SA UI TAN LEH A CHHEH VEL

“Remna Sa ui tan a hun tawh” tih thupui hmangin Vanglaini April 23,2020 chhuakah khan Lalhruaitluanga Bawitlung khan Article a rawn ziak a, a thuziah kalhmangah chuan, Covid-19 dona turin kan sawrkarin hma a lak 

ṭan tirh khan, CM hova Minister ṭhukhawmte'n (March 19 ah) sawrkar hmalakna thlirin, CM, Finance Minister ni bawk chuan a ṭul ang zel sum ruahman a nih tur thu a sawi a ni.

Hetia sum leh pai ruahman a nih mek lai hian kan Health Minister chuan Union Minister hnenah covid-19 kaihhnawiha hmalakna tur point 6 a thlen bakah, ZMC-a covid-19 testing laboratory din nana hmalakna kawngah Central, ICMR leh NIV hnenah lawmthu a sawi a ni. CM hnena thlen awm tak, a thlen si loh bakah, lawmthu sawinaah pawh CM a hmer tel lo, a ti a ni ber.

A ziaktu Hruaia hian CM leh Health Minister, tun ang huna inkawp tlata ṭang dun tur ni si, an inkara khi nasa tak, mipui pawhin an hriatpui hi pawi a tiin, hotu lian pahnih inhmuh thiam lohna avanga a lal lo zawk rep rikngawt hi tun Mizoram dinhmunah mipuiin kan tuar thei tih hriain, an pahnih hi inrem se tih mipui duhna avangin, Sa Ui tan hi hun a ti a ni.

Hruaia thu ziah hi April 30, 2020 Vanglaini-ah Pu R.Lalhmangaiha, MNF tana duty leh thuchhuah siam thu khan a rawn sawifiah (nge a chhang) a, a thupui ah, “Inremna sa ui tan a hun tih kha” tih a rawn hmang. CM leh Health Minister inkara hem thlak tumna, inchirh thehna, party hamṭhat nana lak tumna leh zeldin thu bawl chiam nia sawiin, “Mipui pawhin kan hria a ni," a ti a, Hruaia “mipui” tih leh Hmangaiha'n “mipui” a tih hi an thuhmun lo phawt a, an kehme tih a inang ta lo a ni.

Pu Hmangaiha rawn tarlan (sawifiah) dan tlangpui hetiang a ni.

a)    Pu Zorama leh Pu Thangtea inkar hi a khi a ni lo va, Pu Zorama hriat lohvin Pu Thangtea hi foreign-ah a zin hek lo. Foreign-ah a kal turin zalenna famkim a pek piah lamah a theih chen chenah hma a lakpui zawk a ni.

b)    Health Minister-in Mizo Hnam Runah USA zin report a pek ṭum khan, “Tun ang tluka Chief Minister ṭha Mizoramin kan la nei lo, kawng engkimah chung lam hi a koh thlen theih” tih thupui hmangin report chipchiar takin a pe a ni.

c)    MNF party chu an hotute inkarah khi awm ang leh, inepna boruak awm anga lantir a tum tih a chiang a, MNF President te, Health Minister leh hotu dang pawhin MNF chanchin an sawi tam ber chu an thawhhona a ṭhat thute, an inkar chu Kahpathir anga muk leh sakhat, boruak leh rang pan tê pawh leng lo a nih thute hi a ni.

Hruaia hian party leikapui aṭangin MNF hi a va puh chheh leh nge, Hmangaiha hian an pute thlavang hi a phawvuakah engmah hre lovin a lo hauh tih hi hriatchian a ṭha a, he mite article a chhuah hma hian boruak hi mipui hriattheihin a lo awm tawh hrim hrim em tih thlir thuak teh ang.

ZOZAM NEWS : FEB 13

Rorel lai party MNF chhungkuaah tunlai hian ineprukna a awm nia ngaih theihin chanvo pawimawh chelhtu ṭhenkhat vuivai thawm hriat tur a awm a, MNF Gen.Hqrs a hotu zinga mi pakhat chuan an party chhungah ineprukna a awm ngei niin THE ZOZAM TIMES a hrilh.

MNF-in sorkarna an chan hnua an party-a chanvo pawimawh hrang hrang an inremkhawm chhoh danah lawm lo pawl an awm a. President-in a thawhpui tur a thlan zingah party Vice President ni lai pahnih an tel tak loh hnuah a khát tàwkin vuivai thawm hriat tur a awm reng a. Party-a chanvo hrang hrang ruat chhoh a nih leh tak hnuah phei chuan MNF party chhunga ineprukna thawm chu pawn lam mite hriat khawpin a ring chho ta niin party hruaitu pakhat chuan a sawi.

Thu dawn danin, Vice President chawl ta pahnih, R Tlanghmingthanga leh Dr R Lalthanglianate lamṭang nia ngaih theih, eptu an nih laia akul ataia party-a lo inhmang tawh Lunglei Sub-Hqrs. Vice president Sawmkima chu chawlhtir a ni a, Vice President kalchhuak tate lamṭang nia ngaih theih MNF ṭhalaia Vice President pawh hruaitu ruat thar zingah hian a hming a lang ve lo a ni. 

MNF Gen. Hqrs. hruaitu 26 lai ruat tharah hian senior tak tak, eptu an nih laia akul ataia ṭang ṭhinte pawh lang lo an tam a. Thu dawnna chuan, hruaitu thar ruat chungchanga lungawi lo zingah hian Hnam Run hnuchhawn ṭan an awm laiin, ngawih chuh hmakte pawh an awm nual thu a sawi.

MNF Gen. Hqrs.-ah hian tlatlum group leh tlatlum ta lo - pute tlawn rikngawt hnaa nei pawl an inṭhen phawk tiin, MNF hruaitu pakhat chuan THE ZOZAM TIMES a hrilh a ni. MNF party-a hruaitu lian pakhat chuan Aizawl pawn lama block leh unit hruaitute zingah pawh party puia chanvo inruat chungchangah rilru dam kim lo an awm nual niin a sawi a, AMC leh local council/village council inthlan lo awm turah pawh hian beisei kan phak lo mai ang tih a hlauhawm a ni, a ti bawk.

Feb 20.2020 Vanglaini

“Hotu lam a khi” tih thupui hmanga L R Mawia ziah dan thung - Tunah hian ruling party chhungah ṭang ṭang awma inhruipawhna lian tham a awm mek tih hai rual a ni lo. Ṭhenkhat chuan MLA an neih zatte an inchhiarsak hial a, Mizoram chanchinbu darh zau tak pakhat THE ZOZAM TIMES chuan MNF party chhung boruak hi headline-ah a ziak ta hial mai.  

He party chhunga khi awm hi char phui theih a nih lai hian char phui vat a ngai a ni. Char phui theih loh khawpa a khik zau hi party hmangaihtu tan chuan a hlauhawm, tun hi ṭan hun lai tak a ni.

Hruaia leh Hmangaiha an inchhan vel hma aṭangin a chunga tarlante hi chanchinbuah a lo chhuak tawh a, Hruaia hian a va puh chhe ngawt emaw, hem zeh a va tum ngawt emaw chu a ang lo va. Hmangaiha hian a sawifiah viau naa, mi pakhatin, 'Ka zu man batna nu ka hêlna kawngah ka bat tam lehzualna nu ka tâwk a' tih ang deuh a ni a, an hotute inkar hi kahpathir anga muk leh sakhat, boruak leh râng pante pawh leng lo tih a sawi bawk si.

May 6.2020 Vanglaini

“Remna Saui tan tih kha” tih thupui hmangin Lallianmawia’n a rawn ziak leh a. A ziah danin - Health Minister ber khan CM nen an inkar a ṭhat thu leh, an inkar boruak engmah a awm loh thu a rawn sawi chhhuak ve tlat mai a… keini politics lama hnuhma nei lo leh ralthlir tan chuan kan article hrim hrim kha chu huat tur âwmah ka ngai lo va… Health Minister a rawn ṭawng chhuah kha chuan, “E khai, kan ngaih aiin thil hi a lo serious thei dawn a nih hi” tihngaihtuahna…

Engpawhnise, sa ui tan chu kan hotute zingah a ṭul emaw, ṭul lo emaw, kan zavaia kan do rawn covid-19 hnehna kawnga kan kal tikham lo turah ngai ila. Kan lei do hi hnehho phawt ila, chumi hnuah Hnam Run lam chu an lo inchingfel thei turah i ngai ang u.

Mak danglam ve mai mai erawh chu kan ruling hotute'n an thawhhona a ṭhat thu te, an inkarah khi leh inepna boruak awm reng reng lo ni si, an sawi tam ber ni bawk si hi a ni. 

Sapui a hlauhawm lo, tihna hmunah chuan a lo hlauhawm ṭhin, kan taksa a pem a, a na lo ve kan tih chuan a lo na nge nge ṭhin. Kan inkarah khi a awm lo va, inepna pawh a awm lo ve kan tih chuan ngaihdan neih mai a awl. Covid 19 pawh a hlauhawm em em lo ve, kan tih hian, a hlauhawm hle reng tihna a ni thei ang.