Abub Mazumdar, Kamrul Laskar, CYMA & MZP

Tunlaia hnam dang hming kan hriat lar em em pahnih Kamrul Islam Laskar leh Abub Ahmed Mazumdar (Abu Mazumdar) te chungchang hi Mizo ṭhalaite hian tun aia chik zawka kan ngaihven a va ngai em.

He thil hi politics-a inpuh tawnna piah lama hnam pawi khawihna lian tak leh kan rama hnam dangin thuk taka thuneihna an chan tawhzia lo lan chianna a nih avangin hetia politics thila party in puh tawnnaah hian ral mai lo se, Central YMA leh MZP pawh hi ngawi reng bik lo se a ṭha khawp mai.

Kamrul Islam Laskar hi Tribal Cer­tificate lo nei thlap tawha Scheduled Tribe anga lo awm tawh a ni a, contrac­tor a ni tel bawk. Tribal a nih avanga hamṭhatna hi Kam­lova Chhangte hminga a din con­struc­tion firm hian a tel nge tel lo tih hi CYMA hian a chhui chhuak ngam tur a ni.

CYMA kan dah san ṭhin kha sorkar khalh kawi mai mai theih a ni lo tih lantirna turin he thil hi chhui chiang phawt se. MSU lam pawh hian tha han thawh ṭha leh se, zirlai pawl lian zawk MZP pawh hi hnam thil a nih ang hian rawn ṭawng chhuak ve ngam se a duhawm khawp mai.

Kamlova Chhang­te ni ta hi tuna kan Airport neih chhun sa chim ruptu a lo ni kher kher hi Mizo tan chuan thik loh theih pawh a ni lo a. Party mi leh sa induhsakna hi a lo awm ṭhin laia Hnam Run General Secretary te hna hmuh theih loh hmutu hian midang aiin a sa ṭha bik lo tih a lo lang chhuak ta bawk a ni.

Chu mai chu ni lovin social media post hrang hrang kan hmuh chuan Kamlova Chhangte lo ni ta Kamrul-a contract hnathawh hnuhma hi lengpui Airport-ah ringawt pawh hian a thinur thlak a. Tihpalh thila chim ni loin iron rod an hman dan kha Iron Rod zuartu pawlin a dik lo an ni a, Mistiri Association pawhin an hna a dik lo an ti ngat bawk a ni. Hei hi CYMA leh MZP hian an ngawih bo san mai thei dawn em ni?

Assam leh Mizo­ram Chief Minis­ter pahnih ramri chungchang indawr­naa rawn lang ve nawlh mai, Assam Police lamin kuhva smuggling lama hotu lian tia an man tak hi tu sawma CM pahnih inbiaknaa tel ve nge a nih le?

An inbiak hma khan Mizoram House-ah kan CM a hmuh thu kha kan lo chhiar a, eng vangin nge Delhi-ah daih daih kan CM a lo va hmuh theih bik?

Mizorama buhfai supply-tu lian leh kuhva tawlhtu lian Abu Mazumdar hi CYMA leh MZP hian a chungchang hi an meeting naah tal an sawi chhuak ngam em?

- Mama Chhangte