Kan ram tak hi chu aw ENGTIA TIH CHI NGE NI TA ANG LE..?

1. Mizo chu ṭhian chhan thih ngam, sâ leh râl hmaa zam ngai lo hnam kan ni tiin kan in fak hle ṭhin.

Kan tlangmi pui Naga ten eng hmanraw hmang pawha ram zauh an tum laiin keini ve chuan kan thlahtute humhalh chin nei let turin, dan chak tawh lo zet ṭanchhan tur kan dap a. Kan inhriat ríl siak a, ziak meuha kan pawm tawh hnu pawh mipui rilrem zawngin Cabinet thu pass hmangin lem kan chang kual mek thung.

2. Mi huaisen thlah kal zel kan nih lang lo lekin hman deuha kan IR battalion te Chattisgarh state kal tur kha mittui nen lungchhe vankaiin kan thlah tawh a. A ṭhen kal ngam loh vanga ngaih awlin voluntary pension an dil chul bawk. Hetiang deuh bawk hian Corona Virus kai ZMC lama enkawl tura ruat, sawrkar doctor lah kha chhungpuinu leh naupang lungchhe hmel nen meuh kan thlah liam bawk.

Mizote hi Chanchinṭha eng hian hnam dawizepah min chhuah ta a ni thei em? Mahni khua leh Lal tan rinawm, zahawm taka nun chan huam ṭhin kha eng kan ti zo ta nge? Hetiang hnam hi tunhma zawng khan kan nih ngai loh kha mawle!

3. Ram hmangaih vanga nun thap hiala bei ṭhintu leh thil dang zawng aia politics luhchilha ram tana inpe ten hei chen kan ram an hruai hnu pawh a, state dang CM kan la awh reng thuah te hian, mipui lam thawpika kan awm laiin ram hruaitu lam an la hlim phian mai bawk si te hi a mangan thlak a ni.

Tuna kan sawrkar hrawn mek hian, ramdang mau leh rua min chin tira mipui min chawikan a tum a ni awm e. A tira an sawi dan chuan, kum 5 hnuah a thar thei ang tih a ni. A hralh theih hma zawng hian a chingtu khan thlatin Rs 4000/- (a thawh man) a hmu dawn niin sawi a ni bawk. He thil hi chawm bawk, hawp bawk tih ang mai a nih dawn avangin, a Bible ṭawngkam chuan, Mosia awm tura hlawh neia a nu rawih ang mai; tiin sawifiah a ni

Mahse, tuna kan awm dan chu, Zuntè-Nu, ka siam ang che i ti si a, lungngaihna hlir.... tih ang mai a ni.

Mizo upa in, Zângkhua hian bungbut hun a nei ṭhin, an tih te hi a dik ta lo em ni dawn le... Nge kan ko thla anga kan kuai bungbu chawp zawk dawn le?

- Vanlalhuma Kawlni