Hnam lungphum a nghing mek

China khawl siam hi ṭha deuh deuh a tam mai a. Khawl mawl (simple) si, hna thawk ṭha em em (efficient) si hi an ngah mai. An khawl siam lah hi a ṭhat ang hu-in a man a tlawm phian zel lehnghal.

Thir dehna lam khawl te, thing khawihna lam khawl te, ei leh in sawngbawlna lam khawl te, electronics leh in chhung mamawh khawl te an siam chikim si - an lo advance zia hi kan hmu chho zel a nih hi.

China khawl siam hi Mizorama lakluh tumin hun rei tak taka tawh ka buaipui ṭhin a. Import - Export lam hi MBA ka lo zir ve na subject kha a nih avangin kawng awm thei ka dap nasa mai. Myanmar kaltlanga lakluh dan ka zawng nasa mai a. Burma lam sumdawng leh India ram thuneitu DGFT leh Custom thlengin ka be pawp a, hun pawh a duh ngang mai.

2015 khan Union Commerce Minister-in Zokhawthar border trade centre chu a rawn hawng a. Dan dik thlapin insumdawn tawnna a kal thei tawh ang chu maw tiin Zokhawthar lam aṭanga lakluh ka tum ruh hle mai a. A tawpah chuan dan ang thlapin engmah a tih theih loh tih ka hmu chhuak ta a ni.

Mizoram aṭanga port hnai ber, Kolkatta Port-ah shipping agent kaltlangin, import duty leh tax dang pek ngai zawng zawng pe-in bungrua engemawzat ka lalut thei ta a ni.

Zokhawthar aṭanga lo lut reng reng hi dan lo anga lo lut vek a ni tlat a. Miin sawi dik tum mah se dan dik tak pakhatmah a awm thei lo. Dan dik taka import tur chuan - Certificate of Origin, Commercial Invoice, Packing List, Insu­rance document leh Bill of Lading nen a ni nuaih mai. Pawisa ka pek tawhna Debit Advice Note kha ka submit ang a, Custom hovin an lo en-mil ang a. Ka tax pek tur zat an chhutchhuak ang a. Ka pek tur zat tax chu online payment-in ka pe ang.

Port of Entry-ah khan Custom clearance fee chi hrang hrang bakah Contai­ner transport fee ka clear hnu-ah Port Trust godown ah a lut thei chauh a. Chuta ṭang chuan ka shipping agent ten ka duhna hmunah min rawn phurhsak leh ta a ni.

Ka han sawi duah chhan a awm. Import-Export business kalpui tur hian tihtur neuh neuh, dan hrai zawm tur a tam ngang mai. Chutiang thlapa kan tih chuan rilru a hahdam a, thla a muang em em a ni.

Tunlai khawvelah hian dan leh hrai zawm tur zawm lova ramdang thil lakluh sumdawn nana hman sawi mawi tlat, dik lo deuh pawh dik anga lantir tum tlat kan awm ta fo a, a pawi hle mai. Chutiang ang thil, certificate phuahchawp a, tax lem lem chhunluh hi 'illegal trade' a ni tho tho. Hausakna ni mahse kei chuan ka ti dawn lo. In hnam­hnawih loh a him ber.

Dan dik tak ni lo hian a tih dan ka hre ve ṭeuh mai a. Syndicate ho ka thurualpui ve ang a. Custom, Police, Assam Rifle duty te hnenah pawisa ka vawm ve ang a. Man tlawm takin ka la lut ve thei. Mahse, kristian ka ni a, responsible citizen ka nih bawk avangin ka duh lo.

Chutih rual erawh chuan khawvel ram tinah hian ram leh ram sumdawnna hmun apiangah sum thianghlim lo, thil thuhruk tam tak a kal reng a. Khawvel tawp thleng pawhin a kalin ka ring. Act east policy te pawh a rawn puitling ang a, kawng dik taka sumdawnna leh kawng dik chanvea sumdawnna a kal lian tulh tulh dawn.

Kan hnam lungphum hi a nghing na telh telh ang. Duhthlanna pengṭhuamah kan ding zel ang. Vawiin aṭanga kan lo inzirtir a ngai tak meuh a ni.

- Joseph L. Ralte