'KAN SAKRUANG MIZORAM TAN' TIIN

Kan boruak thawpik tak karah hian, thu ngaihnawm hriat tur a awm tel zel thin hi kan va vannei em. 

Rammute: Thla­muang taka in luma kan lo inkhung zel theih nan, Mizo pasal ṭhate, ramri depa awm tlangval rual te chu, mahni mutbu nen inpu chhuakin, ramri ven hna, tlaivar thak thakin an thawk a ni tih thu kan lo hre thin, a va ngaihnawm tehreng em.

Buk ṭha pawh an sa hman lo, zanah ruahpui vanawnin a la nan zui, an sakruang Mizoram tan an hlan tih loh rual a ni lo. 

Mahni inphat ngam: Hei mai hi a ni lo, SYMA Champhai chuan, Anti-Covid Squad din tumin. Branch tina OB te bakah, mipa kum 40 aia upa lo, mi 10 ṭheuh inthlang chhuak turin an ngen a. 

Hming pe ngamte chu, mahni inphat ngam, ram leh hnam tana tlawmngaia feh chhuak thei, midang tana hrehawm tam tak pawisa lo ngam, thih leh ruam khatah, dam leh tlang khatah ti ngamte tan a nih thu an tar lang nghal bawk. 

An in cho chhuahna thute hi a pa rem rem asin, 'Hlawh leh chhawm­dawlna ang chi engmah beisei tur a awm lo va, kan hlawh tur chu hrehawmna leh channa a ni mai. Kan cho loh a chhe ber thleng thei a nih avangin kan inruat ngam lo va, 'Kan sakruang Mizoram tan' ti ngam, thingserh sat ngam tan mahni ngei inpek mai tur a ni e,' an ti riap mai a ni. 

Hnam vannei: Hnam vannei kan nihzia hi kan ngaihtuah ngai em? Chhiatna a lo thlen a, kan inhmangaihna lo par chhuak ṭhinte hi. Heng thil hi hnam dangah zawng ta ila, hlawh neia tur ngawng ngawng pawha, an inhmuh zawh loh turah hian, he hman hi chuan, a thlawn in, a thlawn liau liau vin, ram tana sakruang hlan ngamtu leh, sum leh pai hlantu, mi tam tak an rawn zuang chhuak thin. 

 

Keini zawng, 'Hnam pasalṭha' nei hnam kan ni tlat a, kum 1966 chhoahte khan, kan hnam pasalṭhate khan, thisen chhuaka hming pein, he ram tan hian an nun an lo hlan tawh a. A tira an inpekna boruak ang kha, rawn phur chhuak zo lo pawh ni se, tun thlengin, hnam pasaltha nihna thisen chu, Mizo tlangval thisenah hian a chambang tlat mai a. Hei hi a ni kan vanneihna chu. 

Hnam dang kan ni lo: Dik tak chuan tun ang dinhmunah te hian, hnam dangah zawng ta ila, anni chuan, 'Police kan nei alawm, hetiang hun atan hian a ni lawm ni, sorkarin sum tam tak senga Police an rawih" tiin hnialkhan an nei nghal ngei ang. Mahse 'kan sakruang Mizoram tan' ti ṭhin, kan hnam pasalṭha rualte chuan, hlawh an phut lo, sor­karah vuina pawh zawng lo vin, 'zam ngai lo val tang ta che, i ram leh hnam humhim nan'  an ti chher chher mai. 

Mi anga thu thiam ni ila, kan hnam pasalthate chhuanawmzia hla do chhamsak a va chakawm em!