OBJECTIVE CORRELATIVE LEH P.S CHAWNGTHU

He Sap ṭawng thumal, critical theory pakhat ‘Objective Correlative’ hmang hian P.S Chawngthu hla ‘Nghilh lohna par’ kha sawi fiah i’n tum teh ang. He thumal hi a hmang hmasa bertu chu Painter Washington Allston niin, kum zabi 19-naah khan a lecture-naah, ‘rilru chhung ril leh khawvela thilsiam dangte inzawm dan’ sawi fiah nan a lo hmang tawh a. Heta a ngaih dan hi Goerge Santayana chuan Interpretation of Poetry and Religion (1900) ah a rawn sawi zau leh a. Santayana chuan, “Khawvela thilsiam dangte nena inkungkaihna chuan hla phuahtute thinlung thu thûk chauh pho chhuak lovin, a chawh thawh telsak ṭhin a ni” tiin a rawn belh a. Chumi hnu chuan T.S Eliot khan “Hamlet and his Problems” zir chianna atan rawn hmang ve lehin, T.S Eliot hian he theory hi rawn tihlar belhin a champion-pui zui taa, a hming nena sawi kawp a hlawh ta zel a ni.

He critical concep/ theory aṭanga zir chian theih tur hi Mizo thu leh hla lamah pawh a awm nual niin a lang a. Objective Correlative awmzia T.S Eliot hrilh fiah dan chu “Art hmanga emotion sawi chhuah dan awm chhun chu a anpui thil emaw, hun emaw, thil thleng emaw hmanga a anpui emotion chawk tho thei a ni. Hla phuahtuin hriattir a duh tak chu a kaihhnawih thil hriatsa hmangin a thawhtir ṭhin” (Thangvunga 144).

P.S Chawngthuin ‘Nghilh lohna par’ hla a chhar chhuahna hi ‘Kawldai hling nei par’ aṭangin a ni. Chu pangpar chuan a phuahtu’n lo pal tlang tawh nun leh a lo tawnhriat tawh ṭhinte nen par a chhuan belh ta bawk a. A la tawn loh lam thil sawi lovin, a lo tawn tawh ṭhin, hun liam taa mi nawlpuite pawn an lo chin tawh ṭhin; mahse, a hun tawn lai meka an chin tawh loh leh an uar tawh si loh chu he hla aṭang hian kan hmu thei a.

A hla ṭobul, a phuah dan a sawi hi i’n tar lang teh ang. “Sapho hian an ngaihzawng, an ṭhian ṭha te, an chhungkua te hmun danga kal sawn emaw, zin bo tur emaw, pem tur emaw te reng reng hi an thlah dawn hian pangpar chi khat bawr ve deuh reuh, pawl deuh riai hi kawr âwmah an inthiahsak ṭhin a; chu chu eng lai pawha intheihnghilh loh nana inhrilhnaah an hmang ṭhin... chu pangpar chu a hmingah pawh forget-me-not an ti nghe nghe” (Nghilh lohna par 126).

A sawi zelnaah chuan, “ ... kum 1940 bawr lai vel leh a aia hma hretah te khan Mizoramah te pawh mi ṭhenkhat chuan inthlah nan pangpar kawr âwma inthiahsak an ching ve ṭhin a. Amaherawhchu, forget-me-not pangpar tak erawh Mizorama a awm ve loh avangin amah ang deuh maia bawr deuh, a par pawl ve an hmang ṭhin a. Chumi pangpar chu ‘Kawldai hling’ tiin an vuah. Kawldai pangngai anga hnah lian a ni ve lo” (126).

P.S Chawngthu khan kum 1944 aṭangin music lam kha a luh chilh thûk tak tak kha a ni a. Roman Francisco and his Hawaiian Serenedars pawlah telin, kum 13 chhung zet an inzui a. Foreign ram lamah an che nasa a, chuvang chuan P.S Chawngthu khan Sap kan tih leh hnam dang ho nun dan chu a hre chiang thawkhat ngeiin a rinawm. Chu mai bakah kum 1940 vel khan, Mizoramah ngei pawh Zosap kan tih te kha an la awm tam viauin a rinawm a. An chin dan phung kha an hmu tamin, an hre chiang ngei bawk ang.

Kum 1955-a Mizorama a rawn chuan chhuah leh kha chuan kum 1940 vel laia nula tlangval te thil uar leh chin ṭhin kha an lo uar tawh lovin, an lo ching tawh lem lo va. Kum 11 hnua a rawn haw leh ṭuma an naupan lai vela an dai vahna ṭhin vela a vah leh ṭum chuan, dai vel pawh chu nasa taka a lo danglam tawh dan a hmu a. Hmana lo an neihna hmun leh ram hnuai ni ṭhinah te khan, in a lo dingin kawngpui leh lamlian te a lo thlur seng sung tawh mai si a.

“Chutia ka vah velnaah chuan hmana lo a nih laia bawng leh kel luh theih loh nana sedai an theuna hlui karah chuan kawldai hling sang taka ṭo, ṭang sei pui pui nei hi ka hmu a, a ṭang sei pui hmawrah chuan par bawr ṭha fahran mai hi, a uai zawng hian a lo par a. Hmanlaia kan chin anga inthlahna leh intheihnghilh loh nan tia kawldai-hling-par pawl kan thliaka kawr âwma kan inthiahsak lai ang kha chu ni se, tu te emaw chuan a thliak ngeiin a rinawm; mahse, tunlaiah an ching ta lo a ni” (127) tiin hun inherin, thil chin dan phung tam tak a lo thlaksak tawh dan a sawi a.

Hun liam taa an thil lo chin dan leh an uar ṭhin te chu mitthla letin, a thil hriat sa leh kawldai hling par pawl a hmuh hmang chuan a lunglenna chu a dah chhuak ta a. Hmanlai ang kha la ni se chuan, kawldai par pawl riai a hmuh chu, tu ten emaw an thliah ngei ringin, chuvang chuan ‘Thliah lai nghakin a lo par pawl riai,’ tiin a hla pawh a khar ta a ni a.

Aizawla a rawn let hnua a khawvel thar tawn leh hmanlai hun chu a lo inthlak danglam nasat tawh em avangin, chu kawldai par chuan a lung nona a chawh thawhsak tih a chiang a. Hla phuahna atan (inspiration) a hman rualin, a lunglenna a chawh thawhsak dan chu a nun hlui, a thil lo tawn tawh leh hun liam taa nula leh tlangvalte tih dan phung te chu kai kawpin, a lunglenna chu hlaah a chantir ta a.

He hla phuahtuin min hriattir a duh chu, a hringnuna a lo tawn tawh (experienced) leh kawldai hling par (object) te a suih finna aṭangin, he hla ṭha elkhen hi Zofate min hlui ta a ni. Kha kawldai hling par pawl mawi tak hmang khan hun liam taah chuan, Sapho tih dan dungthulin, inhriat reng nan, eng lai pawha intheihnghilh loh nana Mizo nula leh tlangvalten an lo hman tawh ṭhin dan chu a rilruah a la cham reng tih a hriat a, a lunglenna leh kawldai hling par chu thiam taka suih khawmin hlain a au chhuahpui ta a:

Sam ang ṭhen ni te hi

lo her chhuak leh si e,

Ami leng tawnah hian tuar dan

hril thiam awm maw?

Duhlai leng zing zin tur hnah

nem hling par an hlan,

Nghilh lohna ser ang cham thei tak maw?

A hla phuah dan kal hmang, a hla châng awm dan hi sawi fiah thiam pawh a har danglam riau, châng khat leh a thunawn nei nge, châng hnih nei zawk tih thu-ah hian. A châng hmasa zawmna hi a thlûk a sângin, a per ta daih bawk a. He lai chângah hian hla phuahtu themthiamna pawh chiang takin a rawn lang bawk a. Khuarel dan phunga kawldai hling nei chu par ni mai awm kha, ‘Nghilh loh ngaihhrui thu di thlun nana par chhuak’ angin a sawi ta theuh a. A zalenna a hmang thiamin, a remhriatna pawh hi a nep lo hle. A hun liam tawh mitthla chung zelin, he lai chângah hian thiam takin a lunglenna thu chu a tlan tir zel a. Chutih rualin, a tawp tlar pahnihah chuan a hun tawn lai mek leh a rilrua hun liam ta a ngaihtuah chu a rawn hmer kawp ta chat thung a:

Nghilh loh ngaihhrui thu

di thlun nan lo par chhuak e,

Inṭhen ni lo her chang lunglen

dam te’n thawi nan;

Vangkhaw sira saw dai theua

pal kar a’n,

Thliah lai nghakin a lo par pawl riai.

He hla sa ṭhin te zingah, ‘Vangkhaw sira saw dai theua pal kar a’n,’ tih lai tlar hi sa dik lo an awm fo mai a. Saw dai tih hi sedai tia sa an awm leh ṭhin. He lai tlar hi a hun tawn mek a tar lanna kha a ni a. Kha kawldai hling par a hmuhna hmun kha tun hmaa sedai an lo theu tawh ṭhinna chu a ni ngei ang. Mahse, a hun tawn mekah kha chuan sedai an theu thar tawh lem lo niin a lang a. ‘Sedai theuna pal karah thliah lai nghakin a lo par pawl riai’ tih mai awm a nih rualin, a aia huamzau zawkin ‘saw lai daiah sawn, sedai te pawh an theuna ṭhinah khan’ tia mi dangte kawhhmuhin, a hun laia miten a hmunhma nena an mithhla thiam theih nghal vek turin, saw dai tih hi a hmang ta niin a lang. Saw dai tih hian chu lai hmuna thil awm, sedai pal hlui leh kawldai hling par pawl riai te chu a huam tel thei nghal vek si a. Hei hi a ni hla phuahtute themthiam ṭhinna chu! Chuvangin, an themthiamna (artistic beauty) tibo zawnga an hla thu chheh dan, lo sak bosak ṭhin hi chu a fuh chiah lo ṭhin tih hi, kan thu khar nan kan han hmang ang e.

Works Cited

Chawngthu, P.S. Nghilh Lohna Par. Aizawl. Disola Lyngdoh (Mrs P.S Chawngthu). 2019. Print.

Mizoram University. Theory of Literature (Bu Thar). Aizawl: Department of Mizo, 2013.

Print.

https://www.britannica.com/art...

https://www.poetryfoundation.o...

- Rohmingthanga Ralte, Assistant Professor, Dept. of Mizo, Govt. Aizawl North College