ENGVANGIN NGE AN RUIH
Mizoram hi a mihring cheng aṭanga chhutin damdawi hmangsual nasa ber state te zinga mi kan ni a. Ruihhlo hmansualna hian mimal, chhungkua leh khawtlangah nghawng ṭha lo tak tak a nei a.
Ruihhlo ti ṭhin ṭhenkhat chuan ‘ruihhlo hi intihlim nan emaw, intih pa nan emaw chauh alawm kan tih ṭhin, kan duh hun hunah kan nghei thei, buaina tur a awm lo’ an ti ṭhin a. Buaina tur a awm lo ti reng chung hian a ngawl an lo vei hman ta ṭhin a ni.
Thu dik ziktluak lo hriat leh kawng dik lo a mahni inrintawk lutukna hian dinhmun duhawm lo takah min hruai lut thei a. Damdawi nihphung leh a hnathawhte lo hre chiang ta se chuan a tir aṭanga intihhlim nan emaw, chhan dang vang pawh nise ruihhlo hi an khawih ngawtin a rinawm lo.
Ṭhenkhat chuan ruihhlo hi hlimna thlentu emaw an ti a, rilru hah changa rilru na chhawktu atan hman tumin ruihhlo hi an ti ṭhin. Ruihhlo hi chutiang a hman chi a ni lova, harsatna kan tawhte min sutkian sak a hnekin mite endawng leh ramtuileilova min siamtu zawk a ni.
Ṭhalaite hian lungngaihna leh manganna kan tawh chang a awm fo ṭhin a, chung hunah te chuan Pathian hnenah leh kan chhungte emaw mi rintlakte hnenah puihna zawng zawk ṭhin ta ila, min hrethiamtu leh min hmangaihtute nena kan harsatna chinfel dan ngaihtuah hi a him a, a thlamuan thlak ber a ni.
Ruihhlo ngawlvei inṭanna hi hote a ni, ‘tih chhin’ vang hi a ni. An han tichhin a, an sim leh mai dawn emaw an tih chhungin nasa takin ruihhlo hian a lo ṭham bet tawh si a, an tal chhuak thei tawh lo ṭhin a ni.
John Wesley chuan, “Ṭhalai singkhat min pe ula, khawvel ka ti danglam ang” tiin ṭhalaite pawimawhzia leh thiltihtheihzia a sawi a. Chutiang khawpa pawimawh ṭhalaite kan ni a, kan nih tur ang min nih tir phak lo leh min tichhetu lian ber chu ruihhlo hi a ni. Ruihhlo hi kan nih tur ang min nih tir loh mai bakah chatuan hremhmun a min hruai luttu tur a ni.
Duhthlanna dik kan neih theih nan ṭhalaite hian thil chinchang kan hriat a ṭul. Ṭhenkhat chuan rilru na chhawk nan tiin damdawi (drug) an hmang ta ṭhin a, hei hi a pawi hle. Kan rama damdawi hmansual tam tak te hi depressant drug a ni a, hetiang damdawi hi rilru nat laia ei/ tih chi a ni lo.
Depression nasa tak siamin nun beidawnna a thlen thei a, rilru fim laia tih duh miah loh tur thil tih duhna rilru a put tir theih avangin rilru na chhawkna atana drug hman hi a hlauhawm hle.
A zunzama phuar kan nih tawh chuan tal chhuah leh mai a harsa a, ruihhlo la ti ve lote chuan i ti chhin lo ngam ang u. Ruihhlo hi hlimna emaw hlim leh zualna thlentu a nih loh avangin ruihhlo tel lovin krismas leh kum thar hman i tum ṭheuh ang u.
- N.Samuela, Bawngkawn