Nuclear bomb neih a ngai! (Russia leh Ukraine buaina)

A khuhhawnna

Japan ral lian an tudai tak tak theih loh hnua U.S.-in Hiroshima leh Nagasaki-a nuclear/atomb bomb a thlak chiah mai chu, Japan an zawi nghal hnawk a, tho leh tur an awm tawh lo. Khawvel chuan bomb tihbaiawm leh tawrhhlelhawm tak a nei ta!

Nuclear bomb nei ve lo tan invaivung leh inlak vung theih a ni ta lo va, indona leh inepna a awm reng reng pawhin a huangtau tauah an ṭang a, khawvel police lal ber ni awm ziazangin U.S. phei chu a hawina lam apiang phin darh thei a ni ta mai.

Kar lovah ram pakhat inlunling fal bik tur chu ngai ngam lovin USSR, Britain, China leh France te chuan an tipuak ve ta un un mai a. India leh Pakistan-in 'Eng nge in nih bik?' tiin a za tel an kawl ve leh ta mai bawk. Hmelma ramin a hual vel Israel hian thawm dik takin eng emaw zat chu Nagev thlalerah a thukru khiau a, North Korea lahin huphurh ram pakhat mah a nei hek lo.

Nuclear bomb za tel dahna ramah kan cheng mek a, he bomb hlauhawm tak hi khawvel mipuiin an dodal a, ṭha an ti lo va, phelh darh vek a, tihchhiat vek ni se, tiin kum tam kalta aṭang tawh khan an lo aupui tawh. A hnathawh dan, a thil tihchhiat theih dan leh a thawh nat dante hi ngaihnawm tiin, zirchiang ṭhin mah ila, he leia a awm ve reng hi ṭha ka ti ngai lo va, ka la thlawp ngai lo hrim hrim.

Heng bomb te hi a hmantlak tak tak lo va, himna ai mahin hlauhthlawnna nasa zawk min thlen a, tihpalh thil thuah ringawt pawh kan ral duak thei lehnghal. Kum 1998-a India-in a han enchhin hnu phei kha chuan ram thiltitheiah India a inhlangkai ta niin, Indian mipuite ngei pawhin an inngai a, US tluk ta thuakah an inruat thul. A nihna takah chuan Pakistan leh North Korea te nen level khat angah ngaih a la ni tho.

A chiang chho ta!

Russia-in a ṭhenawm Ukaine laka a han inluling tak tak a, 2014 kuma Crimea bial a hnehchhuh tak maiah khan ka ngaihdan a inthlak nghal chiang hle. Tunah ni se, a ram bial khat mai ni lo, a rampum anga run tum ni awm takin, ramri hnaih lamah Russia sipaite an inchhek muk tawlh tawlh mai bawk si a, eng emaw hlekah insai pawp pawp thei dinhmunah an ding reng. Heta thil chiang tak lo lang chu, Nuclear bomb hi hmantlak loh a lo ni reng reng lo va, mi vauzamnan leh rehbehnan a lo ṭangkai mai mai khawp, tih hi a ni.

USSR a kehdarh siper ram zinga mi ni tura 1991 kuma USSR aṭanga Ukraine a indan khan nuclear bomb 1,190 vel a chhawm tel nghal a, Britain, France leh China-a nuclear bomb belhkhawm ai pawhin a la tam zawk nghe nghe. Vanduaithlak takin kan ti dawn nge, Soviet Union kehdarh khan a inpui ni ṭhin Russia chu tunhma pha leh ngai tawh lo turah a ngai a ni chek ang chu, a kuta a kawl nuclear bomb te chu tihchhiat vek atan Russia kutah a hlan ta mai a. Chumi thungrulhnan US, Russia leh Britain te chuan Budapest Memorandum on Security Assurances-ah thuthlung ziakin Ukraine ram himna chungchangah assurance ṭha tawk pek a ni ang, tih a ni a, khawvelin kutbengin a lawm a nih kha.

Vawiinah hian tu tlangaupui kher mah ngai lovin Ukraine hian a tisual lailet der tih a hmuchiang kawk kawk mai a, engti kawng zawng mahin a ṭhenawm Russia nek ngam tur ziazang a ni tawh lo. Russia chuan a sipaite tirin rei lo te an ram bung pakhat chu an laksak ta mai a, Ukraine chhak lam biala cheng Russian hnamte chu an thaw pawr nasa nghal hle a, Russia rama rinluh an nih theihna turin tun hi hun ṭhaah an ngai a, phur namen lovin an phur tawh.

A pawi ta deuh deuh

Hman deuh mai pawh khan Russia chuan a ṭhenawm Georgia (USSR kehthem tho) chu a sipai chakna hmanga luhkhungin, Russian mi leh saho chen tamna South Ossetia leh Abkhazia te chu a enkawlna hnuaiah a dah tawh bawk a, Georgia sorkar khan tik tek pawh a tingam lo va, a uipui tuilian thlir vel ta mai mai a ni. Ralthuam ṭha tak tak nena thuam Russian mi leh sate chuan heng lai bial vela an thisen zawmpuite nena ṭangkawpin Ukraine chhak lamah um darh ngaihna awm tawh lo khawpin an hawi 'champ' mek a nih hi.

Nuclear bomb nena inthuam Russia hmachhawn tak tak tur hian Ukraine sipai leh police te hian tha an nei meuh lo va, an khawsak leh chet vel dan han en hian an zam tih phat rual a ni lo. An indan tirh laia nuclear bomb an lo thawn kir leh ta mai pawizia hahipa sawi bak thupui hlapui vai chiam tur an haihchham khawp ang le.

US leh European ramte hian Russia an han hrek ṭanna a, Russia gas supply vanga tukṭhuan leh zanriah kil theia awm mek Europe ramte hian, an mamawh chakkhai lakna ber Russia lakah hian an ṭawng pawr ngam chuang lo. Gas supply a tihtawp a, khawthlang ram investment lian thamte a nationalized vaih chuan Europe ramte hi a chawh tur zinga mi tho an ni.

Ukraine himna chungchanga khawthlang ramte'n thutiam an neihte chu indopui pahnihna thlen hmaa Czechoslovakia laka thutiam nen khan awmzia a neih loh dan a inchen. Hitler-a'n Czechoslovakia rama German mi leh sa tlem awmte himna tur tiin, Germany kha an lut phei ta a nih kha. Hetiang deuh chiah hian Russia chuan Ukraine chhak lama ami leh sate himna tur tiin a inchhawp lut ta a, khawthlang ramte chuan an thlir liam a ni ringawt mai.

A chiang a ni lawm ni?

Helam daih daih aṭanga Ukraine boruak lo ngaihven chiam chu a harsa viau pawh a ni thei a, US inluling lutuk lo ngei ru viau ṭhinte tan President Putin-a'n khawthlang ram ka a hup hmak dan hi a hlimpui theih viau bawk ang. Pakistan hian India rama Muslim tamna chu rawn humhalh tum ta se emaw, Bangladesh sorkar hian Assam-a ami leh sate thlavang hauh tumin rawn thawk chhuak rup ta mai se, engtin nge India hian a chhan let ang?

India hian sipai chak tak a nei a, Ukraine leh Georgia ram ang lovin heng vauna leh rikrapna hi a chhang let thei ngei ang. USSR ropui vang lai kha khawthlang ram tan chuan ngaimawh awm tak a nih avangin himna chungchangah ram tam tak chu thutiam neihpuiin, guarantee ṭha tak tak an pe a. Tunah erawh USSR a awm tawh lo va, khawthlang ramte hian an hlawkna tur leh hamṭhat vena tur a awm lem loh chuan midang himna humhalh hi a taka tihhlawtlin kawngah an thatchhe nghal vek tawh a, kaihthawh tak tak har tak an ni ta. Ukraine-a thil thleng aṭang hian ram chak zawk leh thiltithei zawk pawh ni se, an thuhnuaia intulut a, him hle tura ngaih ve ngawt kha a lo hrisel lo hle tih a chiang ta uar mai.

Himna puanzar derthawng

Japan leh Korea te chuan nuclear bomb neih lam ngaihtuah lovin U.S sorkarin himna puanzar a pharhsakah an intulut felna a rei tawh a, amaherawhchu Ukraine boruak aṭang hian ngaihtuahna thar an nei mai lo vang maw? Tun aṭanga kum sawm chhung hian nuclear bomb neih ve ngei an tum lo vang tih a sawi theih loh. Iran leh Iraq ngaimawh em em Saudi Arabia pawh hian U.S. sorkar venhimna hnuaiah bawk a awm mek a, Iran-in nuclear bomb a neih lohna turin a theih ang tawk tawkin hma a la ve reng tho. Ukraine boruak aṭang vek hian Saudi Arabia hian U.S. intiamna hnuaia awm rengin awmzia a lo nei lo hle, tih hmuchhuakin a ruk têin he bomb nei tur hian a phe ve nghal vut vut lo vang tih tu nge sawi thei?

US chuan Iraq leh Afghanistan ram a run a, Libya-ah bomb nasa tak a thlak bawk. Heng ramte hian nuclear bomb nei ta se, U.S. hian a bei ngam chiah ang maw? A chhanna chu hei hi a ni: North Korea hi han en ila, U.N. dan leh hrai vawi tam tak a bawhchhe tawh a, South Korea indo lawng a kahchhiatsak a, East Asia ram tan phei chuan muttui lohna tham an ni der tawh chung hian U.S. hi a inrawlh thuk ngam chuang lo. North Korea hian nuclear bomb nei miau hek!

A khuh kharna!

Nuclear bomb nei ve lo ram tana zirlai zirtur chu, a remchan huna tlanchhe leh mai tur super power ramte thutiamah innghah bur loh hi a ni mai. Ralthuam tihtlem lam phei chu sawi rik ngam pawh a ni ta lo. A theih dan dana nuclear bomb neih ve mai dan zawn a ngai ta.

Nuclear bomb hian ram inrun leh inhnehchhuh tur tam tak a lo dangbet tawh a, chutih laiin, tihpalh thilah inralsai mai pawh thleng thei reng a ni. Himna pawh a him lohna hmunah kan cheng chhung hi chuan thin thia muthilh tak tak theih a ni dawn chuang lo.

- Robert Zoliana