Sipai officer-ah tang rawh
Hman deuh khan Indian Airforce-a Squadron Leader Pu H. Lalrisanga khan kan ṭhalaite nula leh tlangvalte chona (challenge) atan awareness campaign ṭha tak mai a siam, chanchinbu a chhuah ka lo chhiar a. A ṭhain a bengvar thlak hle mai a, kan ṭhalaiten eng angin nge an bawhzui tih erawh chu anmahni thu ni se, khami thu chhunzawm nan kei Indian Army Havildar pawl 3 pass chauhin ka hriat ang tlem kan ṭhalaite tan kan ziak ve a ni.
India ram state 29 leh UT 7 zingah lehkha thiam tehna 91.58% is the third highest in the country kan ni a, lehkha thiam tamna state ni si defence service-ah leh All India Civil Service-ah kan hniamin kan va tlem si em!?
Tunah hian Defence Services Armed Forces Branch 3 - Army, Navy leh Indian Airforce Branch 3-ah hian officer 40 chauh kan nei a, training lai 3 an awm. Hei hi kan hmeichhiate Military Nursing Service (MNS) te nen vek kan ni. Indian Navy-ah phei chuan officer pakhatmah kan awm lo, Indian Airforce-ah Squadron Leader 1 leh Flight Lt. 3 chauh kan nei. Hetihlai hian defence service-a kan neih lal ber (sang ber) Lt. Col. 4 (pali) kan nei:- Lt. Col. Lalhmingthanga, Lt. Col. Ngurduhsanga Sailo leh Lt. Col. Isaac Lalremruata Sailo, Lt. Col. Abraham Lalchhana te an ni; an chhuanawm khawp mai. Hei hi tuna zofate dinhmun dik tak chu a ni a, kan ropui lem lo, lehkhathiam ram ni si enga ti nge ni le?
Hetih lai hian kan ram ṭhenawm Assam-ah chuan Airforce lal tak Air Marshall an awm a, Manipur state-ah chuan Army officer lal tak Meitei hnam Lt. General, kan Governor Rank ang an nei a, Jammu-ah khuan Corps Commander-in a awm. Officer dang hmeichhia leh mipa 100 chuang an awm a, kan tlangmi pui hmeichhia Assam Riffles Unit-ah sipai doctor an awm thluah bawk, mi chuan hna sang tak thawk turin hrehawm an tuar peih tlat a ni.
Indian Coast Guard (ICG) ah hian vai nula officer 100 chuang an awm a, Indian Airforce Unit Branch hrang hrangah hian hmeichhe officer 100 chuang an awm a ni. Heng vai nulate hian mipate zingah Airforce Officer Academy Dundigal, Hyderabad-ah te, Jalahali, Bengaluru-ah te an training a, passing out parade an neih zawh chuan India President, Supreme Commander chuan All India Officer Class-I nihna a pe (conferred) nghal.
Flying together...
Hnam dang vai nulate chuan mipa zingah officer training academy-ah an pass chhuak a, thlawhtheihna an khalh cher cher mai.
Tunah hian Govt. of India, Ministry of Defence chuan hmeichhiate a hlauhawm leh chak chi, Fighter Pilot nih a phal ta a. Airforce Academy, Jalahali, Bangaluru aṭangin nula pathum chuan pilot an pass chhuak tawh a, India President-in ni 18.6.2016 khan a conferred a ni. Chung mite chu : Flight Lt. Bhagwani Kanth, Flight Lt. Advani Chaturvedi, Flight Lt. Mohona Singh te an ni. Mi hnam nulate chuan S.U-30 te, MIG-27 te an khalh cher cher tawh bik mai dawn a nia.
Kan sawi tak angin kan ṭhalaiten defence services a lut tur chuan UPSC-in hriattirna kum khata vawi hnih a chhuah ṭhin leh, Employment news lo thleng ṭhin hi ngaihven tur a ni.
Civil service lam
Kan tarlan tak angin lehkhathiam tehnaah 91.58% lai kan ni ve a, hetih lai hian All India Civil Services-ah chuan kan hniam hle mai a, kan kang ṭep a ni. UPSC-in All India Civil Service Exam a buatsaih 2015 ah khan Mizorama cheng zofate pakhatmah kan in ziak tling ve lo a. Manipur lama kan zofate erawh mi 4 lai nulate nen an inziak tling a, an chhuanawm hle a ni. Engatinge hetiang dinhmun sang hi kan chan ve theih loh, kan ṭhalai lehkha thiamten ṭan kan lak a va ngai em.
UPSC 2015 exam result lo chhuakah khan Delhi College naran Shriram College-a lut Nl. Debi, kum 22 mi chauh khan a vawi khat exam naah pakhatna a ni mai kha a va ropuiin a va chhuanawm tak em! Kan ṭhalaite Mizoram pawn India ram khawpui lian ber berah lehkha zirin mi tam tak an awm a, engatinge Civil Service-ah leh Defence Service-ah te hian kan va hniam em em ve? Defence service-ah phei chuan kum 20 lo la kal leh turah Brigadier kei tur kan awm lo, kan ropui lem lo viau a nia. Kan ṭhalaiten kan ram leh hnam tan ṭan kan lak a va ngai em.
- Hav. P. Liankhuma (Rtd.), Kanan Veng, Aizawl