Council-in license a pekte tan lo chuan non-tribal te tan sumdawn ve phal a ni lo. (He para 10 hi 1988 ah amend hret a ni).

Trade license an pekte zingah Lala Sadra a tel ve a. Ani license hi District Council-in a cancel sak leh a. Ani hi High Court a zual kovin, chuta thiam a chan loh hnuah Supreme Court-ah a thlen a. Supreme Court-in thiam a chan tir a. Court chuan Trading Regulation Section 3 hi hnawlin a paihthla. (Hre chiang duh tan Lala Harachand Sadra vs Mizo District Council AIR 1967 SC 289).

Ram buai dawn leh buai lai kan nih vang pawh a ni ang, kan District Council chuan Supreme Court duh dan zul zui deuh hian Trading Regulation Amendment emaw, Regulation thar emaw an lo siam ta si lova. Dan awm lo, dan thi tawh chu kum 7 chhung zet kan lo hmang zui ve mai a lo ni reng a.

Mizoram chu U.T kan lo nih hnu lawkah Mizo District, Council chu ṭhiat (dissolve) a ni a. Council Dissolution Order 29th April 1972 para 8 naah chuan, District Council-in dan a lo siam tawh reng reng hemi April 29, 1972 nia dan hmanlai leh dinglai zawng zawng chu Mizoram U.T ah dan dinglai chhawm nun zel tura tih a ni - siamṭhat leh tihdanglam a nih hma chuan.

Mizoram chu 1972 a U.T kan lo nih ve hnu lawkah Lala Sadra te hian Lungleia sumdawn theihna Trade license an han dil ve leh ngat a. Revenue Secretary ka nihna angin an dilna hi hnawl a ni. A nin kan Lt. Governor hnena zualkovin Supreme Court order copy a han pe a. Lt. Governor hian mi ko a, Court order copy, a awm tih pawh kan la hriat ve loh chu mi pe a, chutah kan phek buai ta a ni. Chief Minister hnen kan thlen nghal vat a, he thu hi engtia kalpui zel tur nge ni ang tiin Vala nen Law Secretary Amit Sarkara nen kan inrawn a. Chief Minister kan rawn hnuah Trading Regulation hi Supreme Court duhdan zulzui a kan Assembly-a amendment siam mai ni se tih a thu tlukna siam a ni ta a.

Ngun thluka kan Law Secretary-in Trading Regulation Amendment Bill a buatsaih chu Chief Secretary leh Lt. Governor a thleng chho a. Annin min ko khawm a, he dan hi amendment siam theih a ni lo. Dan thi tawh, District Council Dissolution Order 1972 a dan dinglai, nung rih zel tura tih zinga chhiar tel a ni lo. He dan Regulation a section 3 hi a lairil, a innghahna, lak hran theih loh, severable a ni lo, an ti ta tlat a. Dan thi tawh chu amend theih a ni lo an tih tak tlat avangin kan hneh ta lo a ni.

District Council aṭanga U.T han nih a, Chief Minister, Council of Minister leh MLA-te han neih chuan kan pui ve ta hle in kan inhria a. Mahse kawng

ṭhenkhatah District Council thuneihna te kha remchanna zawk a lo awm a. Mizoram U.T chuan Constitution Schedule 7 na State list hnuaia subject an sawi-ah te chuan dan siam theihna a nei ve vek a. Chutah chuan entry 26 naah Trade and Commerce a tel a. Mahse Indian Constitution Article 304 ah chuan State huam chhunga sumdawn theihna khuahkhirhna dan state sorkarin a siam tum reng rengte chu Assembly-a Bill put luh a nih hma-in India President sanction lak ngei ngei tur tih a ni tlat mai a. Hetiang thil awmdan hi Vala nen kan Chief Minister hnenah kan hrilhfiah a.

Ani Chief Minister chuan, 'Delhi-ah i kal ang, insiam rawh u, keiman ka ti fel ang', a ti ta. Ama ho chuan Delhi kan thleng thla a. Mi pawimawh hmuh tur zawng zawng Chief Minister hian min hmuhpui vek a. Trading Regulation, President sanction sa nen lo chuan kan haw leh thei lovang tiin a nawr a. Chawlhkar thum zet Delhi cham a, nitin kan Bill chu Home Ministry a kan buaipui ve hnuah President sanction la fel nghal vekin kan haw pui ve ta a ni.

He dan thar siam tur hi kum 10 chhung nung tur, chuta renew leh ṭhin ngai a ni a. Home Ministry a thawkten min beng dai ve a, `Induhsakna bik dan reng rengte hi - Tribal-te tana Parliament leh State Legislative Assembly a seat reserve na Article 330, 332 a mite ngei pawh hi, a tirah chuan kum 10 chhung atan tih a ni, a ṭul anga extend leh mai ṭhin a ni a', tiin an sawifiah a. Tichuan, kan hawpui ve ta a ni.

He dan thar Mizoram (Non-Tribal Trading) Regulation Act 1974, Legislative Assembly-in 1974 a a pass a ni a. Mahse kan Chief Secretary leh Lt. Governor-ten min tuipui loh lutuk vang ni ta berin ka hria a, a Rules siam fel nan kum 3 hun a duh a. Chuvangin 1977 ah he dan hi hman ṭan a ni ta chauh a.

He dan nun chhung kum 10 chu 1987 ah a lo ral dawn ta a. A hmangtu Revenue Department leh Law Department pawhin an lo mangnghilh a ni ang, a hunah Assembly-ah renew a ni ta lova. Hetih hun lai hian MNF Party an sorkar a, keimah ngei pawh Chief Secretary ka nih lai a ni. Kan thiam lo tlang a ni ta ber.

Non-Tribal te Mizorama an sumdawn ve theihna dan chu a lo lapse ta si a. Dan thar a aiawh siam a la ni ta lovin a lang a. Mizote kan lo changkang ve ta a, kan rama non-tribal te sumdawn ve na khuahkhirh hi a hun tawh love kan ti a nih loh chuan, Trading Regulation neih leh hi a ngai niin a lang. Famkim leh felfai tawk lo tak ni mahse Home Ministry-in min siampui ngei, President sanction lak hnu tawh 1974 Act a awm ta kha Bill thar a siam leh a, President sanction thar dil leh mai hi a kawnghmang a ni mai em?

He subject pawimawh tak ngaihtuah ve chang hian Vala leh Pu Ch. Chhunga kha rilru-ah an thar leh ṭhin.

Lalkhama