Kawn chei i uar ang u...
Kristiante hunpui Krismas kan lo hnaih leh ta hle mai. Kan fuankhawmna leh chakkhai kan lamna ber Aizawl khawpui pawh a lunin lirthei leh mihring an ṭhahnem ta. Veng ṭhenkhat chuan kawn an chei ṭan mek a, kawn chei hi i uar zel ang u.
Kawn chei hi naupang mai ni lo, puitling tan pawh khaw hawi a tinuam a, lenvah pawh a tinuam em em a ni. Mahse kawn chei turte hi kan che har hret erawh a pawi ṭhin. Thingtlang aṭanga Aizawl rawn bazar-te pawhin a mawina leh a nawmna an chen ve theih nan a chei tur vengte chuan chetlak hma a ṭha hle a ni.
Tunah hian veng ṭhenkhat chuan hma an la mek a, a chei tur veng ṭhenkhat chuan hmalakna an la nei meuh lo bawk. Chei tur tho tho chuan hmalak a hun ta hle mai. Sorkarin lawmman a pek dawn vanga chei loin, kan hunpui hlim leh lawm taka kan hman theihna rilru lian zawk se a duhawm khawp mai.
Kum kal ta te khan Hlimen chuan an quarry chim ta-ah intihhlimna chi hrang hrangte an siam a, khama lawnna turin hruite an thlung a, min tam takin an tlawh nghe nghe kha. Chhinga Veng leh Armed Veng pawhin an thlanmual inṭawm an chei a, mi tam takin an tlawh a, traffic jam khawpin mipuiin an bawr a ni. Khatiang rilru pu chung khan veng hrang hrang hian an hmun awl neih chei vul ta se Krismas kan hmang nawm phah ngeiin a rinawm.
Krismas hi tun aia kan hlut deuh deuh a ngai bawk. Khawpui ah phei chuan krismas hi mi tam tak hian kan la urhsun ta lo lutuk em aw a tih theih. Ruaiṭheh te hi krismas tiropuitu a nih vei nen ruaiṭheh peih lo te hi kan tam ta mah mah niin a lang. Mahse inah mahni duh danin kan in tuituah thei a nih pawhin Lal Isua pianchampha lawmna hun Krismas hi Kristian te hun ropui ber a nih angin a hlu zual theih dan tur anga kan hman chhoh zel a ngai. Mizoram pawna awmte tan pawha Mizoram ngaih ti na vawng vawng thamin kan kawn neih ang te leh kan hmun remchang neih ang apiang hi veng tinin mawi takin chei ang u khai.
Kawn chei hi a mawina leh nawmna mai a ni lo. Kristian state kan nih anga kan hunpui hlim leh lawm taka kan hman theih nan a ropui ve hrim hrim. Kawn tin mai hi chei vul chuk mai ila, a masi ber mai. Chuvangin, veng tin hian i uar sauh sauh ang u.
- J Lalramnghaka