‘Solomona vang’ chhanletna

Vanglaini Daily news dated Aizawl, Saturday 11, 2018 chhuaka ‘Solomona vang” by Revd. Chuauṭhuama article kha ka lo chhiar a. ‘Solomona vang’ tih thupuia hmang si khan, Muslim ho Quran rawn pian dan a ziak kha a mak hle mai! Chu bakah chuan, ṭhangthar zelte tana kan Pathian Lehkhabu Thianghlim ngaih nep theihna lam hawi a rawn ziak kha mak ka ti lehzual a! A thu ziakah khan ka lo hriat ṭhin dan leh ka lo pawm ṭhin dan kalh tak tak a awm avangin, tlem azawng ka rawn ziak ve a ni.

Quran ṭobul a ziak dan kha mak ka ti: “Muslim-ho chuan an sakhaw lehkhabu Koran chu Pathian ziaksa, van aṭanga Pathianin a rawn thlak, Mohamedan a lo dawn niin an sawi a,” tiin a ziak a. Revd. Chuauṭhuama hian, he thu hi eng ziak aṭanga a hmuh nge ni dawn le? Ka lo hriat ve dan nen an va inpersan ngai ve le!

“The Quran:

Quran lo awm ṭan dan ziaka ka hmuh ve chu: “Muslims believe that the Quran was verbally revealed by God to Muhammad through the angel Gabriel (Jibril), gradually over a period of approximately 23 years, beginning on 22 December 609 CE, when Muhammad was 40, and concluding in 632, the year of his death,” tih a ni.

Chu mi awmzia chu: “Muslimte chuan Quran hi Pathianin Muhammada hnenah vantirhkoh Gabriela (Jibril) kaltlanga a thu hriattir a ni a, chu chu zawi zawiin kum 23 chhung vel, 22 December 609 CE, a Muhammada kum 40 a nih kum aṭanga ṭanin, 632 kuma a thih khan a hmawr a bawk a,” tih lam hawi a ni.

Ziak hrang hrang ka chhiar ve tawhah chuan, Quran chu Pathianin a vantirhkoh Gabriela kal tlanga Muhammada hnena a ‘revealed’ tiin an ziak a. Chu chuan, puang chhuak emaw, hriat theiha siam a kawk ber a. Van aṭanga Pathianin a Bu-a a siam sa rawn thlak a, Muhammad-an a kuta lo dawng ang chuan an ziak awm reng reng ka la hre ve ngai lo. Kan Pathian Lehkhabu Thianghlim chanchin a ziak ruala, kan counterpart bera kan ngaih, Muslim ho Quran chanchin a rawn fak viau hian ngaih a ti ṭha lo takzet a ni!

A ziak zel dan hi lo tar lang ila: “…Chutiang deuh chuan Kristian ṭhenkhat pawhin Bible hi Pathianin a sawi ang anga a ziaktuten an ziak, dik lo pakhatmah awm lo ang hialin an la ngai a; chutiang ngaih dan nei chu Mizo ziangah hian an la tam hle ang,” tiin.

“…dik lo pakhatmah awm lo ang hialin an la ngai a; chutiang ngaih dan nei chu Mizo zingah hian an la tam hle ang,” tia a comment aṭang hian, Pathian Lehkhabu Thianghlim hi Pathian thawkkhuma pek angin a pawm ziktluak lo a ang ka ti! Chu bakah, tute emaw tai deuh ran chunga a ziak a ang hle bawk!

Kan Pathian Thu dikna leh rinawmna hi huai taka kan sawi pawha mi tam takin an pawm duh tawh loh laia, mipuite tana Bible hnualsuatna siam thei zawnga ‘Revd’ title neiin a ziak hi a pawi takzetin ka hria.

2 Timothea 3:16 “Pathian Lehkha Thu zawng zawng hi Pathian thawk khuma pek a ni a,…” tih leh Mizoram Presbyterian Kohhran Thurin I-naa “Thuthlung Hlui leh Thuthlung Thar Bute hi Pathian Thu a ni a, heng chauh hi rinna leh thiltih tehna dik lo thei lo a ni,” tih te hi a pawm lo emaw ni dawn le!

2002 kuma Nilai leh Beihrual thupui ziaktuin mi rilru a hliam nasatzia a ziakah khan, “…Aizawl chhim lam veng pakhata pa pakhat phei chuan Synod Moderator hnenah lehkha thawnin a ziaktu kha kohhran aṭanga hnawh chhuah a rawt a ni,” a ti a.

Chutiang khawpa Kohhran mi te thinlung hliamtu chu ngaih nep chi a ni dawn em ni?! Pathian Lehkhabu Thianghlim ngainep taka ziaktu nia a ngaih chu Synod Moderator hnenah tlang takin a hrilh tihna a ni mai lawm ni? Ezekiela 3:18 Mi suaksual hnena ka thu, ‘I thi ngei tur a ni,’ ka tiha, chu mi suaksual chu a nunna hum tura a sualna kawng kalsan turin vauna i neih lohva, vaukhanna thu i hrilh bawk si lohva, chu mi suaksual chu a khawlohnaah a thih chuan a thisen mawh chu i lakah ka phut ngei ang.

A ziak zelah hian: “Bible zir mi thiamte chuan Josua - 2 Lalte thleng hian Deuteronomistic History an ti a,” tiin a ziak a. Pathian Thu hi (History) ang chauha ngaitute ngaih dan chu a pawmpui hle tih a va ang ve?! Hebrai 13:8 Isua Krista chu niminah nen, vawiinah nen, kumkhua pawhin a pang­ngaiin a awm fo vang.

A ṭawngkam hman ang hi a chanchin ziak nan lo hmang ve ta ila a duh ang em? Entirnan: Revd. Chuauṭhuama hi Zoram Kristian tam tak chuan Pastor atana lak ni si, a pension thlenga Pastor Bial vawng miah lova pension ṭhak awm chhun ang hialin mi tam tak chuan an la ngai a hial ang.

Revd. Chuauṭhuama hian Pathian Thu thianghlimna pawmtu thinlung a hliam nasa tih hria se. “Pathian Lehkha Thu zawng zawng hi Pathian thawk khuma pek a ni a,…” tih hi a dikzia rawn ziak tawh zawk se tih chu ka duh dan a ni.

- Thanhlira, New Secretariat Complex, Khatla