Economic reform kan mamawh - In dam tlang em?

Damah dam luat aawm lo va, dam loh luat erawh chu thih hlen vang vang theihna a ni. Kan ram dinhmun hi heti zawng hian i lo thlir ve tawh ngai em? Eng vangin nge miin sum tlem te avangin tual a thah? Eng vangin nge inrawk, insuam, inbum leh sum thianghlim lo a tam tak em em? Kan ram hi kan vannei a, kristianna hian pawi nasa lutuk khawih lo turin min veng hram hram zawk a ni.

Heti chung pawh hian kan ramin a thlen chin leh dai chin chu kan hria e. Sualna zawng zawng lo awm chhan hi thil pakhat han puh mai chu a dik ber lo mai thei mahse heng zawng zawng phenah hian mipuite retheihna a inphum a, dik tak a tih a mual eng hmuh phak lohna chuan dik lo chung pawh a hlawkna zawng turin a nawr lui tih a lang reng mai.

Eng vangin nge khawtlang duh loh tih hre reng chunga hmeithai retheite lehnghalin zu a zawrh? Engvangin nge miin drugs a tawlh ruk fo? Khawtlang leh ram tan leh mahni ei in leh silhfen mamawh neih ve nan leh hlutna chhe te tal neih ve an duh vang a ni. An sual vang pawh a ni mahna, he tih rual hian kan ram politic rorel khawlpui ṭhat loh vanga ram economy leh kan ram hruaitute policy thianghlim loh vang a ni mai lo maw?

Tun dinhmunah hi chuan a thawk rim apiang an rethei ni mai hian a lang. Rualpawl tawk ni tur chuan awmawl tak chunga sum tam tak lak luh a ngai a, chumi atana kawng awm chhun chu rilru thianghlim lo pu a, mi nu leh nula tan pawh a thil ti theitute bem thiam thiam leh mi nupui pawh pawisa lo va, inrem siam pui leh sawrkar hna leh contract lian thawh a ni mai. Kan ram hruaitute hian din chhuahna ngei tur an fate thawh atan pawh a, an iai loh tur thil min kawhhmuh ngai em le?

Hawh teh u, kan economic structure hi i siam ṭha teh ang u tih hi tunlai boruak inlumletah hian ka thawh ve duh a ni. He lam kawnga mi thiam pui pui pawh in tam hle a ni lo’m ni? Thawk nasa apiang an hlawkna, hahdam apiangin an hlawh tlemna ram i din thar teh ang u. Kan ram dehchhuah a lo pung ang a, dik lo taka sawrkar hna leh contract leh therhlo kan inchuh ṭhinna hi a lo kiang duak ang a, ram a hausak mai bakah ram hruaitute tan pawh dik taka ram hruai theihna hun ṭha a rawn in hawng ngei ang.

Tunah hi chuan nun khaw chhuah tumin kil tin aṭangin kan nawr luai luai a, ram hruaitute pawh hian an duh leh tum vang reng pawh ni lo va, tu te emaw paih chhuah leh dai fuh loh chang te an nei fo ṭhin a ni zawk. Siam ṭhatna a awm chuan inhlanna pawh a awm ṭhin a, a rah erawh ram tan thlum tak a ni.

Hmawlhte pakhat ai chuan hmawlhte sawm intelkhawm chu thliah a harsa zawk an tih ang in, keini mipui lam pawh hi kan intelkhawm a kan ṭan rual phawt chuan kan tu leh fate zel tan ram nuam leh duhawm kan siam thei ngei ang. Min dotute lakah pawh kan tlawm ngai lo vang.

- Vanhlunmawia Chhakchhuak