HRIPUIIN A HRIN ZEPUI PAHNIH

Chuvangin ni ṭha lovah chuan indo zawhna tur leh in tih zawh vek hnu pawha in theih nan Pathian ralthuam famkim chu la rawh u; Ephesi 6.13

Mihring chhungril nun ze dik tak pho lang a haichhuaktu ṭha ber chu tuarna leh harsatna hi a ni. He hripui leng mek avang hian khawvel ram hrang hrang bakah kan Zoram (Kristian ram) ngei pawh buai em emin, hripui kai leh thihpui hial te pawh kan lo awm ve ta. 

He harsatna leh buaina hian mihring nunah zepui pahnih a rawn tarlang a ni. Mi ṭhenkhat chuan mi harsate ṭanpui nan leh chhawmdawl nan an tha leh zung sum leh pai leh hmanrua te leh ei leh ber turte an pek chhuah laiin, 

ṭhenkhat chuan an thil neih te chheprelhin a thlawna dawn tum ranin an khawsa a. An dawn ve loh ṭum chuan ṭawngka a vuiin leh social media-ah te an phun chhuak bawk. 

Chhungkaw ṭhen­khat chuan inngaihsak tawnna leh ṭanrualna chang te hre tharin kan chhungte hi harsa zualah ngaiin miin chhawmdawlna an pe ang tih hlau a, kawng hrang hranga an ṭantlan laiin, chhung­kaw ṭhenkhat chuan an chhungte thisen zawmpui ngeiten ṭanpuina leh chhawmdawlna an dawn pawhin an zak der lo. Zah a hnekin an dawn loh chuan an vuipui lek lek zawk nia! 

Khaw ṭhenkhatten an thlai thar lak khawm leh an lei belh te chu khawpuia awm an hmelhriat pawh ni lo te ei atan motor hmang te a an pek lai leh khawpui miten sum thawhkhawma ei tur te leia thingtlang lama motor hmanga an sem chhuah mek laiin, mi ṭhenkhat chuan an thlai thar te chu ni danga an hralhna aia toin an hralh a. Dawrkai ṭhenkhatten Lockdown hmaa an bungraw lakte a rate pangngai aia toin an hralh ve bawk a, an zak chuang lo. 

Mi ṭhenkhatten mani hna kalsan a ram leh hnam him nana tha leh zung an thawh chhuah pui laiin, mi ṭhenkhat chuan ruihhlo ringawt an lo buaipui a, Task force te thuawih lo kan awm bawk. Chhungkaw ṭhenkhat ten lock down chu Bible leh lehkhabu ṭha chhiar nan te, chhungkuaa Pathian biakho nan te hmangin kohhran inkhawm bi pangngai-ah chhungkuaa inkhawmin thilpek te an la khawm a. Nilai zan thupui leh SS zirlaite an zirho a, chhungkaw ṭhenkhat chuan Biakinah lo chuan Pathian hi biak ho turah an ngai lo a ni mai thei, an chawl hmak mai nia! 

Ram hruaitu ṭhen­khat leh damdawi lam hnathawkte leh mi tlawmngaiten thih huama an pen chhuah laiin, ṭhenkhat chuan he hrileng hi sum siam nan hman an lo tum tlat nia! Ni e, harsatna hian mihring nun chhungril a hailang chiang ngawt mai. He harsatna hian eng chen nge a daih dawn, eng chen nge kan la buai dawn a hriat loh, ...ber thla te chuan kawl a eng tawh mah na. He buaina hi a rei emaw, a rapthlak emaw kan dam khawchhuah theih nana pawimawh ber chu Pathian ral­thuam hmanga kan lo hmachhawn hi a ni. 

Chuvangin, ni ṭha loah chuan indo zawhna tur leh in tih zawh vek hnu pawha in din theih nan Pathian ralthuam famkimin inthuam rawh u. Amen.