Mizoram politics leh sum
Ziak mi leh politics lam hria pawh ni mah suh ila, Mizorama sum leh politics inkungkaihna, chu sum avanga political party keh chhe tawh, keh chhiat hmabak, sum hi thil zawng zawng tehna atana hman avanga kan buai theih dan hi tawi te tein mahni thiam angin rawn au chhuah pui ve ka duh. Mimal thlirna mai a ni a, a duh tan a chiang zawka sawi chhunzawm atan a khuh hawngtuah ka ṭang dawn a ni mai.
Tun hma khan Congress term hmasa khan sum leh paia rinhlelhna, sum eirua in puhna kha a tam hle mai. Khatih hun lai khan tunlai ang hian social media hi lo awm ve hman ta se Pu Hawla te kha kan chhuah chhe nasa dawn a, Chief Minister kha eirua puhna awmah khan an han khing tlat te kha an awm a ni. Kha hunlai aṭang tawh khan sum leh pai leh politics in tialtual chhoh dan hi kan lo hre ve riai ruai tawh a, khatih lai khan Congress Minister zingah hausa bikte kha an awm tih kan la hre ṭheuh a ni.
1998 ah MNF an rawn lang ta a, beiseina sang tak nen kan lo thlir a. A hmaa Congress sorkar ninna nasa bawk nen an term hmasa kha chu sawiselna pawh a tam lem lova, nimahsela an term hnihna meuh kha chu sumah ber mai khan an hmingchhia a ni. Minister hming mal te te chu sawi lo mai ila, Chief Minister ho ho khan suma rinhlelhna kha a lian ta a. Mawza man to, BAFFACOS sum, toilet van, thlam, building chhawng bo, contractor chuam nei, supplier thiltithei bik kan hre ta mawlh mawlh mai.
MNF chu an tla ta a, Congress bawk kum 2008 aṭangin an han lal leh ta a, Pu Hawla ber hi rin aiin puh hmingchhiatna tur sumah chuan an hmu ta vak dêr lova, tunah Pu Hawla chawlh tak avanga Congress thar din tum anga insawi zinga Minister hlui te, party worker hluite zawk zawk hi sumah hian an hming a chhe tlat zawk lo maw? Congress aṭanga chhuaka party lam zawm ta Congress hruaitu hlui te hlei hlei sumah chuan an hming a chhe ta hle zawk lo maw? tihte hi rilru ngaihtuahna vak vel a ni.
Depertment ṭhenkhat hnuaia hna chu sum atchilhte tlat nen intiam rualin a zavai deuhthaw khan hui duak duak an awm a, Bhawan lam pawh an thinur hle an ti a ni.
Kum 2018-ah Congress chu zu zawrh duhlohna thawm lian tak, ZPM boruak thar nena rawn lang leh MNF cheng nuai 3 tawktarh leh Congress hruaitu ṭhenkhat bang boruak nen MNF chu an tling ve leh ta a, tuna kan sorkar hian an sawi tam ber pakhat chu sum a ni.
Tuna MNF sorkar hi sum vanga tling thei (Nuai 3 intiam) an nihna lai a awm a, hei bawk hi an tlak phahna a nih hmel ta riau. Chief Minister Pu Zorama'n hman ni khan SEDP sem chungchang Kolasib-ah cheng sing 5 sem tur a sawi a, campaign laia kan dil pawh ni miah lova nuai 3 sawitu khan sing 5 chiah a sawi ngam tawh a ni.
Inthlan campaign laia pawisa tamzia sawi ṭhin MNF hian pawisa awm loh thu hla an sawi nasa ta si a, mahse Minister ṭhenkhat duhsaktu nei chuan sum a awm thu lam a sawi lauh lauh reng bawk a. Hnam Run Whatsapp Group hmu ve phak lo mah ila a hre chiangte chuan sum nei leh nei lo inkar hian ruling hi a lo tibuai hle tih te an sawi ta hial mai.
Politics leh sum hi chu tlinna leh tlakna chhan tling a lo ni a, Myanmar Kuhva tawlh ruk pawh man ngam lovin sum hmang bawkin kan hotute hi an lo thlung bet daih tawh zawk a ni lo maw? I ngaihtuah chik ang u.
- Lalṭanpuia (ṬP-a)