KAN RAM HI KAN RAM by Lalṭanpuia, Sialsuk

Ka hla phuahte zinga pakhat “Kan Ram Hi Kan Ram A Ni,” tih Pi Lalsangzuali Sailo-in thiam taka a sak hi lungawi thlak ka ti hle mai. Mahse tlem sak sual a lo nei palh hlauh mai a, a lo tihpalh takah chuan “A pawi love” tih mai loh chu tih ngaihna dang awm tawh hek lo! A tha tho e, ti tawh mai ila.

Mahse ṭhangthar zawkte thinlunga tuhngheh a nih hmain ka Hla phuah dan leh duh dan ka han sawi ve ang e. He hla hi kum 1964 June 24 chiah khan ka phuah a ni a. Hetih hun lai hian MNF Party hi a langin mipuiin kan tuipui em em ṭhin a nih kha.

Pu Pazawna, Sialsuk Vai Venga mi chu kan In-ah lo lengin “Hnam hla, kawng han zawhna tur kan nei lo va, min han phuahsak teh,” a rawn ti a. Keima lunglen zawngin Mi­zo-ho Hnam hrang hrang kar aṭanga inhruaikhawma Inde­pendent-a ro kan rel theih hun tur hi ka chak em em leh ka engto ber a ni ṭhin.

He hla hi ka han siam ta a. A chaberah hian Pathian thu-a tlangkawm ka tum a, mahse an hman­hmawh em avangin ka siam hman ta lova. An han chhiar chhuak a, “MNF a tel hleinem” an ti a, “MNF tan bika ka phuah a ni hauh lo, MNF ka telh thei lo... Mizo National (Mizo Hnam tan) a ni ka phuah, Mizoram Hnam Hla a ni” tiin ka chhang a.

Tunah hian MNF hian an tan bika an hla emaw tia an sawi ka hre ta fo mai hi pawi ka tiin ka rilru pawh a na hle a ni.

Ka hla hi tute tan pawh (Mizo tawh phawt tan chuan) sak a thiang a ni! A nihna takah chuan sak hi zahthlak leh tlawm thlak zawk tawhah kan ngai tlat a ni. “Kan Mizo Hnam ropuina chu state-in an lo hralh a, “I hnehna puanzar leh i lu lo thin-san mai rawh,” tia kan au-na chu a hlawhchham chiang ta hle a nih hi! Tuna heti tak maia MNF tlâwm tawhin anmahni sak bik tur leh anmahni Hla bik emaw tia an hauh tlat mai hi zahthlak ka tiin pawi ka ti khawp mai.

Chang hmasa bera Pi Lalsangzuali’n “Rorelna khawl hma-ah kan vote ang che” tih hi “Rorelna khawl hma-a ‘zam lo nang’ kan vote ang che,” tih zawk tur a ni. Chang tawp bera “Zoram hi kan ram a ni” tih ka duh lo em em a, Vaiho leh hnamdangte pawhin “Zoram hi ka ram a ni” tih theihna India hnuaiah chuan an nei ve tho tlat a ni. Chuvangin, ka hla phuah dan takin, “Kan Ram Hi Kan Ram A Ni” tih zel tawh tur a ni e.

P.C. Party tan ka Hla phuah pakhat, “Awmhar Champion Val Kan Ni,” tih hi “Awmhar Zoro Val kan ni,” tiin a sak theih a, kei a phuahtu hian ka phal e.

He thu hi Sakei­baknei, Bi Weekly News Magazine Vol-V No. 10689 October 29, 1993 phek 2-na a mi lak chhuah a ni.

- Lalchawiliana, Chhinga Veng