A VA LUNGAWI THLAK LOH VE LE

A rualin Sikkim leh Mizoramin Sky Walk Project kan hmu a, túnah Sikkim chuan an hawng/ functioned tawh a, Mizoramah chuan Lok Ayukta-in an chhui ve ṭan a ni âwm e!

Kan sawi nawn leh ang. Sakawr­hmuituai tlang Skywalk leh Chaltlang aṭanga Durtlang Ropeway chu inthlung ruah mai se chu, mi ramin tourist hip nana an hman kha, kan nei ve dawn a ni. Kan tourist income a pung sawt ang a, ṭhangtharte tan ro hlu kan hnutchhiah dawn bawk. Thil ṭha tak a nih vei nen, a zuzi leh mai dawn nge, eng chen nge hma kan lak leh tawh le?

A uiawm asin....

Kan fanghma no ei theih hmasawn­na, central-in a thlawn liau liaua min pek, kan dil ngawih ngawih pawh ni lo, anmahni min kawhhmuh zawk kha a ni a, sum hlawm pawh a tam tham viau a nih kha. Chaltlang aṭanga Durtlang inkar ropeway siam nan Rs. 2482.58 lakh leh Sakawrhmuituai tlanga Skywalk siamna atan Rs. 485. lakh lai a nih kha.

Chutih laiin an hnathawh kan hmuh theih awmchhun chu, cement ban hlui ruhrel ding bak hmuh tur a awm lo. Hna thawh zelna tur bungrua an chhek khawlte lah chu a tuiek nasa tawh mai bawk.

Ram ro hlu tur, ṭha taka bawhzui leh vil zui a nih loh vanga kan chan a nih vaih chuan, ṭhangthar lo awm zelten min la rawn dem ngei ang a, a hun laia mawhphurtute thlarau pawh, anchhia an lawh ngei ang le.

Kan ram hi kan hmangaih si maw?

Politician zawng zawng ṭawngka chhuak chu, ram hmangaih thu a ni vek mai. Kan ram tan ka tih theih tawk thawk turin ka rawn pen chhuak e, ti vek siin, an theih tawk an thawk nge, an duh tawk leh an duh zawng an thawk ṭhin tih hi, mipui zawhna a ni.

Sikkim ram hmangaihtu, an sorkar hruaitute chuan, central duhsakna kan dawn ang chiah an dawn chu, an ram tana ro hlu tur a nihzia hriain, phur takin hma an lo la a. Chhuan­lamah Covid hri an hmang ve lo, party indem tawn nan pawh an hmang ve lo, an ti puitling der tawh. Tourist hip nan an hmang nasa leh dawn khawp mai. Chil putin kan thlir leh dauh dauh ta mai le.

Keini zawng, a chhuanchham zawngin ro kan rel a, mahni ṭanghma hai zawngin hna kan thawk a. He project pawh hi, hna chanve vel chu Mizo pa thawh ve theih ni ta se, hlawkna beiseiin kan vil zuk zuk awm asin, mahse a hlawkna kan lo tel ve theih nghal, sum mawlh mai hi kan kuta lut ve tur a awm loh vang pawh a ni fahmiang, a kawng bo zawngin kan her liampui ta chu a ni si a.

Ram tana ro hlu tur hi chu, mahni ipteah a hlawkna lo lut tur awm lo mah se, chhuan lo awm leh zel turte tana, thil ṭha a nih phawt chuan, ram kan hmangaihna tlarau tal hian, min tih hlawhtlinsak ṭhin se chu, hei ai hian kan ram riangte hian, hma a sawn tawh ngei ang mawle.

Mahse maw, ram ro hlu tur, mut­mawh hnarmawha kan buaipui peih loh laiin, kan iptea lut ve thei thil lo awmah chuan, ram hmingchhiatna te, ram mipui rilru piansualna te, ram leilung suasamna te hring chhuaktu, Kuva transfer lah chu, kan tuipui zawng tak a ni leh hlauh si a. A beidawnthlak teh zawng a nih hi.

- Lalrinliana Colney