ZONUNMAWI A CHUAI ZO TA E

"Sem sem dam dam, ei bil thi thi" ti ṭhin hnam khan tunah chuan tukchhuakin mahni sahmin ṭheuh tipuar tumin kan inpel zut zut a. Tuna kan zoram khawvelah meuh chuan miawkrawl leh hmui dawtheite chuan khaw eng pawh zah zo lovin, "Nangmah i inhmangaih angin, i vengte hmangaih rawh" tih te chu lei leh hmui chanah an dah a. Baal hmaa ṭhingṭhi ngai lo inti te chuan an sawi fiah theih loh aṭanga an sum lakluh hmangin, Babel in sang an din khawn eih uaih ta mai.

Pathian laka thiamchan tumin kohhranah thawh­lawm an chhung ri ruih ruih a. Pulpit meuh pawh zah zo lovin lemchanna dawhsan ang lekah an chan ta!

Hmana dikna, rinawm­na, taihmakna, huaisenna leh tlawmngaihna thlung khawmtu, he ram tana nun hlantu Mizo pasalṭha huaisen he ram sat zauva venghimtute ruang ṭawih hangin a vur a, zotuithiangin a chawm seilen kan chhuan em em, zonunmawi chu phehthlukin a awm ṭan ta der mai!

Vawiinah meuh chuan zonunmawi par zu dâwn a, tlan ṭhin thlahte chuan kan chhuan em em kan zonunmawi chu cheksawlhin kan rap hrual a. Zonunmawi vullaia zoram khawvel leh tun dinhmuna zoram khawvel danglam ta lutuk hian mi tam tak rilru beidawnna ruamah hruaiin an mittui a sur tir a, hausak thut chakna avang hian he ram hian zonunmawi kha a hloh ṭan ta e.

Kan ram, zonunmawi vulna ṭhinah hian chan­chinthar rapthlak tak tak leh in elrelin kan inpuhchhe tawn a, pachhe te te leh dikna duhtute te reng rengin ngaihsak an hlawh zo ta lo. Dik taka thil ti ṭhinte tan he ramah hian din chhhuah a harsa ta ṭalh mai. Dik taka thil titu chu dan hnuaiah leh zoram mipui tam takin thil dik lo a ni tih kan hriat ṭhup chu dik lo taka titute chuan an diklohna pawh hre chang lovin dan rorelna hnuaiah dik in ti takin, an khinglet ngam ta! A khingtute hian kan zonunmawi hi zah lovin hmuhsit takin min rah hrual sak a ni.

Kan pi leh pute hunlai chuan dik tak leh taima taka an thawhchhuah sa hmangin hlawhtlinna nopui an dawm ṭhin. Khua­rel chhiatna leh ṭampui mitthi a lo thleng a nih hawt loh chuan pur an chaw ngai lo. Thingfaka kawngka dovin an rinawm­zia an tilang ṭhin a. Vawiina an thlahte chuan a taima tak leh rinawm taka thawh chhuah ai chuan kawng awlsam kan thlang ta zawk a, kan chiah puam loh leh kan kheh puam a, kuh puam te kan phur puam leh mek zawng a nih hi.

Hausak thut chakna vanga pawisak reng reng nei tawh lo, kan kristianna leh Mizo nihna hmel tibalin, kan zonunmawi hmel hi tihmawkin awm mah se, Zirsangzela'n (fam) khan zonunmawi tun din nan nang leh kei hi kan pawimawh ber a, Mizo niha ram hmangaih mai hi a tawk lova kan nunah ṭheuh zonunmawi hi inlar chhuak tura min au lawm lawm te kha hre rengin Mizo mipuite i ṭangrual ṭhap teh ang.

- Hmuaka pa Tochhawng