KUMTHAR SERMON!

Kumthar sermon, ka ngaihthlak ve ngei, nuih tiza angreng tak si chhinchhiah pahnih ka nei!

Pakhat chuan kum­thar chawhma in­khawmah hun a chang a, "Hei, kum chu tûkinah a thar chauh a ni a, chanchin sawi tur pawh a la nei lova... " a ti mai a, a sawi zui dan chu ka hre tawh lo. Pakhat leh chuan, "Thil engkim hi a thar fova, kum pawh hei a lo thar leh ta. Hmeichhia pawhin èm thar phurh an châk em em ṭhin a, thawmhnaw thar hâk te pawh kan châk...." a ti bawk! Nimahsela a sawitute chu rawngbawltu ṭha tak tak an ni a, inpe em em, Kohhran pawh neitu thiam tak an ni. An sawi ngaihnawm lem lo na a, an nun a ṭha a, Pathian ṭih mi tak an ni. An nun chu an sermon a ni a, miin an chhiar a, an ngaisang a, an zah.

Kum tawp ni khan kan politician hriat hlawh tak, kum 1972-a Mizoram (UT) Assem­bly hmasa bera MLA zinga mi, Pu C. Chawngkûnga nen kan inhmu a, a chanchin a sawi chu, "Kum 1938-ah ka piang a, kum 1952 aṭanga tun thleng hian ni tin, ka hun hman dan, Diary ka la ziak ziah a, 1952 & 53-a mi erawh chu rambuai lai khan a bo. 1954 aṭanga tun thleng hi chu ka la vawng ṭha. Kum 64 chhung Diary ziak ve hi an awm ang em, ka hre lo. Zing khawvar hmain ka tho va, tuivawtin ka inbual ziah a, chumi hnuah tuisik litre 1 zet ka in leh a, chumi hnuah thingpui sen litre chanve vel ka in leh ṭhin. Chumi hnuah a hma ni-a ka hun hman dan chu ka ziak ṭhin. Thingtlanga zin nikhuaa mi ina thlen hian inbual ziah hi a buaithlak deuh ṭhin a, IB leh Rest House-a thlen chuan a tih theih zel. Khawvar hmaa tuivawta inbual hian khaw vawt kan hre lo a, a lum a, a nuam!

Ka pu-in thil ṭhen­khat, kan hriat reng tur a sawi a, tihhlawhtlin ka tum tlat. Ṭhiante zingah hnathawk nasa ber nih tum tur, thawhhona-ah pawh a thawk ṭan hma ber leh a báng tlai ber nih tur. Ṭawngṭai tam tur (ni khatah vawi 6 ka duh tâwk), kan chhung inkhawmah hla 10-15 vel kan sa fo, ring taka zai tur ka ti kher ṭhin. 1996 aṭang khan ke pali nei sa ka ei tawh lova, thingtlanga zina ruaiṭheh hian a îtawm deuh ṭhin! Thisen sang, zunthlum leh thil dang, insawiselna ka nei lo. Tûkinah pawh Sairangah balhla kan zuk phun a, hnathawh hi ka duh a, a nuam ka ti! (A ngaihnawm ka ti mang e!) "I pa khan motor a rui nasa hle mai a, Bus ticket a hmuh ringawt pawhin a luak bawrh bawrh" an tih hi a dik em?" ka ti a, "Dik e" a ti! A rui ve ngawt mai!

Mizo pa hriat hlawh, Pu C. Chawng­kunga nun sermon hi ngaihnawm ka ti ngawt mai. Taihmâk leh Pathian biak chungchang te, chhung inkhawm, mahni inthunun leh a insùm theihna te hi mihring quality sang tak niin ka hria a, min tluk hle mai! Kan insùm loh leh inthunun theih loh avanga thihna te hi a tam khawpin ka hria a, sorkar chhinchhiah danin kum 2016 chhung khan ruihhlo avang ngawt pawhin mi 52 an thi a, hengte hi Pathian hun ruat chu niin a lang lo.

Dam reite hi kan duh chuan invawn fel leh taksa thununte hi a ṭul mang e. Paula bawk hian a lo sawi lehpek a, "Ka taksa ka tichhel a, ka thuhnuaiah ka dah tawh a ni, chutilochuan mi dangte hnena ka tlangaupui hnu pawhin eng emaw tiin keimah ngei hi paih thlakin ka awm dah ang e" (I Kor. 9:27) a ti mai. Paula chuan sermon hi sawi aiin nun a ni tih a hria a nih hi mawle. Nang leh kei hi, kumtharah hian engtinnge?

- RK Lianzuala