Compensation beisei vanga in sa tih kha

Ni 15.3.2017 a Mizo­ram Assembly budget session a chief minister-in Aizawl-Tuipang kawng laih chungchanga compen­sation beisei vanga in sa an tam a tih kha ‘compensation hnam kan ni’ tihte nen khan an in unau hnai riauin ka hria!

Kan khuaa he kawng laihin a tihchhiat tur nia in ngaiten zangna­dawmna dawng leh ṭeuh dawn pawh ni se in sak leh hrim hrim kha an huphurh leh an peih tawh loh zawkzia ngaihtuahin zangnadawmna beisei vanga in lo sa thar duh hi Mizoram hmun dangah pawh an tam chu rin a harsa deuh! Chu bakah, zangnadawmna beisei vang chuan in chu lo sa thar ta hlawm pawh nise a petu tur lamte hian an in hlutna kha chhut chhuah sakin a phu tawk aia tam zangnadawmna an dawng kher awm si loa an hlawk viau lo mai thei!

Khawvel ram hruai­tu ropui leh hlawhtling tak takte leh he kan chenna khawvel siam ṭhatute hi chuan thim chhah tak piaha eng chu hmuin chu eng chu mipuite min hruai thlen theih nan theihtawp an chhuah ṭhin. Chu hmun kan thlen theih nan chuan keimahni leh keimahni kan inhmuh dan hi a dik a ngai hle a; keimahni leh keimahni kan inhmuh dan dik tur chuan ram hruaituten mawh an phur sang hle bawk.

Kohhrana rawng­bawltu leh thuhriltute pawh hian a chhe lam sawi uar lutukna lamah a ṭha lam hmuh kan a, mi ṭha pangngai tan pawha kan chhe ta vek emaw tih mai tur khawpa a ṭha lo lam sawi tam hi a mak a, kan fimkhur deuh a ṭha awm e. Chutiang bawkin chanchinbu a thuziak ṭhinte pawh hian kan ram natna kan ziak a nih pawn, a damdawi kan ziah tel zel a ṭha ang. Social media-a thu post ṭhinte pawhin a chhe lam uar lutuk loin a ṭha lam kan tarlan tel tam a ṭul viau bawk awm e.

Mi dik leh rinawm, thil thianghlim lo chu ti duh loa dik taka thil tiduh mi he ram hian ṭha­hnem tak a la neih laia mi tlemte, awm ṭha duh lote avanga a hnam ang zawnga inhmer kan chin chhun­zawm zel chuan thim piaha eng chu thleng loin thimah kan cham chhunzawm zel ang.

Chu eng chu thleng tur chuan a chunga kan han tarlan bakah hian nu leh paten kan fate kan enkawl dan leh zirtirtuten kan naupangte kan enkawl danahte pawh hian a thim zawnga thil thlir ṭhintu an nih loh a, a eng zawnga anmahni leh midang, kan ram hi an thlir theih nana ṭan an lak a ngai viau bawk awm e.

- V. Lalchhanhima, Chhiahtlang