Child Labour titawp tura Khawvel huapa Naupangte humhim

June ni 12 hi ‘World Day against Child Labour’ a ni a, khawvel huapa naupangte dik lo taka hnathawk tura chhawrna laka an him theihna turin International Labour Organisation (ILO) chuan hemi ni denchhena thupui a siam chu ‘Universal Social Protection to end Child Labour’ tih a ni.

Social Protection tih awmzia chu khawtlanga harsatna chitin reng lakah mipui an him theihna tura sorkarin ruahmanna leh chhawmdawlna a siam te hi a ni. Khawtlanga harsatna tih hian a huam zau hle a, a huam chin ṭhenkhat chu an mamawh pek loh te, enkawl ṭhat loh te, intluktlanlohna te, retheihna te, chaklohna te, damlohna te, rualbanlohna te, hrisellohna te, hmuhsitna leh thinhrikna te, zirna lama harsatna te, hleihlenna leh khuaikhemna te leh kawng hrang hranga dik lo taka chhawrna te hi an ni.

Heng harsatna lakah hian naupangte hian chanvo an nei vek a, an chanvo ti hlawhtling tur hian khawvel ram hrang hrang intelkhawmten thuthlung engemaw zatah in pe in, an thawk ho ṭhin a ni. Heng aṭang hian ram hrang hrangin an ram Dan azirin an ramah hma an lo la ve ṭhin a. India pawh hi heng thuthlung inpeknaah hian kan tel ve a ni.

India hi welfare state a ni a, mipui ṭanpui turin sorakr hian mawhphurna a in pe a ni. Dan Pui ril rem zawngin mipuite tan chawmdawlna programme hrang hrang a siam a, a bik takin naupangte an him theihna turin dan, policy leh programme te a lo siam ṭhin a ni. A lar zual deuhte chu Integrated Child Deve­lopment Scheme (ICDS) leh Integrated Child Protection Scheme, Juvenile Justice (Care and Protection of Children) Amendment Act 2021, Protection of Children against Sexual Offenses (Amendment) Act 2019, The Commission for Protection of Child Rights Act 2006, The Prohibition of Child Marriage Act 2006, Immoral Traffic Prevention Act 1956 leh Child Labour (Prohibition and Regulation) Act 1986 te hi an ni.

Heng bakah hian nau­pangte ṭanpuina leh chhawm­dawlna chi hrang hrang pawh a awm a, hetiang ang programme hrang hrang hi bawhzui a thawh ṭhat chuan dik lo taka naupang chhawrna hi tih tawp theih a nih a rinawm.

Mizoramah hian kum 1991 census-ah chuan naupang hnathawk 16411 an awm a, kum 2001 ah 26265 an awm bawk a ni. Kum 2011 census chuan naupang hnathawk 2793 an awm a ti a ni. An thawh chhan te hi retheihna vang te, chhungkaw keh darh vang te, school kai loh vang te, nu leh pa inṭhen/ boral vang te, chhungten an tih luih vang te a ni tlangpui. An thawhna hmun te hi an seilenna atan boruak ṭha lo tak takte a ni ṭhin. Heng naupangte hi sorkar leh khawtlanga pawl hrang hrang te hian dan anga Social Protection chanvo an neih a hi pek an ni nge ni lo tih hi zawhna pawimawh tak chu a ni.

International Labour Organisation 2020-22 Report chuan khawtlanga harsatna chi hrang hrang awm te lakah hian naupangte hi humhimna ṭha an dawng lo em em a, khawvel huapah naupang 26.4% te chiahin humhimna an hmu a ti a ni. Ram tinin naupangte humhimna atan a sum leh pai a sen hi a tlem em em a, GDP ah 1.1% chiah a awh tih a ni.

Sorkar leh khawtlang te hian tih tur hmabak tam tak kan la neiin a rinawm a, naupangte him tur chuan an tana hamṭhatna programme awm ang ang te hi thiam takin khairual a ngai a, a hlawk thei ang bera an hman theihna turin hma kan lak ṭheuh a ngai a ni.

- Henry Zodinliana Pachuau, Phd Associate Professor, Department of Social Work, Mizoram University