MIZORAM FUTURE A BRIGHT VE RENG

Mizoram hian rambuai hun thim avangin kum 20 zet hmasawnna kawng zawh hleithei lo mah ila, NE state 8 zinga naupang ber, kum 35 lek a upa kan ni chung hian kan hnufual ber lo chiang a nia. Kan hmasawnna lai te, hmasawn zel theihna chance kan neih zawng zawngte nen a eng zawnga thlir phei chuan kan future hi bright deuh a ni.

Heti zawng pawh hian a sawi theih ang chu - 'Mizoram hi NE State zinga naupang ber ni mah ila, state kum naupan dan ngaihtuaha hmasawn chak ber kan ni' tiin.

State kan nih hnu kum 35 chhung leka kan hmasawn dan en hian, kum 60 vel state kan nih ve hunah chuan tuna kum 60 vel state lo ni tawh Nagaland dinhmunte khu chu kan lehpel thui khawpin a rin­awm. Manipur, Meghalaya leh Tripura-te anga state kum 50-na kan lawm ve hunah ngat chuan heng state-te hian min chung en khawp bawk ang. Tunah pawh kawng tam takah chuan min tluk loh en ve tlat tawh a nia.

Keini aia kum 11 zeta upa Sikkim-te hi tuin nge Mizoram aia dah chungnung zawk awm che u? Kha daih kha asin! Mizoram future hi a bright zawnga thlir chuan bright ve deuh a nia; kan state kum hi a la naupang lulai em mai pawh a...!

State naupangte ni chungin power lamah kan intodelh mek a, Ministry hmasa hunlai aṭanga project kal tawh Vankal Solar Park (20 MW) hi hawn an tum hnai niin a lang a, hemi nen phei chuan 70 MW aia tam Mizoram hian kan siamchhuak tawh dawn tihna a ni a, kan mamawh khawp kan nei titih der tawh. Kan harsatna ber zawk, power supply kan neih loh fo ṭhin chhan chu a semdarhna hmanrua zawk hi niin a lang.

He hnam naupangte hian nasa takin zirnaah hma a sawn a, school leh college ṭha pui pui bakah University ṭha tak tak (MZU, ICFAI, etc) kan nei a. Airport leh rel kawngte kan nei a, sorkar hospital leh private hospital tha tak tak bakah Medical College hial kan nei ve ta. Sorkar hnathawk lote pawhin sorkar ruahmannain Health­care ṭha thawkhat tak kan nei ve ta bawk.

Mizoram kil tinah kawngpui a thlur seng sung a, siam lai mekte a zawh hunah phei chuan kawngpui hi kan nei chhe dawn miah lo.

Kan awh em em ṭhin Sipai School kan tih mai, Sainik School, Chhingchhip-ah kan nei ta a, kan khelmualte lah phul lem hmangin a hring ta dep dup mai. Kum reilote chhungin Mizo ṭhalai, infiamna hmanga eizawng za tam rual kan nei ta. "Khelmual ṭha... khelmual ṭha" tia Lammuala kan aurual dual dualna kha kum tam a la ni miah lo a nia.

Tuna kan dinhmun hi kum 20 hmalama Mizoram dinhmun nen khaikhin ila, a hre pha chin tan chuan 'a ropui' takzet a ni!

Sumdawnna lama Mizoram hmasawnnate hi a ropui hlei hlei. Tun hmaa kum upa zawkte chauh sumdawng lian awmna ṭhin Mizoramah hian ṭhalai, kum naupang te tein sumdawnna lian tak tak an din ta sung sung mai a, dawr lian tak tak a ding ta khep khup mai.

In leh loahte hlei hlei hian hma kan sawn a nia - building lian leh tha tak tak a tam ta a, veng tin, khaw tinah sak lai mek hmuh tur a tam hle bawk. Human resources ṭha lutuk kan neih hi kan hman thiam lehzual hunah phei chuan Mizoram hi kum 20 chhung lekin state dangte awh rawn kan ni thei chiang a ni.

Thingtlang lo neitute leh khawpuia mi retheite dawmkanna lamah hmalakna liantham, awmze nei kan neih leh theih chuan Mizoram hi India ram state zinga changkang ber leh hmasawn ber kan ni thei chiang a ni. Chu chu Politics lama Political Party-te kan intlansiakna lian ber, kan inzawrhna lian ber a ni chho mek bawk.

Duhthusam phak hauh lo mah ila, Mizoram future hi bright ve deuh a nia!

- C. Lalhriatpuia