YMA a ṭha zawng zelin
Tukin chu Vanglaini chanchin buah CYMA OB nilai leh lo ni tawh, la dam remchangte nena an thlalak ka hmu a, ka lung a leng deuh.
1996 khan 'YMA in hmalam pan turin hnung tawlh hret a ngai' tih Vanglaini chanchinbuah hian ka ziak a. Khang lai hun aṭang khan YMA khan a chhung leh pawn lam aṭanga beihna tlem tlem a tawk a ang. Hruaitu ni turin "Ani hi a ṭha ang" tih ṭhin kha "Kei hi ka ṭha ang" tih hri tlem tlem awm khan pan chhia anga YMA a tih awngrawp hlauhna kha ka neih deuh tlat vang leh Sorkarin kutke pawimawha YMA a hman duhna khan tuamdam har hri engemaw YMA in a vei hlauhna ka neih deuh vanga ziak ka ni.
Chung hri chuan YMA chamchilh rei lovin, tluang takin a kal leh ta ti phawt mai ang. A chhan chu, 'Kei hi min vote ula' tih vanga tling an lo awm a nih pawhin, chung mite chuan phur leh inpe zo leh ṭhahnemngai takin YMA an hruai ṭhin. Tin, Sorkarin YMA a rin ngam zel avangin, YMA chu rintlak niin a lang zel rih tlat.
Khang CYMA inthlan sawi neuh neuh chu thawnthu hlui a nih hnuah, 'Tunlai thil awmzia, social media ten an vawrh chhuah zingah CYMA hruaitu nih chu Sorkar leh dik chiah lo, hlawk sia sumdawngte nena inthlunzawm ang dawn dawn a ngaih theih viai viai a awm a. Hei zet chu ka YMA thinlung hian a awih phal lova, ka ring thei meuh lo a ni. "Tak tak a ni lovang" ti phawt mai teh ang.
Hun hmasa lam deuh tawh aṭang khan central lama hruaitu ṭhenkhat "Party politics kawng sahkuak nana YMA a bul ṭan" awm anga sawi ri chuan chawei a titui lo pha deuh a.
Hemi chungchang hi awmhmun aṭang leh ka chian chiah loh te midang phon hmanga ka hriatnate nen han sawi ka duh chu. Central YMA OB te leh hruaitu dang langsar te, MLA emaw, Minister hial nite pawh, Central YMA OB/ hruaitu langsar an nih laia Politics rimnam chiah lo, an riruah Party ṭan lam nei an nih pawhin YMA chakna chu political party hamṭhatna atan hmang awm reng ka hre lo.
"I hre tlem a nih chu" min tih chuan ka ṭang ṭun lo. Ka hriat chian leh ka sawi angin ka chian chiah loh, mi rintlak nia ka ngaihte sawidan pawh la hial ka nia. Hemi thil chauh lo pawh hi finfiahna awm lo ang chi hi chu social media lamah pawh fimkhur a ngai hle.
Engpawhnise, YMA hian a kawngpui rap pelha a kal loh nan, a tih dik tawk loh a awm a nih chuan hrilh a, thurawnte pein, kan hnam min ṭhuikhawmtu YMA hi telna tlak ni zel turin ṭan i la ang u.
Sawiseltute sawi hi a dik a nih phei chuan hruaitute pawhin he pawl thianghlim hi zah leh dik taka hruai turin rilru thar pu hram hram se kan va ti em...
- H.Zoliana