Hawh u, i ti mai mai tawh lo ang u (Mizoram Inthlan Thuchah Tawi)

Mizoram hi Pathian zawn­chhuah ram, Mizote hi Pathian hnam thlan kan in ti maw. Chumi avang chuan za-a-za Kristian kan inti ṭhin maw. Khawilaiah hian nge Pathian zawn chhuah ram leh Pathian hnam thlan kan nihna chu a lan chhuah ṭhin tak le? Kil tin leh kawng tin renga kan nun dan leh khawsak danah hian Pathian thu anga Isua Krista hnungzui a, Isua rilru nunpuitu Kristian chu kan va vang si em! A zawn chhuah ram leh a hnam thlan teah chuan a neitu Pathian chu a hmasa ber leh chungnung bera dahin, lalna leh thuneihna kan chantir si lo a nih hi. Hawh u, ngaihtuah chiang ila, i harh ang u.

Khawvela ram tin leh hnam tinte hi khawvel awm tirh ata vawiin thleng hian Pathianin a hre vek a, a hmu reng a ni. Mitin leh hnam tinte hi an thiltih ang zelin an chungah ro a relsak mek a, a relsak zel dawn bawk. Keini Mizote phei chu Lalpa hriat leh Lalpa hre tawhtute kan ni a, chumi avang chuan Pathian hi kan chungah a thikthu a chhe hle a ni tih hriain i fimkhur hle ang u. “Nangni chauh hi khawvela chhungkua zawng zawnga ka hriat in ni a, chuvangin, in khawlohna zawng zawngahte chuan ka hrem ang che u,” Pathianin a ti si a. Amosa 3:2

Mizoram hi ram nuam leh awhawm, Mizote hi hnam lungrual leh hlim, hnam awhawm leh zahawm ni tura siam hi a harsa reng reng lo. Chumi a lo thlen theihna awm chhun chu hei chauh hi a ni, “Keimahah awm reng rawh u, kei pawh nangmahniah ka awm reng ang. Keimah lovin engmah in ti thei si lo,” kan Lal Isua’n a tih hi pawma zawm mai tur a ni. Johana 15:4, 5.

Ram roreltute leh mitinte hian Pathian hi a hmasaber leh chungnung bera kan dah a, engkima amah rawn hmasa a, a thu ang zela kan ngaihtuah leh kan tih hian; engkim a fel a, a dik a, Pathian leh kan mihringpuite tana thil ṭha ti kan lo ni mai tih hi i hre reng ang u. Khawi ram leh hnam pawh, eng pawl pawh, tu pawh, Pathian dah hmasa ber leh amah ṭih tak taktute chu Pathianin a awmpui zel ang a, an ding chang zel ang. Pathian nen chuan eng pawh a tih theih si a.

Tunah hian Lalpa hriat Mizoram chuan, a ram leh a hnamte chunga roreltu tur kan thlang leh dawn ta a. A zawn chhuah ram leh hnamte chunga roreltu tur kan thlan danah hian, a thlangtu mitinte hian Pathian lakah bat kan nei a, mawh kan phur nasa a ni tih hria ila, ka tih dik loh chuan keima chung ngeiah hian, he leia ka dam chhung leh ka thih hnu-ah Pathianin ka thiltih phu ang ngei leh ka chan tawk min hmuhtir dawn a ni tih hi i hre chiang hle ang u.

Eng pawl hian nge tih leh, tute hian nge Lal Isua tel lo chuan engmah tak tak hi kan ti thei tak tak lo va, kan tifuh thei tak tak lo a ni tih hriaa, Pathian chu a hmasaber leh chungnung bera dah tak taktute tih hi ngun takin i chhut ang u. Chuti ang mi lo awm tur leh, kan chunga rorel tur hian a thlangtu tur mitinte hian Pathian rawn chungin fim takin i awm ang u.

Mizoram siamṭha tur hian tunah hian Pathianin hun tlemte min la neihtir hram hram a. Kan lo tihsual tawh leh kan lo bawhchhiat tawhte chu nasa hle tawhin leh Pathian thinurna chu ph< hle tawh mah ila, Pathian chuan kan chungah zahngaihna a la lantir hram hram a ni tih hi hria ila, hei hi hun hnuhnung a ni tih hriain; kan Pathian biak dan te, kan Kristian dan te, kan nun dan leh duhdan zawng zawng te, kan mihring puite chunga kan rilru puthmang te, ram leh mipui tana kan thil tih ṭhin zawng zawngte leh, kan kan chunga roreltu tur kan thlan danah te hian, hawh u, i ti mai mai tawh lo ang u. Pathian thinurna chu i thlen lui hram tawh mawlh lo ang u. Pathianin a ti ve mai mai ngai lo va, A thutiam pakhat mah a ti lo ngai si lo.

“Mi ṭhenkhatin muanga an ruat angin Lalpa chu a thutiam kawngah chuan a muang lo ve; tuma boral duh lova, mi zawng zawng lo sim duhin, nangmahni lamah a dawhthei a ni zawk e,” II Petera 3:9

Engkim hriatfiahna leh tihdikna leh famkimna chu: dik taka pianthar a; englai pawha Isua rilru nunpui hi a ni.

- K. Hmingthankaia