Vai naupang sual kha!

Vanglaini chan­chinbu May 21, 2020 chhuakah ‘Vai naupang sual Ravi Zacharias!’ tih thupui mit la tak? kha kan hmuh ka ring. Ka khawvel tarmitin khawthlang lam chanchinbu ka han bih nghal a... 

Ravi Zacharias, India-born Christian apologist, dies of cancer

- The Week

Evangelist who built Global Ministry dies in Atlanta at 74 

- The New York Times

Ravi Zacharias, popular evangelical defender of the Chris-tian faith, dies at 74 

- The Washington Post

India ram chan­chinbu hlun, The Hindu-ah pawh hmun a luah nghe nghe a, ‘Author Ravi Zacharias no more’ tiin.

Kan hmuh ang khian, vai naupang sual a nihna hliah khuhin, Chanchin ṭha humhimtu (Christian apologist) ropui a nihna hian hmun a chang vek zawk a ni. 

Mi ṭhenkhat chuan Billy Graham kha Christian Evangelist (Chanchin Ṭha hriltu) ropui ber a nih thu an sawi ṭhin. Ravi Zacharias chu Christian Apologist (Chanchin Ṭha humhimtu) ropui ber tia sawi a ni thung. 

Mithiam leh mi chungchuang bik, mi ropui a nihzia keini mi mawl ber tan pawh hian a chiang reng mai awm e. 

He article ziaktu hian a thupui (heading) atan hmang loin sub heading-ah hmang zawk ta se, a pawmnahawm zawk ngei ang. A thupui aṭang ringawt pawh hian he vai naupang sual chanchin hi hriat a chakawmin, ngaihven a hlawh turah ngai ila, chhiar a hlawh hle ang tih a rinawm bawk. 

Kan duh tak, chhung leh khat, ṭhiante thih­naah ‘naupang sual chu nu, chu pa….!’ ti ta ila kan ngeng a chhun zawk ngei ang le. Chu nu, chu pa chu Pathian thu hriltu, Kohhran upa, rawngbawltu ropui tak a ni emaw Missionary ropui tak a ni emaw pawh ni se, mitthite chanchin ziahnaah, ‘misual chu nu, chu pa….!’ tih thupuia hman kan duhin a rinawm lem lo.

Ṭum khat chu ka nupuiin, “Mihring dam lai zingah tunge hmaichhana hmuh i chak ber? tiin zawhna min zawt thut mai am, chhan ngaihna reng ka hre hauh lo. Chutia ka ngaihtuahna a vah vel ruai hnu chuan, “Ravi a ni em?” a rawn ti leh hram a. Lu bu nghauh pah chuan, “Aw ni e” Kristian sakhua humhimtu ropui berte zinga mi, Ravi Zacharias hi ka chhanna chu a ni, ka ti.  

He vai naupang sual hi ka thisen zawm pui ni si loah chuan ka lo ral khat ngainat ve em em ngawt mai a ni. Ka nun hnar kaitu, ka rinna min sawh nghettu pawimawh a ni ta reng a nih hi.