HEI HI A NI MIZORAM POLITICS CHU!

Alice Lieu ziah, Vietnamese film pakhat, a film hming tak pawh ka hriat loh hi ka en a. English subtitle fiah lo zet hian a awm a. Ka en tui ta phian a. A tawpah phei chuan ka hnukte a tiulh deuh roh.

Chuta a changtupa chu Cao Nhu Ngoc a ni. Chhungkaw harsa tak an ni a. Hrileng avangin a nu leh pain an boralsan a. A piin a enkawl a. Lehkha thiamthei tak a ni hlauh a, high school pawh tha takin a zo a. Zirna sang zawka kal duh mahse an dinhmunin a zir si lo a. Vanneihthlak tak maiin an khuaah chuan UN Resident Coordinator in Vietnam Pratibha Mehta a lo kal lai nen innang fuhin chumi puihnain an khua Cam Thanh Eco Village (Hoi An) aṭangin The City for Peace an tih Vietnam khawpui Hanoi lamah inhlawh paha lehkha zir tur chuan a kal ta a.

Hanoi khawpui faifemah in a luah ta a. Hanoi khawpui chawitu Red River Delta lui kamah te chuan engthawl takin hmalam beiseina hlimawm tak nen a leng a, nuam a ti em em ṭhin. A pi chu a hnena awm turin a hruai a. Tlaia a haw apiangin a pi chu Sangha te, Thei tuihnai takte a hawnsak a, nuam an ti em em.

Lehkha a thiam thei bawka nuam a ti hle. Lehkha zir pahin lirthei (2wheeler) khalhin a inhlawh a. Chutah chuan a passenger nula pakhat hmel duh a nei chho a. An induh chho ta viau. A bialnu chu nightclub ah a zai ṭhin a. A zai zawhah a va hruai leh mai ṭhin. Zan khat chu a bialnu leh chu nightclub-a an manager inchhawng Varandah-a engmah vengthawng lo leka an awmdun lai a hmu ta mai a.

Lehkha a zir thei loa, a lirthei khalh a tui thei hek lo. Final exam ah result a chhuak a, a hming a hmu zo ta lo a. Chutih laiin amah enkawltu a pi chu khawlaia a lennaah a tlu a, damdawiin miin an lo hruai a, damdawiin a va thlen chuan a pi chu a boral a ni zui deuh nghal bawk. A nun chu a rum tak meuh.

A bialnu lah a awmna chin a hre tawh lo a, a ngaihven duh bik ta lo a. Ni khat chu amah hire-tu passenger-in hriamhrei hmanga vaubetin a bike a tlanbopui ta daih a. Mahse a ṭhianpa, a lirthei khalhpui zarah an hmu leh hlauh a.

TUNGHIA College zirlai hmeichhe hmelṭha zet nen an intawng leh a, mahse chumi pawh chuan amah hruaitu ngaihzawng deuh hi a rukin a lo nei leh a. Chumi nen chuan nau an lo pai hial a. Rilru na takin a bansan a ngai leh zui a. Rilru hah chhawk nan a vawi khatnan a ṭhianpa nen Bar-ah tualchhung zu an in ta a, an pawr hle. A hmalam hun a ngaihtuah a zu erawh a in zui chuang lo.

Hanoi People's Council-a Chairman of People's Committee nen an inchhar chhuak hlauh mai a. College kal chhung zawnga hruai thei turin an intiamkam ta hial a. Chupa chuan Ngoc chu hna hrang hrangah amah pui turin a chhawr zui ta zel a. Council-a Chairman nena an chanchin chu Nguyen Van An chuan lo hriain a va zawng chhuak a. Amah pui turin a ngen a. Council Chairman-in a ṭha a lawm a tih avangin a zui ta a.

Nguyen Van An kut ke ber a ni chho ta. An thawk dun chu an che ṭha bawk a, mipui lawm leh ngaihven an hlawh hle. Nguyen Van An chuan a chetvel dan leh a chet dan turte ruahman turin engkim mai chu Cao Nhu Ngoc kutah a dah vek a ni ber.

Mipui hnena thusawi tur te, mipui nena inthlunzawm dan tur te, khawpui kawtthler thianghlimna lam te, Drugs tawlh ruk dan chah theih dan te, mihring hmanga sumdawnna tih rem leh thingtlang kuthnathawktute hriselna lam hawia hmalak dan tur leh zirtirna pek dan turte chu nasa takin an kalpui ta a.

An che ṭha bawk a. National Assembly of Vietnam (Thirteenth National Assembly)-ah Nguyen Van An chu Chairman of the National Assembly a ni chho ta luah mai a ni. A hmai pawh a uang hle. Chutah tak chuan Cao Nhu Ngoc chu hlamchhiah a lo ni chho ta thung a ni. A thawhrimna leh atangkaina te, hlawhtlinna chang tura a beih nasatziate mangnghilh a ni chho a.

A pu Nguyen Van An nupui chuan milian zawk leh ama unau lamte tan kawngka zau zawk hawnsakin an dinhmun sanna chu miliante thlunzawmna atan leh unaute duhsakna atan a hmang ta a. Chhuanlam holam tak siamin Nguyen Van An tana kawngsattu ber Cao Nhu Ngoc chu kut bengin an inhransan ta a. Beidawng takin a pi thlan lungrem chungah chuan ṭah ngaihna pawh hre lo, ṭah chhan tur pawh hre lo khawpin Cao Nhu Ngoc chu rilru pik takin a ṭhu a. A nun chu a en a, mihring damlai zingah nge a awm mumang ramah a cheng tihte a ngaihtuah a. A hringnun chu khawi aṭanga bul ṭan leh tur nge, engti anga bul ṭan tur nge tih a hrethiam tawh lo.

Tlipna

Hmanrua atan leh kan tana ṭangkai turin midang kan mamawh a, kan duh a, kan phut ṭhin. Duhsakna dawn leh pek hunah erawh kan tana ṭangkaina nei lo milian leh thiltitheite an lo ni leh ṭhin. Mirethei leh tlachhamte chu nasa tak leh rim taka chhawra tlemte pek an duh a, an tana cheng 10 pek harsa an tih em em laiin an mamawh laia ṭangkaina nei lo lal leh milian, mihausa leh thiltitheite tan cheng nuai tam tak pe phal khawpin kan inhawng leh duh lawi si.

Mi rethei leh tlachham tirhkah atan, lalna an duh leh beisei hmuh hnua mi harsa leh hniam zawkte thlauhthlak hi thil kalphung a ni a. Milian, hausa leh lalte erawh chu nuamtawla ruaiṭhehpui turin! Kan neih a heka a heu lohna chinah chiah ṭanpuina leh hmangaihna pawh kan rek bung ṭhin. A lian leh titheiten lalna, thuneihna leh chanvo ṭha apiang an pute ro ang maiin an ta emaw an ti tawh a. Tu ma' chuhpui theih lohah an ngai tawh. Politics siamṭhat changchawia Kohhran nghenchhana Politics-a tel ve pawh an danglamna hmuh a ni chuang loa. Duhvezela an ni zui zel bawk si.

Hei hi a ni Mizo Kristiante khawvela thleng ve mek tho chu!

- C. Lalrochhara