Zoṭawng: Kan rêl hi thu nge thil

Ro kan rêl tih mai âwm tak, thu kan rêl ti tlat an awm, ṭhalai zingah an intihmuh a ni ang. ‘Ro’ chu eng nge kan hriat loh vâng a ni thei a, a awmzia tih chian tum vâng pawh a ni thei.

Ro chu eng nge kan hre lo; ropui, rorum leh rothap tiha ro nen hian inang tak maw? A awmzia hriat tâk loh kan ngah; malsawm tiha mal leh sawm pawh hi a awmzia kan hre lo; Kristian kan nih hmain malsawm tih ṭawngkam kan nei em tih pawh kan hre chuang lo. Ro an rêl hian thil an sawi ho a, thu an titlu; lal lal lai pawhin lal leh khawnbawl upate’n ro an rêl.

Hman deuh khan "Zawhna ka lo zawt thei ang che ang em?" tih hi a dik lo; "Thû ka lo zawt thei ang che ang em?" tih tur an ti a. ‘Ro rêl’ tih aia ‘thu rêl’ tih a dika kan hriat ang bawkin ‘thu zawh’ pawh a dik bîka hriatna a awm. Zawhna zawh a rem loh rau rau chuan ‘thil’ a inzawh chi ber ang. Thil zawh duh che ka nei, thil ka hrilh duh che, te kan ti ṭhin. Eng thil nge in rel a? Eng thil mah kan rêl chhuak lo e, te pawh kan ti.

Ṭawngkamah erawh chuan, “Eng thu maw nge i ziah le? Eng thu nge in sawi ser ser ni?” tiin ‘thû’ chu kan zep thlazen thei tho; “In committee chuan eng thu maw in rêl a?” te pawh kan ti thei, a dik vek mai. Sawi chi leh ziah chi chu ‘thu’ vek a ni miau a. Thawnthu kan ziak a, chu chu thu a ni; “Thu ka ziak” kan ti kher zêl em? Notice board-ah hriattirna kan târ a, chu pawh thû bawk; “Thu kan tar” kan ti ngâi em? Miin lehkhabu a buatsaih a, a chhunga awm chu thû a ni; “Thu a bûin a siam” an ti lo ti rawh u? Ro kan rêl a, chu pawh thû bawk! Ro kan rêl hian thil tih dan tur te, thil chin fel dan tur te kan rêl. Thû chu a hranpaa rêl a awm lo. Hetah, court lamah thû ni lo, thubuai te an rêl ṭhin. Kan rêl hi thil a ni ber; Pathian thil rêl dan te kan ti, chung zawng zawng chu a ngiala ngana kan lâk chuan ‘thû’ vek a ni; thû a nih vek vanga thû hman zawk zêl erawh tih danphung a ni hmel loh.

Pawl 11 Mizo zir­lai­bûah a inzawmin ‘Thurêlte’ tih a chuang kiau kuau; ziah zawm loh zâwk kan chai mêk laiin hetah chuan an ziah zawm ta duah mai. Ro emaw, thu emaw, thil emaw pawh ni se, a inzawm loin - ro rêl, thu rêl, thil rêl tih a dik; chu chu noun leh verb a ni. Bible (O.V.)-ah chuan ‘ro rêl’ tih tlêm azawng a awm, ‘rorel’ tia ziah a tam hle thung. Bible (O.V.)-ah vêk ‘englo rimtui’ tih pawh hi ‘thil rimtui’ tih tur a ni, adjective-in a zui hian ‘thil’ kan hmang tlangpui. Thû tluk zetin thil hian a huam zau.

- Rempuia R. Lûtmâng