SIM THEIH THIL

Kan sawrkar hian sum a nei lo a; mahse, a thawkate hi chuan sum an ngah râp. Kan sawrkar hian thawh chhuah a nei lo a; sawrkar hnathawkte hlawh chhuah erawh a tam ve det. Sawrkar hnathawkah chuan kan intodelh ve chiang; mahse, ṭhenkhat chu kuhva leiah bâk an intir leh mang si lo. Kan sawrkar a rethei, sawrkar hnathawk an hausa - a letling tlat nia!

Sawrkar hnathawk an hausak chuan kohhran a hausa; kohhran a hausak chuan a lo lian mai, a len na na na chuan a lal pawh a lal nge nge. Kan inkhawm bang pawh motor kalna dâl rana kal chîng kan tam mai. A huhoa kal dûl dûl kan nih bâkah inkhawm bang kan ni kher bawk sia, a nuam riau asin. Chutiang bawk chuan ram pum huap inkhawmpuia rik lui lui, khawtlang tibuai thama pun khâwm deuh luih luih hi ropui kan ti; inkhawmpui taka hi ka sawi tum ber a ni, tuna kan tih ṭhin dan hi sim chi.

Mahse, inkhawm­pui chu a nuam si a, sim daih atan chuan a pamhmai kan ti ang. Tih dan dang a awm thei, mi tinin mahni puanthuah bakah mahni bûk tur (tent) pâi ṭheuh se, Hmuifang tlângah te, Sialsuk tlangah te, khawi khawiah emaw a inkhawmpui theih reng. A kal thei thei kal mai tur a ni ang; mahni intodelh sâ thlapa kal a ngai dawn a nih chu, ringtute tih tur dik tak ni zâwk âwm tak pawh a ni.

Khaw chhung mi leh an hna thawh tibuai loin, mi dang tan rokhawlhna siam loin hmun fianrialah ropui taka inkhawmpui mup mup hi zir a hun. Tuna kan kal dan hi chuan sumin min zo mah se kan hmun neihin min zo lo, sim chi.

Ram rethei, sawrkar hnathawk leh sumdawng hlawh­tlingte bâk mi khawsa thei an awm lohna ramah hian khawtlang tibuai zâwnga zik hut hut hi a zahthlak. Mahni ei leh in tur bâkah pawnthuah kan intum vek thei, a thlengtu lam tan mikhual eng anga tam pawh thlen kan cho zek zek vek mai, a boruak hi a nuam êm mai a, kan cho harh vek; mahse, chutiang ringawt a ni lo, mahni dinhmun chauh inen tur a ni lo, an hna ṭhulhin mi tam tak an buai phah, thawh chhuah nei mang si loin, mahni hna tlansan zawngin mi eng emaw zat an buai ṭhin; hetiang zâwnga tih hi sim chi chu a ni.

Kan hlawh hmuh­na ber, kan hna lama kan sulhnu en chuan nâwizêl tih ṭawngkam a lo lang a, kan hlawh hman ralna lam en erawh chuan khawvel kan chhîng ve leh lawi si; a in-balance lo. A bûk rit lo tur lamin lêi a si rûn a, a pawimawh zâwk a kâng reng mai.

Sawrkar hnathawk heti zat kan awm a, sawrkar thawh chhuah sawi tur alawi kan nei lo; chutih laia a program dang sawi tur kan nei ṭha em em mai te hi a letling hû nia! Hmeichhe Inkhawmpui Lian vanga ziak emaw min ti; a ni lo, ka ziahna a rei tawh.

- Rempuia R. Lûtmang