SERAMPORE COLLEGE HMASAWNNA THENKHAT

Serampore College-ah hian Pathian khaw­ngaihna leh hruaina in kum ruk chuang Principal & CEO hna ka lo thawk ve ta reng mai. A hruaina ka dawnna zawng zawngah Pathian hnenah lawmthu ka sawiin, min duhsaktute leh min ṭawngṭaipuitu zawng zawng hnenah lawmthu ka sawi bawk a ni.

Serampore College hi kan sawi ṭhin dan chuan “mi zawng zawng tan a nih rualin neitu bik awm lo” (SC belongs to everyone, but nobody owns it). Kohhran pawl hrang hrang te thawhhona (ecumenical) a nih ang takin, a thuneitu ber leh degree pek theina neitu Council of Serampore College-ah pawh hian India rama kohhran pawl hrang hrang te an tel.

Tunhma lamah chuan Council ṭhut­hmun hi England a ni ṭhin. Coun­cil hian thu a nei em em a, tunah phei chuan a nihna tur ang takin a thawk chho mek a ni. Serampore College hnuaia peng (body) pahnih College Faculty (secular & theological education) leh Senate of the College pawh a pawtkhawm ṭha tawh hle a. Tunhma lama, a bik takin Senate lam kalhrang lek lek ṭhin pawh kan hnukkawm ṭha tawh hle a. Council remtihna leh phalna la hmasa zel tur an nihna pawh a taka hman chhoh mek zel a ni.

Serampore College hi neitu bik awm lo, Kohhran, pawl leh sawrkar ta a nih loh avang hian sum leh pai (financial) hi regular taka dawnna a nei loh avangin thiam dan anga zawn a ngai ṭhin.

Pathian hruaina in tun kum ruk chhung hian hmasawna hrang hrang kan chang nual tawh a ni. Tun hnaia hmasawnna kawng kan hmuh thenkhat te chu:

1. Restoration of main building: Main building kan tih mai hi campus-a building lian ber hi a ni a. William Carey in kum 1820 a a sak ṭan niin hemi aṭanga chhiar chuan kum 200 a lo tling ve ta. Siamṭhat a ṭul tawh hle laiin a senso a hautak avangin siamṭhat lohin tun thleng hian ala awm ta reng a. DPR cheng nuai 400 sen ralna tur ka siam tir a, Mamata Banejee, Chief Minister, Government of West Bengal hmu-in he project hi ka theh lut a. A nin min lo pawmsak nghal a, Higher Education Minister min phone sak nghalin appointment min siamsak bakah fund pawh pe turin a hrilh nghal vek a, ka va lawm tehlul em!

Hemi ṭum hian CM hmutu hi an tam hle mai a, kan inbiak zawh chuan a hote hnenah Principal hi room hranah hruai ula, refreshment pe rawh u tiin a hrilh. Hetiang hi a ti zen zen lo a ni awm e. Kum 2018 aṭang khan kumtin Chrismas-ah ama letterhead leh live signature hmangin Christmas greetings leh duhsakna thuziak, Chritmas cake leh pangpar mawi tak Police officer rual tirin min rawn thawn ziah a. A chungah Serampore College aiawhin lawmthu ka sawi a ni.

2. RESTORATION OF THEOLOGY DEPARTMENT HOSTEL: Pathian Thu zirlaite leh zirtirtu ṭhenkhat awm mekna hostel hi kum 1910-1913-a sak a ni a. Thalai rual 170 vel awmkhawmna a ni a, a rim ve hle. Siamṭhat a ṭul hle tawh a, mahse a chunga sawi ang khian sum lam senso tur a san avangin dinhmun chhe takin hei leh chen hi a lo awm tawh
a. DPR ka siamtir a, senso tura ruahman hi cheng nuai 600 zet a ni hem mai! Pathianin kan ṭawngṭaina min ngaihthlaksakin kan mamawh min pe zel a. Alcove Reality, Kolkata neitute chuan nikum lamah khan min rawn tlawh a. Ka quarter-ah ka lo dawngsawngin kan inhmelhriat chho ta zel a. Alcove Reality te hi mi hausa Marwari an ni a. Project lian pui pui an ngah hle. A langsar ber pakhat chu Kolkata in sang ber ni mek ‘The 42’ hi a ni. December ni 17 khan meeting kan nei a, he DPR hi ka thehlut a. Min pawmsak nghal a, ka va lawm em! Hna pawh a hma thei anga ṭan chhoh nghal an tum. Lalpa’n hma min hruaisak zel hi kan lawm hle a ni.

3. RESTORATION AND CONSERVATION OF CAREY CEMETERY: Pathian rawngbawltu ropui phumna Carey Cemetery (William Carey thlan) hi a dinhmun a chhe hle tawh a. Mizoram aṭanga tlawhtu tam tak pawhin an vei thu an sawichhuak ṭhin. Sum lam harsatna avang bawkin siamṭhat hleih theih lohin tun thleng hian a la awm ta reng a. Danish architect leh heritage architect te pawh ka enpui fo ṭhin. William Carey-a tuchhuan ngana Richard Carey-an British Library, England aṭangin tute nge an phum, khawiah nge an phum tarlanna min rawn thawn tawh a. Tunah hian heritage architect project ka siamtir tawh a, cheng nuai 30 sen ralna tura ruahman a ni. Hei erawh hi chu sum han thawh mai thei tur kan nei nghal lo va. Pathian rinchhana ngaihtuah chhoh mek a ni.

4. BI-CENTENARY CENTRE FOR INTEGRATED STUDIES: Serampore College a Pathian Thu zirna ber tihchakna turin he project hi siam a ni a. Tunah hian kan sum neih ang anga sak ṭan tura hmalak mek a ni. Soil test te pawh neih a ni tawh a, Structural Engineer leh architect te’n a ṭul tur ang zawng zawng an duang (final) mek a ni.

5. CAREY LIBRARY & RESEARCH CENTRE (CLRC) DIGITISATION: Serampore College CLRC ah hian documents pawimawh leh hlu tak tak a awm ṭeuh mai a. A ṭhente phei hi chu a dinhmun a chhe tawh hle. Chuvangin, him zawka vawnṭhat a ṭul takzet a. UK lama ka ṭhiante’n kan mamawh fund min rawn pe tawh a. Khawl ṭha leh ṭul dangte lei tur kan thlang fel tawh a. India ram pawna mi lei tur a nih avangin pandemic bawk hian hmalak chak a harsa. Hna ṭan thuai tum a ni.

Remchang han la zui ila. Principal chungchang, a hnathawh leh mawhphurhna hi zawhna ka dawng nual ṭhin avangin han tarlang tel ila a ṭha ang e. Principal hi pension thlenga thawh theihna post awmchhun a ni a. Secular education ah PhD mai bakah Theological education degree neih tel a ṭul. Thil zawng zawng khaikhawmtu niin, a te nawi aṭanga a lian ber thlenga reltu a nih avangin hna a tam em em a. Master kal chhuak ta khan ti hian a sawi ṭhin, “Principal-in a tih loh chuan thil a tih tak tak theih loh”. Campus inrelbawlna zawng zawng, sawrkar, pawl, police, political party, kohhran pawl hrang hrang, organization hrang hrang, missionary pawl hrang hrang, Universities, Ecumenical pawl hrang hrang, India ram leh khawvel huap (global) ami te nena thawhhona leh rawngbawlnaah hmalatu niin Serampore College aiawhtu a ni. Campus rawn tlawhtu mi pawimawh dawngsawngtu leh a ṭul anga lo mikhualtu a ni bawk.

Hetiang tak a nih avang hian hna a tam em em a. Nilenga rim taka thawh hnua tlaia ka chenna ka thlen hian, “Ni khat atan ni khat hrehawm chu a tawk a ni,” tiin ka nupui duhtak hnenah ka sawi chhuak fo ṭhin. Ka rilru tak chuan hah han intih chang nei ṭhin mah ila, a phun zawngin vawi khat mah ka la sawi lo/duh lo/ngam lo (rilruah chuan awm ve bawk ṭhin mah se). Pathian a zahawm ka ti ṭhin. Pathian malsawm tlak loha rawngbawl ka hlauh vang pawh a ni bawk.

Sawi chak ka neih tlem han zep tel bawk ila. Mizoram sawrkar hnuaia ka thawh laia ka tawh ṭhin, article lamah pawh ka sawisel ṭhinte chu a titheitua Pathianin min dahna hmasaah hian, ka thuneihna hnuaia awm chinah chuan tu mahin tawng ve lo se ka duh avangin office ka luah ni hmasa ber aṭangin hma ka la nghal a.

Kum ruk ka thawh chhung hian ṭul bikna a awm a nih loh chuan keima hna bikah ‘pending’ ka la nei lo. Ka staff te leh student hruaitu te ka hrilh chian em em chu ‘Tu mah harass loh tur’ (don’t harass anyone) tih a ni a, zawm pawh an zawm ṭha hle. Thil harsa leh ennawn ngai a nih loh chuan engmah/tu mah (promotions, bills etc.,) pending loh tur, file tihkhawtlai loh tur, midang tana a harsa thei ang bera tihkual kawisak loh tur, midangte hmasawnna tur dal loh tur. Contract leh supply hna (a lian a te) pawh hi kan nei nual ṭhin a, hna ṭha taka an zawh chuan bill an nawr buai a ngai lo, pek nghal zel an ni. Hetianga ka thawh avang hian midang pawh an lawm a, keipawh ka lawm hle a ni.

A tawp berah chuan Mizorama zirna sang (University leh College) a thawk, mithiam tak takte chungchang kan ngaihtuah thiam lehzual nan kan sawi ang e. Mizoram college-a ka thawh ve lai pawha kan sawi fe fo ṭhin a ni bawk a. West Bengal sawrkar hruaitute leh Higher Education lama hotute nen kan thawhhona lamah kei tehlul hi Sermapore Bial MP emaw MLA ah ding turin min sawm dertu ka tawng leh mauh ṭhin. West Bengal sawrkar hian politics khelh hi an lo phalsak (all India) zau khawp mai. Sawrkar hotute’n min hrilh dan chuan, “West Bengal ah pawh i in-contest thei a, Mizoramah pawh i contest thei, i service chu kan hnenah a awm mai ang,” tiin. Mizoram University-a ka ṭhiante min hrilh dan chuan AMC inthlan dawn pawh khan MZU a thawk candidate nih tumte’n West Bengal sawrkar inkaihhruaina an thil tel nasa viau a ni awm e.

- Vansanglura