Bible leh Politics

KṬP General Conference vawi 59-na hman zawh a nih ruala kan sawi zui nasat ber chu, Speaker Revd Chuauṭhuama thusawi kha a ni awm e. Hei hian a entir chu - inkhawpui lian hlawhtling takin Pathian zarah hman zawh a ni tih hi. Kan ram sorkar kalphung hi siamṭhat a ṭul tawhzia lanna pakhat pawh a ni bawk awm e.

Kristian te leh Politics
Khawvela Kristian tamtak hian tun hma aṭangin Kohhran hi politics ah hian inrawlh ve lo tur a ngaihna lian tak a nei a, kan inrawlh hreh hle ṭhin bawk.

Mizoramah pawh Kohhran Upa, Pastor Pen­sion adt te Politics khawvel a an luh hian mipui rilru hi a dam zan lo thin a, kan ram inrelbawlna chu Politician lo ni tawh sa te kutah kan dah ṭhin.

Tin, Rom 13-ah khan roreltute hi Pathian ruat an nih thu leh an thu thu a awm tur a tih kan nih thu kan hmu a, chuvang te pawh chuan a ni maithei – Kohhran hian kan ram hruaitute langsar taka sawisel hi kan ti em em lo a, sorkar hi kan nawr ngai lem lo bawk. Mahse bawih ang maia roreltu dik lo te laka kun tur hian Pathianin min ko lo tih kan hriat a ṭul awm e.

Charles Finney, evange­list ropui tak chuan kum 1800 velah daih tawh khan Kohhran hi politics-ah thil dik tak ti turin kut a thawh tur a ni tiin a sawi a. Politics chu rawngbawlna peng pakhat anga ngaih tur a nih thu leh, Pathian hnena ramin malsawmna leh anchhia a dawnna tur pawh hi Kohhrante’n ram rolrel­naah an inrawlh dan dik leh dik loah a innghat a ni tiin a sawi a, a dik hle awm e.

Thuthlung Hlui leh Politics
Politics hrim hrimah hian Pathian hi a inrawlh thukin a inrawlh hma hle a. Exodus atang daih tawhin Pathianin Mosia hnenah Israel mipuite kaihruai turin dan (Thusawm Pek) a pe tih kan hre awm e. Tin, Numbers-ah te pawh an aiawh thlang turin Pathianin Israel fate rem a ruatsak tih kan hmu a ni. Lalte buah hian rorletu tha leh sual inkar hlatzia chu kan hre thei ang a, rorletu tha loin ram leh hnam a tihchhiat nasat zia kan hmu ang. Zawlnei Nehemia te, Amosa te leh Mika te pawh kha ram leh hnam inrelbawlna tha awm tura Zawlnei hna thawk an ni. Josepha leh Daniela te pawh ram inrelbawlnaah chanvo pawimawh tak an chelh a ni tih kan hre awm e.

Lal Isua leh Politics
Thuthlung Thar lamah pawh Lal Isua rawngbawlna kan hmu a, chu chu sap tawngin ‘Holistic Ministry’ an ti a. A awmzia ber chu Lal Isua hian thlarau chauh chhandamna ni loin rilru taksa, ram leh hnam tana chhandamna thlen turin khawvelah a lo kal a ni. Chuvangin Lal Isua hnungzuitu keini Kristiante hian ram inrelbawlna – politics-ah hian tihtur leh mawphurhna kan nei a ni. Matthaia 5:13 ah Lal Isua’n lei chi kan nih thu min hrilh a. Hei hian a sawi tum pakhat chu kohhran rawngbawlnaah chauh nilo kan khawtlang leh ram tan pawh a mi tangkai ni turin min duh a ni tiin ESV Global Study Bible chuan a sawi.

Politics hi Kristian kan nih avangin kan pumpelh thei lo a. Chu chu Tirhkoh Paula pawh khan a lo hre chiang em em a. Timothea hnena lehkha a thawn vawi khatna 2:1-2 ah pawh khan lal ber leh thuneitu zawng zawng pawh tawngtaisak turin min chah a nih kha. Sorkar hi diktaka a kal chuan khawvelah hian Pathian ram hlimthla hi a din thei a ni.

Vawiina kan ram dinhmun
Kristian kan nih anga kan mawhphurhna hi kan ram rorelnaah hian kan hlen tha tawk lo tih chu a hrechiang ber tu te kan nih a rinawm. Kan ram hruaitu te leh a thlangtu mipuite hi Politics khawvelah hian Kristian kan nihna hi a bo ta daih emaw tih turin kan khawsa thin a, a pawi hle. Ram leh hnam tana roreltu nih hi Pathian ruat leh Pathian rawngbawlna a ni tih kan hriat chian a ngai takzet a ni.

Kristian ram kan nih angin Pathian hmantheih ram hruaitu thlang turin i harh ang u. Kan ramin malsawmna leh anchhia an dawnah te hian keini a chhung a cheng te leh ram hruaitute hian mawhphurhna thuk tak kan nei tih hi kan hriat nawn a ngai hle. Thlarau chhandamna mai ni lo kan ram leh hnam chhandamna thlen tura thawk tur kan nihna te hi i ngaihtuah thar ang u.

Tun hun hi kan ram chhe mek kan siamthat theih hun lai a ni a. Kristian state, tisa leh thlaraua chhandamna chang ram kan nih theih nan keini mipuite hi kan pawimawh tak zet a. Chu chu kan rawngbawlna tur pawh a ni. Party candidate ni loin Pathian hmantlak tur candidate ram hruaitu atan i thlang chhuak mawlh ang u.

Lal Isua rawngbawlna –holistic mission- chhunzawm zel tura koh leh ruat kan nih angin kan ram hi tisa leh thlaraua chhandamna a chan theih nan nang leh kei hi missionary pawimawh ber kan ni tih hria in chu rilru pu chuan kan ram inthlanpui i hmachhawn ang u.Chu chu Bibile zirtirna, Pathian thu kan awihna tur kawng pawimawh tak pakhat a ni e.

- Rinfela Zadeng