'It's My Life' let liam

'It's My Life' tih hi a hla satu tluk zetin kan ti ri ngun ta. A ṭhen phei chuan kan ti chhen ta mai. Thil tih dan copy chak tak hnam kan nih angin a uar uarah kan ṭang leh mai ang tih ka hlau hlel love.

Duh thlan tur awm thei zinga a eng ber emaw thlang thei tur chuan kha duh thlan tura kha thihna nge a nih - nunna, ṭhatna tur thil nge a nih - chhiatna tur tih pawh hre lova kan thlan ve ringawt chuan kan tum ang a ni lo duh chawk. Ka thlang sual tih kan inhriat leh retheih a rual nghal a, ka zawh fuh lo tih kan hriat leh 'awi-ah' in a zawm nghal bawk. "U zawkte thurawn ka lo bengkhawn duh lo kha ka inchhir," tih leh mittui tlak kan rual nghal dawn a ni reng mai.

Mihring kan mawl lai deuh khan "Tawnhriat hi zirtirtu ṭha ber a ni," an lo ti ṭhin. Tun ang khawvel changkangah chuan tawnhriat hnu chauha fin chu a tlai em mai, kan nih tur ang pawh kan ni hman lo tiin "Tawnhriat chu mimawlte zirtirtu a ni," an ti leh daih tawh a ni.

Tun khawvel hmang mektu ṭhalaite chuan fin kan duh a, tawnhriat ve te te hnua fin chauh chu kan duh ṭeuh lo. A tawng tawh leh hre tawhte nun enin emaw an hnen avanga thurawn hmang ṭangkaiin emaw duh thlan tur kan neih kawngte hi hre chiang phawt ila. Chumi hnuah chuan 'It's My Life' tih changchawiin keimahni ngei nunkawng tur chu keimahni ngeiin kan thlang tur a ni dawn lawm ni. Chu chiah tur chu a ni. Chutiang ni lova duhthlan tur awmsa te te pawh eng ang nge an nih hre hmasa kilhkelh lova "Ka nun alawm," kan tih ṭuahhum rikngawt chuan 'It's My Life' kan tih mek lai hian khuarkhurumah kan tla thla vawn vawn dah ang e. He thawnthu hi han chhiar teh.

Ṭhianzaho rual khat hi rangkachak khur hmuh chhuah tumin ram an vak a. Hmuh rau rauah hmu hmasatu nih tum rana kal na fam chu a hmasa leh a hnuhnung deuh an awm a. Thil hring leh eng deuh, tle zeuh awmna tuichhun hlui ni awm tak hi an hmu ta a. Rangkachak leh lunghlu a nih an rin avangin a hmasa berah a thleng hmasa ber chu a zuang thla ta a.

Rangkachak leh lunghlu emaw an tih tle zerh zerh kha chawngkawr rul mi chuk na thei chi chu lo ni hlawmin. A rak ta tuarh tuarh a, a ṭhiante zinga zuanthlak tum ve mek chu a au va, "Ṭhianpa, lo zuang thla suh. Rangkachak leh lunghlu emaw kan tih, tle zerh zerhho kha chawngkawr rul tur nei chi an lo ni a, hei min chuk nasa a nia," tiin a au a. Mahse zuanthlak tum pa chuan, "I duham lutuk vangin min huphurh a, chan zawh vek i duh vang lek a nih chu," tiin a zuang thla ve ta thova. Midang a hnu deuhva lo thleng te pawhin chutiang tho chuan an na tuar au pawh chu ti der leh anmahni huphurh avanga hnar nana ti mai mai an nih an ring tlat a. Pakhat te tein an zuang lut a, an thi ta vek mai. Chuti chuan thawnthu chu a tawp ta - a tawi hle.

Nia, zu in leh mei zua sei lian tawh nu leh paten an fate hnenah mei zuk a pawizia, zu in ṭhat tohzia, hirhaa khawlai vah tam (khawlai mi) lutuk a pawi theihzia sawiin hrilh fo mahse, "An hunlaia a nuam an tih a, a chin hrep tawh ve leh a, keini hun vea min hrek tum bik, min huphurh vang, an tem ang hlimna kan tem ve an phal loh vang," tiin ṭhangtharte hian ka la lakawi cheu dawn em ni?

Mi nun leh tawn hriat aṭangin hun leh tha seng lo thei ang berin kan fingin hma kan sawn ang nge, thawnthua mite ang hian mi hmasate sawi awih duh lovin pakhat te tein khurah kan zuang lut ve dawn?

- J. Khuma