Pathian hmangaih dan tur Deut. 6:5. Marka 12:30 ah te, Lk. 10:27

Pathian hmangaih dan turte chu Bible-in chiang takin min hrilh. A chunga Bible chang tarlan te hi kan chhiar chuan heti hian kan hmu a. "Lalpa in Pathian chu in thinlung zawng zawngin, in rilru zawng zawngin, in chakna zawng zawngin in hmangaih tur a ni" a ti. Deut. 6:5. Marka 12:30 ah te, Lk. 10:27 ah te.

Bible-ah khian rilru zawng zawng leh chakna zawng zawng a sawi tel vek zel a ni. Chumi thu chu ṭanchhanah hmangin hla phuahtu pakhat chuan, "Chakna te leh talent zawng zawng - nangmah fak nan i siam si" a lo ti a ni. (KHB No. 447). Kan Kristian Hla Bu te hi Bible nena in zar zawm, Bible behchhana hla phuah dah khawm a ni.

Chuvangin, “in rilru zawng zawngin, in chakna zawng zawngin" tih Bible thu nena inremin he hla hi a phuahtu hian a phuah a nih a rinawm. Mahse kan Kristian Hla bu-a a lan dan chuan "Châkna te leh talent zawng zawng tih a ni tlat a, pawm dam a har ka ti a. Hlim taka, nuam ti taka Pathian faka zai leh lam chakna a kawk zawk a. Mahse Kraws put lam a ni zawk! Pathian faka hlimna hi ka sawi chhia a ni lo. Kan chakna thahrui Lalpa min pek, kan tha leh zung hmangin mahni hrehawm pawisa lova Lalpa tana inpe tur kan ni tih hi hla phuahtuin a tum a nih zawk hmel a ni.

A dawt lehah ‘talent’ zawng zawng nangmah fak nan i siam si tih kan hre leh a. Kan Bible thu tarlan "In rilru zawng zawngin" a tih lai (Deut. 6:5) nen khan a inmil hle bawk. Hla phuahtu changthlan a nih hmel em em mai a ni. Pathianin mihring a siamin rilru a dah tel a, kan rilrua kan ngaihtuah chhuah, kan finna in sawr chhuak chu mita hmuh theih leh benga hriat theih a ni a. Zaithiam leh musician te, mechanic leh artist ho thiamna te hi an rilru ngaihtuahna lo par chhuak aṭanga talent lo awm a ni a. Chung talent te chu Lalpan a mah kan hmangaih nan, a duh zawng kan tih nan a hauh tlat a ni.

Chuvangin, KHB No. 447 na phuahtu hian "Chakna (thahrui) te leh talent (rilru) zawng zawng nangmah fak nan i siam si" tiin a phuah a ni zawk ang. Kan Kristian hla bu hman laiah hian chakna (thahrui, awm khauhna - strength) sawina a tam hle a, hengte hi chhut tel ve to ila.

a) KHB No. 41 - Setana Chakna hnehna chu b) KHB No. 390 - Lalpa Chakna ringin c) KHB No. 27 - Chak lote tan Isua lungpui d) KHB No. 57 - He ka taksa chak lo tak hian e) KHB No. 305 - Lalpa i mite hian chakna reng. A dang pawh engemaw zat a la awm. Hengah hian a thluk dan nena inmilin chakna (duh em emna, thlakhlelhna) tihna a ni lo tih kan hre awm e.

Hla hi thu aṭanga in ṭan a ni; mah se thusawi leh hla sak chu a rik dan a inang thei lo. a) KHB Hla No. 187 - A kut a ke a lu en rawh b) KNB Hla No. 203 c) KHB Hla No. 324 d) KHB Hla No. 432 e) KHB Hla No. 417 - Kraws hlun tak chu a ding - Fak ru thisen hlu chu - Khawngaihna mak mawi leh duhawm - Ka thlarau lawmin a khat f) KHB Hla No. 516 - Rinna mitin ka thlir reng.

Kristian Hla Bu hi chhut thar hmasak berah chuan chakna (thahrui) te leh talent zawng nangmah fak nan i siam si tiin dah theih ni se a ṭhat hmel e. Thahrui tih kher hi tarlan tur ni lovin chakna (thluk sei chhinchhiahna awm) ni lo se ka ti mai a ni. Ka rinna mai mai ka phulpui chiam laiin miin, "Mite chuan an rinna an dampui a, nang ve chuan i rinna i phunchiar pui a nih hi" min tih pawh a hlauhawm e! Eng pawh ni se Bible kan ṭanchhan a ni e.

- Upa F Aihnuna, Keiṭum