Vai an lo lut a nia!

Kan ṭhenawm State Assam in National Registration of Citizen (NRC)-a pharh achinah an state chhunga dan lova awm mipui 40,00,000 (nuai sawmli) chuang zette chuan an hma lam hun tur an ngaihtuah a, Assam hnaivai state hrang hrangte chu hmu tâi hle tih a hriat a. Tu state hruaitu mahin dan lova an rama lut tura lo phalrai chi a nih loh avangin state hrang hrangte pawhin ramria venhim hna thawktute an fuihin an ngaipawimawh thar hle a.

Chutihlaia Mizoram sorkar-in ramri venhim lama thupek thar a chhuah hriat tur a awm tlat lo mai te, Vairengte check gate lam a thuam chak thawm hriat tur a awm hauh lo maite hian kan ram hruaitute hian ram an hmangaih miah lo tih an sawi ṭhin hi a nemnghet ta riau mai. Hmangaihna hi ṭawngka maia lantir chi a ni lo va, hetiang hunah hi chuan Mizoram an hmangaihna hi thu leh thiltiha an lantir kan lo beisei ve viau ania. Vaupung te han tina viau vel se la, inthlan a hnai bawk nen mark an score ṭhat dawn tehlul nen.

Nitin zantin deuhthaw NRC-a chuang lo, ILP nei bawk lo vaihoin rawn luh ruk an tum laia awm hle hle thei ram hruaitute hi eng hmanga koh harh chi nge maw an nih dawn le? Tu emaw Petromax thar neiin a nupui thih zanah pawh "Pawimawh fetah lo chuan hmang dawn lo reng reng" a ti tlat ang chauh kha an ni dawn em ni? A hunlaia che ṭha duh mang si lova, a chhiat vek hnua ngaihdam dil leh ringawt te hi an lo tum leh mai nge ni aw?

Central YMA ruahman angin Sept. 13, 2018 (Ningani) zanah ram pumah dan lova Mizorama lo lut vaiho dap thut an ni a, zan khat lekah ILP nei lo mi 873 zet mai an han man thei ania leh! An man sa pakhat lah ram venghimtu tur lam zawk police pakhatin Rs.650 lek chawitirin a lo chhuah lehnghal a; heti em em hian a ni maw Mizo hnam hi kan lo tenawm le? Sum tam tham deuh phei chu hmu dawn ila kan Mizona thleng hian kan phatsan hreh lo hlawm mai awm asin!

Check gate-a duty hlawkzia te, thamna pawisa pek chuan dan lova vai an lo luh mai mai theih ṭhinzia te hi titiah kan lo hre ve tawh ṭhin a. 'Pân lovah tho a fu lo' tih angin dâwt vek a nih ring bik lo chhin ta ila. Chutiang a nih si chuan kan ram hruaitute hian tun dinhmunah lek phei chuan ramri vengtu lam thuam ṭhat leh fuih ṭhat an ngai hle a ni tih hriain police an dah belh lo a nih tal pawhin fuihna awka tal chu neih a va hun ve le. "Ramria duty te u, in kutah kan ram leh hnam himna hi a innghat a, kan ring tawk che u a, min bum suh ang che u aw. Sum hmangin kan ram leh hnam hi hralh lul suh ang che u" tia fuihna thu tawite lek tal pawh hi ram hruaitu ka aṭangin han chhuak se, 'ram hmangaihtu' tiin kan thlamuanpuiin kan fak leh luih luih mai tur a nia leh!

YMA leh MZP te zawkin an vei a, zankhuain an in-duty chhawk a, dan lova lo luh ruk tumte manin an thawn let chur chur reng a, hengte hi sorkar tan chuan thil zahthlak a nih hi mawle. Hetiang a nih laia ngawi reng thei ram hruaitute hian he ram hi hruai zel tumin tun inthlanah an la in-candidate leh dawn chu a ni awm si a, mipui lah hi min dawi â hneh tawh bawk si, a dum hi a var tiin kan han vote leh chur chur mai dawn chu a ni si a le! Eng tikah tak 'ṭha lo' hi 'a hmantlak loh' a ni tih hi pawm ngam ang i maw?

YMA leh MZP te u, tha thlah lovin ṭang sauh sauh teh u, dan lovin vai an lo lut a nia!

- Vanrambeiseia