Sandalwood hi engnge ni?
Sandalwood hi forest product species thingkung chikhat man to tak leh rimtui tak a ni. He thingah hian a var ‘Santalum Album’ leh a sen ‘Pterocarpus Satalnus’ a awm a, vai ho chuan Sandalwood hi ‘Chandana’ an ti, ‘Agar’ thingrai nen a inang lo.
Khawvela Sandalwood awmna ram te chu, Australia, India, South Africa, Sri Lanka, Malaysia te an ni. India ramah chuan Kerela, Karnataka, Tamil Nadu, Andra Pradesh, Gujarat, Madhya Pradesh, Maharastra, Bihar-ah te a ni. North East-ah Assam leh Manipur-ah awm a, tun hnaiah hian Tripura state-ah commercial cultivation atan phun a ni bawk. Mizoramah pawh khaw hawi zau deuh te chuan an phun nual tawh.
He thing rimtui hi khawvel ram hrang hrangah ngaihhlut a niin, market demand a sang hle a, a bikin India, China, Japan, Taiwan, USA leh Arab ramah te demand a sang zual. Heng zingah hian India rama Sandalwood hi a rimtuina ‘Santalol’ content a sang bik a, a hriak (oil) content hi 90% a nih laiin, Australia Sandalwood oil Santalol content chu 30% te a ni. Heng te aṭang hian India Sandalwood hi hralh a tla bik hle.
India Sorkar pawhin (cultivation) a phun duh apiangin an phun a phalsak a, a puitlin huna hralh duhte tan dan fel tak siam sakin state Forest department kaltlangin permit siam a hralh/ kih theih turin a ruahman tawh a ni. Chuvangin, India ram state hrang hranga Farmer ten Comercial Plantation atan an kalpui mek tawh a ni.
(Google-ah en rawh) Financial Institution NABARD te leh National Medicinal Plant Board (NMPB) te pawn Sandalwood cultivator te tan subsidy an ruahman hial tawh a. (Link http://www/ndtv.com-sandal wood the lost treasure of India/32497 ah te, http://www.buisness-standard.c... ah te hmuh theih a ni. (note-2022 hmalam khan mimal phun hi sorkarin a khap ṭhin a, hemi hnu lamah chuan a duh apiang phun theih turin khapna dan hi siamṭhat a ni tawh).
Forest Product thing dang zawng zawng (species) te chu India Forest Act 1927 hnuai-ah dah vek a nih laiin, sorkar laipui Ministry of Environment & Forest (MOEF) chuan legislature hran Sandalwood bik tan a siam nghe nghe a ni.
A thui lutuk loh nan, he thing Sandalwood hi a phun hun atan June - September thla hi a ṭha a. Sik leh sa temperature chu 5-50.C inkar leh lei ph.6-8.5 ah phun ni thei se. (Mizoram leilung leh sik leh sa a mil tawk tlangpui a ni). Phun hlim hian ruahtui a tlak ṭhat loh chuan, tui pek ṭhat a ngai. A phunna tur hi lei ft1/2 bial laikhuar a, leidip ṭhaa vur leh hnuah polypot ami chu a lei chawpa phun tur a ni, a phunna lei hi rah muk det a, tui leih hnawn nghal tur a ni.
A ṭiak phun inkar hlat zawng hi ft 10-12 inkar ni se, a karah thlai/ thei dang; inter crop phun duh tan phun a remchang. Terrace siama phun chu a ṭha tho nachungin, he thing hi hnim leh thlai dang chawh atan ring ve chi (Partial root Parasite) a nih avangin a bul hnaiah (host plant) tur awm thei zawk se duhthusam a ni mah zawk. (vah fai emaw hal fai buai vak a ngai hran lo a nih chu) acre 1-ah kung 250 phun thei tura ngaih a ni. Kum 10-12 aṭangin hralh theih a ni. Inches 18'-24' a ni tlangpui a, kung a upat poh leh hriak a tam a, a man a to bawk.
Sandalwood hmanna tlangpui te chu, Perfume siam nan te, cosmetic siam nan te, Sahbawn tihrimtui nan te, sakhaw thila serh leh sang alter atan leh te chewing pan masala a telh atan te a ni a; dawmdawi pharmacetical atana te pawh hman a ni. National Medicinal plant Board hian damdawi atan item 32 a neih zingah a telh nghe nghe, a kung hi class hrang hrangin ṭhen a ni. A zung, a phaw, a lairil (harthwood oil) a hriak atan sawr chhuah leh a dip (dust) ah te ṭhen niin a man pawh a hrang thliah a, a hriak man hi a sangber a, a thing tak hi Kg. ah Rs 6000 - Rs.8000/- a ni tlangpui. Kung khatah kg 50-60 a awm thei.
- A.LALMAWIA National (Nursery)