Pawisa min pe se kan 'Puja' duh hialin ka ring

Mizoramin ramri avanga buaina namen lo a tawh laiin mirethei tam tak chuan an mamawh thil ṭhenkhat an nghei tawh a. Ramria awm nutling rualin thih huamin Vai sipai an hmachhawn a, chutihlai chuan Aizawlah kan hotute chuan hri leng avanga a remchang lo chung chungin 'pawisa min pe' tih chhuanlama hmangin Anthurium Festival an han hmang lui tehreng a! 

Kha tluka mipui tawrhna hai dera kan ram hruaitute intih lalna kha kan dam lai hian ka la hmu tam lo. 

French Revolution High School lama kan zirah khan an mipuite kha an ril a ṭam a, ei tur an nei lova an chaw ve ber chu chhang kha a ni. France lalnu Marie Antoinette mipui rilṭam chu hre lo derin, "Chhang (bread) ei tur an nei lo a nih chuan cake ei mai rawh se," a tih khum a. Hun a kal zel a, French Revolution a lo chhuak ta a nih kha, kan la hre ṭheuh awm e. 

Mipui ei tur dapin an mangang tawh a, Covid-19 lockldown avangin khawpui mirethei an rum vawng vawng a, chutih lai chuan kan ram hruaitu tura mipuiin a thlana kan thlante chuan, "Central lamin Anthurium Festival atan pawisa min pe si a," tiin kut phuahchawp min hman san hmiah mai a ni. 

He 'Virtual festival' an tih mai an hman hunlai chiah hian Assam ramria awm khaw lian lo tak pakhat Phainual huho chuan, "Zonu hnam chhan hnatlang," an lo ko a. Vengtu sipai pawhin an dan zawh lohin Mizoram chin nia an hriat chu an va rap chat chat a, chutihlai chuan central-in sum min pek miau avangin kan hotute chu kut lo thei lo dinhmunah an ding ve mek bawk si a! Nuho hi ramriah Vai sipai nen an innawr a, Aizawlah kan hotute chuan Anthurium Festival hmangin khualzin hip an lo tum ve mek bawk a ni tih kan hmu. 

Central hian pawisa hi "pa chauhin a hriat" khawpa tam pawh min rawn pe eng ang mah se, "Ka mite natnaah chuan ka na ve," titu ram hruaitu chuan pawisa chu hnarin a mite natna a ṭawmpui tur a ni zawk lo maw? tihte hi rilruah zawhna a lo lang nghal a ni. 

Pawisa a awm chuan a hun leh a hmun pawh sawi lovin pawisa min petute hian an duh duh min tih tir thei dawn tihna em ni? tih ngaihtuah phei chuan rilru a na vawng vawng mai. 

Rilru ngaihtuahna a han kal ding tak tak chu Aizawla taxi driver mai pawh ni lo taxi nei chin ngat pawh hi Covid-19 avangin kum 2020 ah an la service mumal theih loh avangin in luh man pek pawh harsatna an neih lai hian kan kut lui sak sak ti zawngin ngaihtuahna a lo lut a ni. 

Hetia pawisa min pek avanga mi harsat ber lai leh ramri-ah buaina nasa tak a thlen lai pawha kan kut duh chuan, "Kha, pawisa kan pe ang che u a, Anthurium Festival, Summer Festival, Autumn Festival leh Winter Festival bakah hian in lo Puja ngei ngei dawn a nia, pawisa kan pek che u hi," rawn ti ta se, pawisa dawn tur chân kan ui avangin kan puja duh hial dawna rinna ka nei ta rum rum mai!