Inthlan dawnah Mithiamte an ṭawng chhuah zel a ngai

Whatsapp-ah hian vawi thum ngawt mai he thu, Mizopa IAS pachal ziah hi ka dawng a, a ngai ngai hian rawn copy paste ve ila, mahni thiam ang angin sawi chhawng ve bawk ila tiin mithiamte an au chhuah zel theih beiseiin ṭan kan han la ve dawn a ni.

Hetiang hi ka thu dawn chu a ni:

"MNF leh BJP hian thuruk an nei"

- Clement Liankunga, IAS

20 October-a FB-a ka post, "Zoram Assembly Election zawh hnu scenario : Possibility" tia ka ziahah khan MNF leh BJP an ṭangdunin a rinawm tih a nih kha. Tunkin Vanglaini hian a rawn tuihnih ta.

MNF leh BJP te hian thuruk an nei a, NEDA forum-ah pawh MNF President a kal ve fo ṭhin. Amaherawhchu, post election-ah BJP nen thawkho turin in ready mahse, election hmaa BJP nena thawhho an tum chungchang an sawilan chuan Zoram Kristian te vote chân an hlau sia. Chuvangin, hemi chungchang hi an zep ta a ni. BJP pawhin an zêp ve tho. Public consumption turin an sawi mai mai ṭhin a, an tum tak erawh an sawilang ngai lo.

Tukina ka rawn post hi, 20 October hmaa ka hriat ruk tawh a nih avangin kha mi ni khan ka post a nih kha. MNF-in majority an lak loh chuan Chakma, Bru leh zoram chhimlam aṭangin BJP-in MLA 3-5 an neih chuan Chakma CM or Dy CM an chuh ngei ang tih pawh ka ziah tel kha. Thuruk inthup ni lo mahse MNF thuzep leh sawi chhuah ngam loh chu "TRIPURAINFO" in a rawn tlangzarh ta a nih hi.

Chuvangin, MNF te slogan thar tur ni awm tak chu, "Zoram hi, Pathian leh kan ram tan leh Hindu Lalram tan" tih ni awm tak a ni.

Pu Clement Liankunga thu hi ngun taka kan chhiar chuan, “Tukina ka rawn post hi, 20 October hmaa ka hriat ruk tawh a nih avangin kha mi ni khan ka post a nih kha,” tih a ni a, ani ang mi thiam leh IAS chin hian BJP leh MNF a ruka an thawh dun thu hi a lo hre daih tawh a, Tripura lam meida-te’n an puanzar hma hian a Facebook-ah a lo ziak lang ngam tawh tihna a ni. Hei hi chu politician sawi ni lo, ṭan lam nei sawi ni lo, Mizo pa mithiam leh thil hre zau sawi a ni a, MNF leh BJP hi an lo thawk ho ru reng niin a lang a, a zahthlakin a pawi vawng vawng hle a ni ta.

“Pathian leh kan ram tan,” tih an au hla ringawt pawh hi mi lêm tak leh mipui au thiam tak a nih laia lang lo lama Hindu bupui awm khawmna party BJP nen an lo inzawm reng hian Mizo rilru a tinâ a ni. MNF hian huaisen takin “BJP hi NEDA lama kan thawh pui an nih angin tun MLA inthlanah pawh hian kan inpui tawn dawn,” ti ngam se mipui ṭhenkhatin an vote loh phah ang a, chutihlaiin mipui tam takin an vote belh ve dawn thova, a nihna ang hi mipuiah puang ngam se tih hi mipui ngaihdan a ni.

Lang lo lama BJP nen indawr reng si, kan politician te chu sawi loh kan mithiamte pawhin chu chu an lo hre ru reng tawh a, zep hlen theih lovin Tripura BJP hruaitu khan MNF nen inthlan hmaa inzawm chu Mizo mipuiin an vote loh phah an hlauh avangin inthlan zawhah inzawm mai an tum thu a sawi a, hei hi chu phat a harsa tawh dawn a ni.

Kan politician te hian an thil tih an thup ṭhen hi chu kan la hrethiam thei ang a, political party leh party thawhhona thleng thlenga thupa lem an chang hi chu a zialo takzet a ni.

Mipui hmaah BJP nen an thawhho lohzia leh inthlan zawha thawhho an tum lohzia hi ‘ziaka’ an dah ngam a nih loh chuan rin theih an ni tawh lo vang, a sawia sawi hi chuan an duh duh hi an sawi mai mai a, Pu Hawla’n kawngpui chhia a awm loh thu a sawi avanga kan thinrim vanglai takin Pu Zorama’n Aizawl khawpui chu traffic jam awm lohna leh parking-a harsatna awm lohnaa siam a lo tum ve leh a, kan nui leh ham ham mai chu a ni Zofate hi kan nihlawh teh e.

He ram hian lemchang hruaitu hi a mamawh lova, mipui hnena thudik puan hi a hun ta viau a ni. MNF hian BJP hi an thawhpui a nih rau rau chuan lang tlang takin thawhpui law law se, “NEDA-ah kan thawhpui alawm, mahse hei chu NEDA-ah chauh a ni,” tihte hi mipui hruai sual tumna a ni a, kan duh chin china thawhpuia duh loh (vote a kiam hlauh) huna thawhpui leh loh theih niin NEDA hi an din a rinawm lo.

MNF leh BJP hi NEDA-ah an thawk dun a, a nihna tak sawi duh chuan NEDA hi BJP din a ni. NEDA-ah BJP hnuaiah an kun tawh a, Mizoram inthlan­ah pawh lang lo lamah an thawk dun (Tripura BJP hruaitu lamin a puan vek tawh kha) bawk si a nih chuan a va han zahthlak haih haih ve aw.

- Lalrinpuia (Puia)