Zirlaite leh Social Media

Hripuiin khawvel leh Mizoram min nuai buai a. Puipunna lam chi - inkhawm, sikul, infiamna adt te pawh kan khar a. Hripui nena nun thiam a ṭulzia kan hre chho zel a; Hripui karah inkhawm te, sikul kal te leh kan eizawnna te chhunzawm turin hma kan la chho mek a ni. Mizoramah pawh sikul kal kan tum tawh a; keini zirlaite hian sikul kal chunga Social Media hman thiam pawimawhzia hi kan hriat chian a ngai hle. Vawiinah hian zirlaite tan bik social media hman thiam a ṭulzia kan sawi dawn a ni.

Social media hman thiam

Mizorama ṭhalai tam zawk hian social media kan khawih a, Instagram, Facebook, Twitter adt -ah account kan nei deuh vek. Khawvel mi mi zawng zawng hian social media kan khawih ti ila kan sawi sual tam lo ang. Chuvangin social media hi do chi a ni tawh lo a; Sorkar leh Kohhran te pawhin ṭangkai taka hman thiam hi kan inzirtir a hun tawh zawk a ni.

Thalaite leh mi nawlpuite hnena zirtirna leh thil tha kawhhmuhna atana social media hman thiam hi vawiina kan mamawh dik tak zawk a ni. Chutianga hmang thiam leh hmang ṭangkai hmasa apiang te chu mi fing an ni chho mek zel bawk.

Kan mamawh zawn

Kan thupui hi zirlaite tan bik a nih angin zirlaite'n ṭangkai taka social media kan hman thiam a ṭulzia sawi ta bik ila. A bikin Instagram hi kan khawih nasa a, kan ngaihsan zawng te leh kan duh zawng te kan ban phak theihna hnai ber 'application' a nih vang pawh a ni ang e. Nula/tlangval chhe lo leh sexy tak tak te Instagram lama kan follow rual hian kan lehkha zirlai min ṭanpui thei tur follow nachang hriat hi nakina kan inchhir lohna tur a ni. Mizo ṭawng pawhin hetianga zirlaite pui thei tur Instagram page a awm ve nual tawh.

Thil ṭangkai nia lang hian mi larte leh nula tlangval hmelṭha/ sexy te ai hian follwers an nei tlem zawk fo a. Chuvangin, zirlaite hian kan duh zawng bakah kan mamawh Instagram page te hi follow nachang hria ang u.

You Tube Channel ṭha

Mizoram chhung chauh thlir pawhin YouTube channel tam tak kan nei tawh a; zirlaite hian eng You Tube channel nge kan en tam ber? Kan ngainat zawng leh kan mit châk zawng kan en rual hian kan zirlai atana ṭangkai You Tube Channel i subscribe ang u. Kan hmalam hun zel atana ṭangkaina leh hmasawnna min pe miah lo tur thil ngaihven tam lutuk hi kan bansan ṭhen loh chuan nakinah kan la tuar dawn. Pasalṭha thawnthu te, BTS Army ho You Tube channel te kan en rual hian kan hmalam hun atana ṭangkai tur You Tube channel - Sap ṭawng leh Mizo ṭawng te pawh hi i ngaihven ang u.

Hetiang channel ṭangkai, zirlaite eizawnna leh hna ruak awm an sawina channel te, BBC, CNN, DDK, Zonet leh LPS adt news channel kan en tlem lutuk te hi zirlaite hian vei ila, i ngaihven mawlh ang u.

Mobile Apps ṭangkai

Vanglaini Chanchinbu hian a thlawnin application kaltlangin Vanglaini chanchinbu chhiar tur hi nitin min pe tih te hi zirlaite hian kan hriain kan chhiar ngai em? PUBG leh ML te kan khelh rual hian Kindle apps aṭangin lehkhabu kan chhiar ngai em? Zozam Times leh Aizawl Post te hian website lamah an chanchinbu hi an dah chhuak tih te hi kan hria em?

Thingtlangah chanchinbu thlen phak lohna hmunah kan awm a nih pawhin a chunga kan sawi te bakah pawh khian kan mobile phone hmangin chanchinthar, kan zirna kawnga hmasawnna tura min pui thei tam tak a awm a ni tih hriain ṭan i la ang u. IAS/IPS, Central Service adt ah kan tlin theih loh chhan ber pawh hi heti lamah hian zirlaite hian kan rilru kan pek tawk loh vang hi a chhan pakhat chu a ni.

Chanchinbu leh lehkha chhiar taimak

Zirlai - chanchinbu leh lehkha chhiar tlem kan nih chuan kan lo pass ve a nih pawhin kan ropui tak tak ngai lo ang. Tunlai khawvelah mi thiam tak tak tan lo chuan hna thawh tur ṭha hmuh a har. Chutianga mi thiam leh chhawr tlak ni tur chuan social media kan hman dan kan her rem thiam a nih phawt chuan kan theih lohna tur a awm lo. Social media awm hmaa lehkhabu ṭha leh zirlaibu ṭha lei tur awm lo leh ban phak maia a awm lo ṭhin kha social media lamah lei tur leh a thlawna chhiar tur tam tak a awm tawh. A ngaihven leh a hai chhuah erawh zirlaite hian kan bat leh kan mawhphurhna a ni. Chutianga hai chhuak leh a nachang hria zirlai tam tak kan nei te hi a thlamuanthlak hle.

Nu leh pa te mawhphurhna

Nu leh pate hian kan fa lehkha zirlaite hi nasa leh zuala ṭan kan lakpui a ngai. Entawn tlakin nung hmasa ila, kan fate kan thunun leh zual thei ang. Pathian laka kan rochan kan fate hi sikul an kal a, lehkha an zir a nih chuan theihtawp i chhuah pui zual ang u. Kan fate social media hman dan hi a theih chen chen hriatpui ila, an hmasawnna tur zawnga social media an hman thiam theihna tura ṭanpui leh zirtirna pek te hi kan bat a ni.

Social media-a thil ṭangkai lo post leh an nun tichhe thei thil lakah te hian kan fate i veng ang u. Sex video an neih tawh hnua in zilh ai chuan sex video nei lo tur leh sex hmang lo tura inzirtir hi a nih dan tur dik tak leh Pathianin kan fate enkawl tura mawhphurhna min pek dan a ni.

Zirlai kan nih chuan social media kan khawih pawhin kan zirlai min pui thei tur ngaihven tel ila. Kan duh zawng leh kan ngaihsan zawngte thlauhthla chuang si loin Instagram, Facebook, Twitter, You Tube adt te hi hmangin khawih ila. Hlawhtlinna kan chan hunah chuan media leh social media hian min la umzui ang a; ram leh hnam tana mi ṭangkai leh chhuanawm kan lo ni ang.

- Rinfela Zadeng