'HARH R'U, AW HNAM ROPUITE U, Râlin Zion an thleng tawh asin!
"Nangni chhandam fate tho r'u,
Hruaitu Krista bêlte chu;
Harh r'u, aw, hnam ropuite u,
Râlin Zion an thlen hma hian."
(KHB 398)
Kan sa tui a, kan tuipui a, kan lâmpui a, kan sa nawn leh ṭhin! Tûn hnaiah he hla kan sak apiang hian ka thinlungah turtu, nawrtu leh min awm hle hletir thei lotu a awm a, ka rilru a hmanhmawh a, "Harh r'u, harh r'u, aw hnam ropuite u, Râlin Zion an thleng tawh a nia!" tia au vak vak tak ka nâp a, tih ngaihna vak ka hre si lo!
Râl khêl dâr ka vaw dâwn!
Kan ram hi ka han thlir a, ka nâ a, 'Lalpa phei chu a va na dâwn êm!' tiin ka ngaihtuah a. Kan hla sakah râlin Zion an la thleng lo emaw kan tih laiin, kan Zoram 'Zion' hi râlin an rawn thleng tawh mai ni lovin, kan pindan chhungril ber thlengin min luhchilh a, min rawk bawrh bawrh a, keini chhandam fate lah chu kan harh thei der si lo va! Kan lamṭang leh kan ram veng him tûra kan ngaih tam takte lah chu kan hmêlma leh râl lama ṭang an lo ni reng zâwk leh ta nghâl a!
Kan ram politics 'Zion' chu râlin an la dêr tawh
Kan hmêlma pa Diabola leh a hote chuan kan ramin 'politics' hming kan hriat tirh phat aṭangin, a fatu ber nih tumin an rawn chuh nghâl a, tûnah phei chuan neitu chan changin an inti thu êm êm tawh a nih hi! Dâwt tinrênga min bumin, ram rorêlna chu Pathian ta pawh ni lo, Pathian mite tâna inrawlh vena chi loh, sual engkim pal zamna leh kut tling lova sum siamna hmun niin min ngaihtir tawh a. Ram leh hnam damna vei pha lovin Party polititics-in min dawi â a, duhâmnain min tuihâltir a, sum thianghlim lo hmangin min hrai rui mêk a ni! Harh r'u, aw, hnam puipate u!
Kan ram ṭhalaiten suam an tâwk mek!
Thlânmualah mipa ṭhalai thlân a tam bîkin a va pung sâwt êm! Hmeithai leh pa nei lote kan va ngah sâwt ve! Eng kan ti ta nge ni le? Kan hnam innghahna tûr ber ṭhalaite an liam zêl chuan, he hnam hmabâk hi a êng lua lo vang! Sawi tam ngai lovin kan ṭhalaite thih hma chhan kan hre vek! Harh r'u, aw Zofate u!
Kan hnam lungphûm a nghîng
Dikna, rinawmna, taihmakna, huaisenna, tlâwmngaihna, midangte tâna malsâwmna nih duhna thinlung, Mizo hnamin a lo pian chhuahpui leh hnam lungphum hlu tak chu, duhâmna leh mahni hmasialnaten kan mit tidelin, sum bawlhhlawh hmangin kan hralh mêk a nih hi! Harh r'u, aw, hnam ropuite u!
Thlarau mite kan rau ral mai dâwn em ni?
Kan ram tlûk chhiat nasatzia pawh hmu phak lo leh, ram rorêlna dik lo vei pha lo khawpa 'rau' hi kan va la tam êm! Politics thil te chu tisa lutuk leh kohhran rawngbawltute tâna sawi ṭûl lo tlata hriate avâng hian, kan hmêlma Setana tân bum kan nuam êm êm a! Ram thim hi tuipui râlah chauh ni lovin, kan khawtlângah leh kan ṭhenawm hnaiah a lo awm tawh reng a, heng hmuna thawk tûr 'missionary' kan mamawh tawh a ni tih hre lo kohhran hruaitute kan la tam hle mai! "I duh zâwng vâna an tih angin, leia miin ti rawh se," tia ṭawngṭai ṭhin, Lalpa kohhrante u, harh rawh u!
MAHSE, KAN ZÂM LO!
Beidawnthlâk lek lek dinhmunah ding rih mah ila, kan zâm lo! Kan tho chhuak leh dâwn! A chhan chu:
1. Hnehtu Pathian kan nei: Kan hmêlma pa, lâwm mai suh! Tlu mah ila, kan tho leh ang! 'Pathian kan lama a ṭan chuan, tuin nge min do thei ang?'
2. Baal hmaa ṭhingṭhi ngai lo,Mizo ṭhalaite an la tam: Gideon-an mi 300 lek hmanga hmêlma tam lutuk a hneh ang khân, Lalpa chakna ringin hêng kan ṭhalaite hian ram an la tung ding dâwn!
3. Lalpa mi hriatte an la tam; Kan ram tlu chhe mêk, a chhiat vek lohna tûra tûn thlenga Lalpa kut vuan tlattute, Lalpa mi hriatte avângin he hnam hi Lalpa ropui nan a la vul leh ang! "Amaha lan hun apiangah ropuiin kan lang ve ang"!
Harh r'u, aw, hnam ropuite u! Râlin 'Zion' an thleng tawh a nia!
- Dr. Ramdinthara Sailo